ନୂଆପଡ଼ାରେ ବିଜେଡିର ପାଓ୍ବାର ଶୋ’, ପ୍ରାର୍ଥୀ ସ୍ନେହାଙ୍ଗିନୀ କହିଲେ- ‘ମୁଁ ନବୀନ ବାବୁଙ୍କ ନେତା, କେବେ ଧୋକା ଦେବିନି’

ନୂଆପଡ଼ା ୧୯।୧୦: ନୂଆପଡ଼ାରେ ପଦଯାତ୍ରା କରି ପାୱାର ଶୋ’ କରିଛି ବିଜେଡି । ସୋମବାର ପ୍ରାର୍ଥୀପତ୍ର ଦାଖଲ କରିବେ ବିଜେଡି ପ୍ରାର୍ଥୀ । ଏକ ବିଶାଳ ରାଲି ଶିବ ମନ୍ଦିର ଛକ ତେଲିପଡ଼ା ଠାରୁ ସହର ପରିକ୍ରମା କରି ଏକତା ଛକ ପର୍ଯ୍ୟନ୍ତ ଯିବ । ପରେ ସେଠାରେ ଏକ ସାଧାରଣ ସଭାର ଆୟୋଜନ କରଛି ବିଜୁ ଜନତା ଦଳ । ଏହି କାର୍ଯ୍ୟକ୍ରମରେ ବିଜେଡିର ରାଜ୍ୟସ୍ତରୀୟ ନେତା ମାନେ ଯୋଗ ଦେଇଛନ୍ତି । ତେବେ ଏହି ରାଲି ପୂର୍ବରୁ ସ୍ନେହାଙ୍ଗିନୀ ନୂଆପଡ଼ା ସ୍ଥିତ ବାବା କଣା ଭାଇରା ମନ୍ଦିରରେ ପୂଜାର୍ଚ୍ଚନା କରିଥିଲେ ।

ପଦଯାତ୍ରା ସମୟରେ ବିଜେଡି ପ୍ରାର୍ଥୀ ସ୍ନେହାଙ୍ଗିନୀ ଛୁରିଆ କହିଛନ୍ତି, ମୁଁ ବିଜେଡିର ସବୁ ସଦସ୍ୟଙ୍କୁ କୃତଜ୍ଞତା ଜଣାଇବି । ରାଜେନ୍ଦ୍ର ଢୋଲକିଆ ଆମ ଦଳର ନେତା ତାଙ୍କୁ ପ୍ରଣାମ କରୁଛି । ନୂଆପଡ଼ାରେ ଆଜି ଇତିହାସ ସୃଷ୍ଟି ହୋଇଛି । ଅନ୍ୟ ଦଳ ବିଜେଡିକୁ ଦୁର୍ବଳ ବୋଲି ଭାବୁଥିଲେ । ହେଲେ ଏ ଜନ ସମର୍ଥନ ଦେଖି ସେମାନେ ଭୟଭୀତ । ମୁଁ ନୂଆପଡ଼ାର ଭାଣିଜୀ । ଆପଣଙ୍କ ସହ ମିଶି ପୂର୍ବରୁ କାମ କରିଛି । ସୁନାଦେଇ ମନ୍ଦିର ଉନ୍ନତି, ବିଜୁ ଏକ୍ସପ୍ରେସ ୱେ ବିଜେଡି ସରକାର ସମୟରେ ହୋଇଛି । ନୂଆପଡ଼ାର ସବୁ ଜନତା ନବୀନ ବାବୁଙ୍କୁ ଭଲ ପାଆନ୍ତି । ଦଳରୁ କିଏ ଗଲା, କିଏ ଆସିଲା ତାହାର କୌଣସି ଅର୍ଥ ନାହିଁ । ଯିଏ ଗଲା ସିଏ ଗଲା । ମୁଁ ଆପଣଙ୍କୁ ମୋର ପରିବାର ବୋଲି ଭାବେ । ବିଜେପି କହୁଛି ମୁଁ ଆଜି ଉଡି ଆସିଛି । କାଲି ପଳେଇବି । ହେଲେ ସେମାନେ ଜାଣିବା ଦରକାର ମୁଁ ନବୀନ ବାବୁଙ୍କ ନେତା । କେବେ ଧୋକା ଦେବି ନାହିଁ ।