rajpal yadav case: ଚେକ୍ ବାଉନ୍ସ ମାମଲା, ତିହାର ଜେଲ୍‌ରେ ଆତ୍ମସମର୍ପଣ କଲେ ରାଜପାଲ ଯାଦବ

ନୂଆଦିଲ୍ଲୀ: rajpal yadav case: ପୁରୁଣା ଚେକ୍ ବାଉନ୍ସ ମାମଲାରେ ତିହାର ଜେଲ୍‌ରେ ଆତ୍ମସମର୍ପଣ କଲେ ପ୍ରସିଦ୍ଧ ବଲିଉଡ ଅଭିନେତା ରାଜପାଲ ଯାଦବ। ଦିଲ୍ଲୀ ହାଇକୋର୍ଟଙ୍କ ନିର୍ଦ୍ଦେଶ ପରେ ରାଜପାଲ ଗୁରୁବାର ତିହାର ଜେଲରେ ଆତ୍ମସମର୍ପଣ କରିଛନ୍ତି। ତିହାର ଜେଲ୍ ସୂତ୍ରରୁ ମିଳିଥିବା ଅନୁଯାୟୀ, ଦିଲ୍ଲୀ ହାଇକୋର୍ଟର କଡ଼ା ନିର୍ଦ୍ଦେଶ ପରେ ରାଜପାଲ ଯାଦବ ଅପରାହ୍ନ ପ୍ରାୟ ୪ଟାରେ ଜେଲ୍ କର୍ତ୍ତୃପକ୍ଷଙ୍କ ନିକଟରେ ଆତ୍ମସମର୍ପଣ କରିଥିଲେ। କୋର୍ଟ ତାଙ୍କୁ ଚେକ୍ ବାଉନ୍ସ ମାମଲାରେ ସଜା କାଟିବା ପାଇଁ ଜେଲ୍ରେ ଆତ୍ମସମର୍ପଣ କରିବାକୁ ନିର୍ଦ୍ଦେଶ ଦେଇଥିଲେ।

ପ୍ରଥମେ ସରେଣ୍ଡର କର

ଆତ୍ମସମର୍ପଣ ପାଇଁ ଅତିରିକ୍ତ ସମୟ ଦେବାକୁ ରାଜପାଲ ଯାଦବ ଦିଲ୍ଲୀ ହାଇକୋର୍ଟରେ ଆବେଦନ କରିଥିଲେ। ହେଲେ ମାମଲାର ଶୁଣାଣି କରି ବୁଧବାର ଦିଲ୍ଲୀ ହାଇକୋର୍ଟର ବିଚାରପତି ସ୍ୱର୍ଣ୍ଣ କାନ୍ତ ଶର୍ମାଙ୍କ ଖଣ୍ଡପୀଠ ଏହାକୁ ଖାରଜ୍ କରିଦେଇଥିଲେ। କୋର୍ଟ ସ୍ପଷ୍ଟ ଭାବରେ କହିଥିଲେ ଯେ ଅଭିନେତାଙ୍କୁ ପ୍ରଥମେ ସରେଣ୍ଡର କରିବାକୁ ପଡ଼ିବ। ତା’ପରେ ଯାଇ ତାଙ୍କ ଆବେଦନ ଉପରେ ବିଚାର କରାଯାଇପାରିବ।

କୋର୍ଟ କହିଥିଲେ ଯେ ଗତଥର ଯେତେବେଳେ ସେ ମୁମ୍ବାଇରେ ଥିବା କଥା କହିଥିଲେ ସେତେବେଳେ ତାଙ୍କୁ ଦୁଇଦିନର ସମୟ ଦିଆଯାଇଥିଲା। ଜଷ୍ଟିସ ଶର୍ମା ସ୍ପଷ୍ଟ କରିଥିଲେ ଯେ ତାଙ୍କର ଅତିରିକ୍ତ ସମୟ ଆବେଦନକୁ ପୂର୍ବରୁ ଖାରଜ କରାଯାଇଛି। ଆଉ କୌଣସି ରିହାତି ଦେବାର କାରଣ ନାହିଁ।

କୋର୍ଟ ଆହୁରି କହିଥିଲେ ଯେ ଆଇନ ପ୍ରତି ସମ୍ମାନ ଜରୁରୀ ଏବଂ କୌଣସି ବ୍ୟକ୍ତି, ସେ ଚଳଚ୍ଚିତ୍ର ଶିଳ୍ପ ସହିତ ଜଡ଼ିତ ଥିଲେ ବି ତାଙ୍କୁ ସ୍ୱତନ୍ତ୍ର ରିହାତି ଦିଆଯିବା ଉଚିତ୍ ନୁହେଁ। ଶୁଣାଣି ସମୟରେ, ରାଜପାଲ ଯାଦବଙ୍କ ଓକିଲ କୋର୍ଟରୁ ଏକ ସପ୍ତାହ ସମୟ ବୃଦ୍ଧି କରିବାକୁ ଅନୁରୋଧ କରିଥିଲେ। ଓକିଲ ଦାବି କରିଥିଲେ ଯେ ଯାଦବ ୫୦ ଲକ୍ଷ ଟଙ୍କାର ବ୍ୟବସ୍ଥା କରିଛନ୍ତି ଏବଂ ଶୀଘ୍ର ଦେୟ ଦେବେ।

ଓକିଲ ପ୍ରମାଣ ଦର୍ଶାଇ କହିଥିଲେ ଯେ ଯଦି ତାଙ୍କୁ ସମୟ ଦିଆଯାଏ, ତେବେ ସେ ଟଙ୍କା ଆଣିବେ, ନଚେତ୍ ତାଙ୍କ ଆବେଦନ ଖାରଜ ହେଲେ ସେ ଆତ୍ମସମର୍ପଣ କରିବେ। ତଥାପି, କୋର୍ଟ ଏହି ଯୁକ୍ତିଗୁଡ଼ିକୁ ଗ୍ରହଣ କରିନଥିଲେ, ଯାହା ପରେ ଅଭିନେତା ନିର୍ଦ୍ଧାରିତ ସମୟରେ ଜେଲରେ ଆତ୍ମସମର୍ପଣ କରିଛନ୍ତି।

ମାମଲାଟି କ’ଣ?

ଏହି ମାମଲା ଏକ ଚେକ୍ ବାଉନ୍ସ ମାମଲା ସହିତ ଜଡ଼ିତ। ଯେଉଁଥିରେ ରାଜପାଲ ଯାଦବଙ୍କୁ ୨୦୨୪ ମସିହାରେ ଦୋଷୀ ସାବ୍ୟସ୍ତ କରାଯାଇ ଦଣ୍ଡିତ କରାଯାଇଥିଲା। ଏହି ଏକ ପୁରୁଣା ମାମଲା, ଯାହା ତାଙ୍କ ଫିଲ୍ମ "ଆତା ପତା ଲାପତା"ର ନିର୍ମାଣ ସହିତ ଜଡିତ ଏକ ଋଣ ଏବଂ ଚେକ୍ ବାଉନ୍ସ ଘଟଣା ସହିତ ଜଡ଼ିତ। ଅଭିନେତା ବାରମ୍ବାର ଟଙ୍କା ଦେବାକୁ ପ୍ରତିଶ୍ରୁତି ଦେଇଥିଲେ, କିନ୍ତୁ କୋର୍ଟ ତାଙ୍କର ଡିଫଲ୍ଟକୁ ଗମ୍ଭୀରତାର ସହ ନେବା ସହ ତାଙ୍କୁ ଦଣ୍ଡିତ କରିଛନ୍ତି।