କାନପୁର ଲାମ୍ବୋର୍ଗିନି କାଣ୍ଡ: ଗିରଫର ୭ ଘଣ୍ଟାରେ ଶିବମ ମିଶ୍ରାକୁ ଜାମିନ, ପୋଲିସର ରିମାଣ୍ଡ ଆବେଦନ କୋର୍ଟରେ ଖାରଜ

ଲକ୍ଷ୍ନୌ: କାନପୁର ଲାମ୍ବୋର୍ଗିନି କାଣ୍ଡ ମାମଲାରେ ଗିରଫ ଗୁଟଖା ବେପାରୀ କେକେ ମିଶ୍ରାଙ୍କ ପୁଅ ଶିବମ ମିଶ୍ରାଙ୍କୁ ଜିଲ୍ଲା କୋର୍ଟରୁ ଜାମିନ ମିଳିଛି । କୋର୍ଟ ୨୦ ହଜାର ଟଙ୍କାର ବ୍ୟକ୍ତିଗତ ମୁଚାଲିକାରେ ଶିବମଙ୍କୁ ଜାମିନ ପ୍ରଦାନ କରିଛନ୍ତି । ଜାମିନ ଉପରେ ଶୁଣାଣି ବେଳେ ପୋଲିସ ୧୪ ଦିନିଆ ରିମାଣ୍ଡ ମାଗିଥିଲା । କିନ୍ତୁ କୋର୍ଟ ପୋଲିସର ଆବେଦନକୁ ଖରାଜ କରିଦେଇଥିଲେ । ଗୁରୁବାର ସକାଳ ୯ଟାରେ ଗିରଫ ହୋଇଥିବା ଶିବମ ମିଶ୍ରାକୁ ମାତ୍ର ୭ ଘଣ୍ଟା ଭିତରେ ଜାମିନ ମିଳିଯାଇଛି । ପୋଲିସ ତଦନ୍ତରେ ଜଣାପଡ଼ିଥିଲା ଯେ ଦୁର୍ଘଟଣା ଘଟାଇବା ସମୟରେ ଶିବମ ମିଶ୍ରା ହିଁ ଡ୍ରାଇଭିଂ ସିଟରେ ବସିଥିଲା ଓ କାର୍ ଚଲାଉଥିଲା ।

ଉଲ୍ଲେଖଯୋଗ୍ୟ, କାନପୁରରେ ଭିଆଇପି ରୋଡରେ ଲାମ୍ୱୋର୍ଗିନି କାରରେ ଘଟାଇଥିବା ଦୁର୍ଘଟଣା ମାମଲାରେ ବଂଶୀଧର ଟୋବାକୋ ଗ୍ରୁପ ମାଲିକ କେକେ ମିଶ୍ରାଙ୍କ ପୁଅ ଶିବମ ମିଶ୍ରାଙ୍କୁ ଆଜି ଗିରଫ କରାଯାଇଥିଲା । ଦୁର୍ଘଟଣାରେ ଅନେକ ଲୋକ ଆହତ ହୋଇଥିଲେ, ଯାହା ପରେ ଏହି ଖବର ଚର୍ଚ୍ଚାକୁ ଆସିଥିଲା । ପୋଲିସ ଦାବି କରିଛି ଯେ ଦୁର୍ଘଟଣା ସମୟରେ ନିଜ ଶିବମ ମିଶ୍ରା କାର ଚଲାଉଥିଲା, ଅନ୍ୟପଟେ ଅଭିଯୁକ୍ତର ପକ୍ଷ ରଖୁଥିବା ଲୋକଙ୍କ କହିବା କଥା ଗାଡ଼ି ଡ୍ରାଇଭର ମୋହନ ଲାଲ୍ ଚଲାଉଥିଲା । କିନ୍ତୁ ଦୁର୍ଘଟଣା ସମୟର ଭାଇରାଲ୍ ଭିଡିଓରେ ଶିବମ ମିଶ୍ରା ଡ୍ରାଇଭିଂ ସିଟରୁ ବାହାରକୁ ଆସୁଥିବା ଦେଖିବାକୁ ମିଳୁଛି, ଯାହାକୁ ନେଇ ପୋଲିସ ତଦନ୍ତ ଆଗକୁ ବଢିଥିଲା ।

ଦୁର୍ଘଟଣା ସମୟରେ ଉପସ୍ଥିତ ବାଉନସରଙ୍କ ଭୂମିକା ମଧ୍ୟ ପ୍ରଶ୍ନ ଘେରରେ ରହିଛି । ପ୍ରତ୍ୟେକ୍ଷଦର୍ଶୀଙ୍କ କହିବା ଅନୁସାରେ, କିଛି ଲୋକ କାରର ନମ୍ୱର ପ୍ଲେଟକୁ ହଟାଇବା ଏବଂ ଲୁଚାଇବା ପାଇଁ ପ୍ରୟାସ କରୁଥିଲେ । ପ୍ରାଥମିକ ତଦନ୍ତରେ ପୋଲିସ ଅବହେଳା କରିଥିବା ଅଭିଯୋଗ ହୋଇଥିଲା । ଏହା ପରେ ଗ୍ୱାଲଟୋଲି ଥାନା ପ୍ରଭାରୀଙ୍କୁ ଲାଇନ୍ ହାଜର କରାଯାଇଥିଲା ଓ ସିସିଟିଭି ଫୁଟେଜ ଏବଂ ଭାଇରାଲ୍ ଭିଡିଓର ତଦନ୍ତ କରାଯାଇଥିଲା ।