ଯୁଦ୍ଧରେ ଧୋକା ଦେଲା ଜର୍ମାନ, HX-2 ଷ୍ଟ୍ରାଇକ୍ ଡ୍ରୋନ କ୍ରୟ ବନ୍ଦ କଲା ୟୁକ୍ରେନ

କିଭ ୨୨।୧: ଜର୍ମାନ ତିଆରି ଏଚଏକ୍ସ-୨ ଷ୍ଟ୍ରାଇକ୍ ଡ୍ରୋନ କ୍ରୟ ବନ୍ଦ କଲା ୟୁକ୍ରେନ। ରଣ ଭୂମିରେ ଏହି ଡ୍ରୋନଗୁଡିକର ପ୍ରଦର୍ଶନ ଅତ୍ୟନ୍ତ ନିମ୍ନମାନର ହୋଇଛି। ୟୁକ୍ରେନ ପ୍ରତିରକ୍ଷା ମନ୍ତ୍ରାଳୟ ଅନୁସାରେ ଏହି ଡ୍ରୋନ ନେଇ ଜର୍ମାନ ଯେପରି ଦାବି କରିଥିଲା ସେପରି ଏହାର ପ୍ରଦର୍ଶନ ନୁହେଁ। ଏ ଗୁଡିକ ଉଡିବାକୁ ଅସୁବିଧା ହେଉଛି, ଯଦିବି ଉଡୁଛି ସେ ଗୁଡିକ ଅଧିକ ସମୟ ପର୍ଯ୍ୟନ୍ତ ଆକାଶରେ ରହୁ ନାହାନ୍ତି। ଯେତିକି ଡ୍ରୋନ ଅଣାଯାଇଥିଲା ସେଥିରୁ ମାତ୍ର ୨୫% ଟେକଅଫ କରିପାରିଛନ୍ତି। ଏହାଛଡା ଋଷୀୟ ଇଲେଟ୍ର୍ରୋନିକ୍ ୱାରଫେୟାର ଆଗରେ ଏହି ଡ୍ରୋନର କୌଣସି ମୂଲ୍ୟ ନାହିଁ।

ଏହି ଡ୍ରୋନଗୁଡିକ ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ପରିଚାଳିତ ବୋଲି କୁହାଯାଇଥିଲା। ହେଲେ ଅପରେଟରଙ୍କ ସମ୍ପର୍କ ବିଛିନ୍ନ ହେବା ପରେ ଏଗୁଡିକ ମିସନ ଜାରି ରଖି ପାରୁ ନାହାନ୍ତି। ଏଣୁ ଏଚଏକ୍ସ-୨ ଡ୍ରୋନର ଯୁଦ୍ଧ ଉପଯୋଗୀତା ୟୁକ୍ରେନ ସମାପ୍ତ କରିଦେଇଛି। ୟୁକ୍ରେନ ଏହି ଡ୍ରୋନ ଗୁଡିକୁ ଜର୍ମାନ ସରକାରଙ୍କ ଆର୍ଥିକ ସହାୟତାରେ କିଣିଥିଲା। ଏବେ କ୍ରୟ ରୋକାଯିବା ପରେ ଡ୍ରୋନର କ୍ଷମତା ନେଇ ପ୍ରଶ୍ନ ଉଠିଛି। ଡ୍ରୋନର ଖରାପ ପ୍ରଦର୍ଶନ ଯୋଗୁ କିଭ ଅର୍ଡର ରୋକି ଦେଇଛି। ଏଣୁ ଏହି ଡ୍ରୋନ ବାବଦ ପାଣ୍ଠି ଏବେ କେଉଁ ଉଦ୍ଦେଶ୍ୟରେ ଖର୍ଚ୍ଚ ହେବ ସେ ନେଇ ପ୍ରଶ୍ନ ଉଠିଛି।

ଏଚଏକ୍ସ-୨ ଏହାର ପୁରୁଣା ଭର୍ସନ ଏଚଏକ୍ସ-୧ଠାରୁ ମଧ୍ୟ ମହଙ୍ଗା ଓ ଯୁଦ୍ଧରେ ପ୍ରଭାବହୀନ ସାବ୍ୟସ୍ତ ହୋଇଛି। ଏଚଏକ୍ସ-୧ର ଅସୁବିଧା ଦୂର କରିବାକୁ ଏଚଏକ୍ସ-୨ ଅଣାଯାଇଥିଲା। ହେଲେ ତାହା ମଧ୍ୟ ଯୁଦ୍ଧରେ ସଫଳ ହେଉ ନାହିଁ। ଋଷିଆ-ୟୁକ୍ରେନ ଯୁଦ୍ଧରେ ସିଙ୍ଗଲ ୟୁଜ୍ ଡ୍ରୋନ ଏବେ ଗୁରୁତ୍ୱପୂର୍ଣ୍ଣ ଅସ୍ତ୍ର ପାଲଟିଛି। ହେଲେ ଡ୍ରୋନରେ ଆକ୍ରମଣରେ ୟୁକ୍ରେନକୁ ଋଷିଆ ପଛରେ ପକାଇ ଦେଇଛି। ଋଷିଆ ଇରାନରୁ ମିଳିଥିବା ଡ୍ରୋନ ଡିଜାଇନରେ ଗେରାନ-୨ ଭଳି ଡ୍ରୋନକୁ ବହୁ ସଂଖ୍ୟାରେ ବ୍ୟବହାର କରୁଛି। ୨୦୨୫ ମସିହା ଶେଷ ବେଳକୁ ଗେରାନ-୨ ଡ୍ରୋନ ମୋବାଇଲ ଲକ୍ଷ୍ୟ ଉପରେ ଆକ୍ରମଣ କ୍ଷମତା ପ୍ରଦର୍ଶନ କରି ଯୁଦ୍ଧର ଚିତ୍ର ବଦଳେଇବାର ସମ୍ଭାବନା ସୃଷ୍ଟି କରିଥିଲା।

ତେବେ କେବଳ ଏଚଏକ୍ସ-୨ ଡ୍ରୋନ ନୁହେଁ ଏହା ପୂର୍ବରୁ ୟୁକ୍ରେନକୁ ଜର୍ମାନ ଯୋଗାଇ ଦେଇଥିବା ଅସ୍ତ୍ରର ମାନ ନେଇ ସନ୍ଦେହ ଉପୁଜିଥିଲା। ଜର୍ମାନ ତାର ଅତ୍ୟାଧୁନିକ ସେଲଫ ପ୍ରୋପେଲଡ୍ ଆର୍ଟିଲାରୀ ଗନ ପିଜେଡିଏଚ୍-୨୦୦୦କୁ ୨୦୨୨ ମସିହାରେ ୟୁକ୍ରେନ ପଠାଇଥିଲା। ତେବେ ହାଇ ଇଣ୍ଟେନସିଟି ଯୁଦ୍ଧରେ ଏହା ସେପରି ପ୍ରଦର୍ଶନ କରି ପାରିନଥିଲା ଯେପରି କୁହାଯାଇଥିଲା। ଜର୍ମାନ ମିଡିଆ ଆଉଟଲେଟ୍ ‘ଡେର ସ୍ପିଗଲ’ ଅନୁସାରେ ଏହି ଅସ୍ତ୍ରରେ ଡେଲିଭରୀର ମାସକ ପରେ ଯାନ୍ତ୍ରିକ ତ୍ରୁଟି ଦେଖାଯାଇଥିଲା।

ଏଣୁ ଯୁଦ୍ଧରେ ୟୁକ୍ରେନକୁ ଆମେରିକାର ଏମ୭୭୭ ହ୍ୱିଟଜର ଭଳି ସିଷ୍ଟମ ଉପରେ ଭରସା କରିବାକୁ ବାଧ୍ୟ ହୋଇଥିଲା। ତେବେ କେବଳ ଜର୍ମାନ ନୁହେଁ ଯୁଦ୍ଧ ପାଇଁ ଇଟାଲୀ ଦେଇଥିବା ଅସ୍ତ୍ରଶସ୍ତ୍ର ମଧ୍ୟ ପ୍ରଭାବହୀନ ରହିଥିଲା। ଇଟାଲୀ ଆର୍ଟିଲେରୀ ଯୁଦ୍ଧରେ ଆଦୌ କାମକୁ ଆସି ନଥିଲା। ଏହି ସ୍ଥିତି ଜର୍ମାନର ଲିୟୋପାର୍ଡ ୨ଏ-୬ ଟ୍ୟାଙ୍କ ସହ ମଧ୍ୟ ହୋଇଥିଲା। ଏହି ଟ୍ୟାଙ୍କକୁ ନେଇ ପାଶ୍ଚାତ୍ୟ ଦେଶମାନେ ବେଶ ଆଶାୟୀ ଥିଲେ। ହେଲେ ଯୁଦ୍ଧ ଭୂମିରେ ଏ ଗୁଡିକ ଖେଳନା ସାବ୍ୟସ୍ତ ହୋଇଥିଲେ। ଯୁଦ୍ଧରେ ୟୁକ୍ରେନର ଏହି ଅସ୍ତ୍ର ଗୁଡିକ ନଷ୍ଟ ହୋଇଯାଇଥିଲା।