ଦିନକରେ ନିବେଶକଙ୍କ ଲାଭ ୧ ଲକ୍ଷ କୋଟି ଟଙ୍କା, ସେନ୍‌ସେକ୍ସରେ ୫୦୦ ପଏଣ୍ଟ ବୃଦ୍ଧି

ନୂଆଦିଲ୍ଲୀ: ଘରୋଇ ପୁଞ୍ଜି ବଜାର ବୁଧବାର ନଭେମ୍ୱର ୧୯ରେ ସବୁଜ ସଂକେତରେ ବନ୍ଦ ହୋଇଛି । କାରବାର ଆରମ୍ଭରେ ବଜାର ଲାଲ୍ ସଂକେତର ଟ୍ରେଡ୍ କରୁଥିଲା, କିନ୍ତୁ ଅପରାହ୍ଣ ପରେ ଜୋରଦାର କମବ୍ୟାକ୍ କରିଥିଲା । ସେନ୍‌ସେକ୍ସ ୫୧୩ ଅଙ୍କ ବଢି ବନ୍ଦ ହୋଇଛି । ଅନ୍ୟପଟେ ନିଫ୍ଟି ୨୬,୦୦୦ ଉପରେ ବନ୍ଦ ହୋଇଛି । ଆଇଟି ସେୟାରରେ କ୍ରୟ ଓ ଭାରତ-ଆମେରିକା ମଧ୍ୟରେ ଶୀଘ୍ର ବାଣିଜ୍ୟ ବୁଝାମଣା ସଂକେତରୁ ନିବେଶକଙ୍କ ସେଣ୍ଟିମେଣ୍ଟ ପଜିଟିଭ୍ ରହିଛି ।

କାରବାର ଶେଷରେ ବିଏସଇ ସେନ୍‌ସେକ୍ସ ୫୧୩.୪୫ ଅଙ୍କ ବା ୦.୬୧ ପ୍ରତିଶତ ବଢି ୮୫,୧୮୬.୪୭ ସ୍ତରରେ ବନ୍ଦ ହୋଇଛି । ଅନ୍ୟପଟେ ନିଫ୍ଟି ୧୪୨.୬୦ ଅଙ୍କ ବା ୦.୫୫ ପ୍ରତିଶତ ବଢି ୨୬,୦୫୨.୬୫ ସ୍ତରରେ ବନ୍ଦ ହୋଇଛି ।

ଦୁର୍ବଳ ବୈଶ୍ୱିକ ସଂକେତ ସତ୍ତ୍ୱେ ଭାରତୀୟ ବଜାର ଚମତ୍କାର ପ୍ରଦର୍ଶନ କରିଛି । ସବୁଠୁ ଅଧିକ ବୃଦ୍ଧି ଆଇଟି ସେକ୍ଟରରେ ଦେଖିବାକୁ ମିଳିଛି । ନିଫ୍ଟି ଆଇଟି ଇଣ୍ଡେକ୍ସରେ ୨.୯୬ ପ୍ରତିଶତ ବୃଦ୍ଧି ରେକର୍ଡ ହୋଇଛି । ଏହି ବୃଦ୍ଧି ଇନଫୋସିସର ପ୍ରାୟ ୧୮ ହଜାର କୋଟିର ସେୟାର ବାୟବ୍ୟାକ୍ ଘୋଷଣା ପରେ ଦେଖିବାକୁ ମିଳିଛି ।

ବିଏସଇରେ ତାଲିକାଭୁକ୍ତ କମ୍ପାନିଗୁଡ଼ିକର ମୋଟ ମାର୍କେଟ୍ କ୍ୟାପ୍ ଆଜି ବଢି ୪୭୫.୬୪ ଲକ୍ଷ କୋଟି ଟଙ୍କା ହୋଇଛି । ପୂର୍ବ କାରବାର ଦିନ ଏହା ୪୭୪.୬୨ ଲକ୍ଷ କୋଟି ଟଙ୍କା ଥିଲା । ଏହିପରି ବିଏସଇରେ ସୂଚୀବଦ୍ଧ କମ୍ପାନିଗୁଡ଼ିକର ମାର୍କେଟ୍ କ୍ୟାପ୍ ଆଜି ପ୍ରାୟ ୧.୦୨ ଲକ୍ଷ କୋଟି ଟଙ୍କା ବଢିଛି । ଅନ୍ୟ ଶବ୍ଦରେ କହିବାକୁ ଗଲେ ନିବେଶକଙ୍କୁ ୧.୦୨ ଲକ୍ଷ କୋଟି ଟଙ୍କା ଲାଭ ହୋଇଛି ।

ବିଏସଇ ସେନସେକ୍ସର ୩୦ ମଧ୍ୟରୁ ୨୦ ସେୟାର ଆଜି ସବୁଜ ସଂକେତରେ ଅର୍ଥାତ୍ ଉପରକୁ ଉଠି ବନ୍ଦ ହୋଇଛି । ଏଥିରେ ଏଚସିଏଲ୍ ସେୟାରରେ ୪.୩୨ ପ୍ରତିଶତର ସର୍ବାଧିକ ବୃଦ୍ଧି ହୋଇଛି । ସେପଟେ ସେନସେକ୍ସର ଅନ୍ୟ ୧୦ ସେୟାର ଲାଲ୍ ସଂକେତରେ ବନ୍ଦ ହୋଇଛି । ଏଥିରେ ଟାଟା ମୋଟର୍ସ ପାସେଞ୍ଜର୍ସ ଭେଇକଲ୍ ସେୟାର ୨.୭୯ ପ୍ରତିଶତ ହ୍ରାସ ସହ ଟପ୍ ଲୁଜର୍ସ ହୋଇଛି ।