‘ମୋତେ କ୍ଷମା କରି ଦେବ ମାଆ, ମୁଁ ତୁମ ମନ ଭାଙ୍ଗିଛି’, ୧୦ମ ଶ୍ରେଣୀ ଛାତ୍ରଙ୍କ ଆତ୍ମହତ୍ୟା ମାମଲାରେ ସ୍କୁଲ ବାହାରେ ଆନ୍ଦୋଳନ

ନୂଆଦିଲ୍ଲୀ: ଦିଲ୍ଲୀର ରାଜେନ୍ଦ୍ର ପ୍ଲେସ୍ ମେଟ୍ରୋ ଷ୍ଟେସନ ପ୍ଲାଟଫର୍ମରୁ ଡେଇଁ ୧୬ ବର୍ଷୀୟ ଦଶମ ଶ୍ରେଣୀ ଛାତ୍ରଙ୍କ ଆତ୍ମହତ୍ୟା ଘଟଣାରେ ଲୋକଙ୍କ ମଧ୍ୟରେ ଆକ୍ରୋଶ ବଢିଛି । ଛାତ୍ର ଜଣକ ଆତ୍ମହତ୍ୟା କରିବା ପୂର୍ବରୁ ଏକ ହାତ ଲେଖା ସୁଇସାଇଡ୍ ନୋଟ୍ ଛାଡ଼ି ଯାଇଛନ୍ତି, ଯେଉଁଥିରେ ସେ ତାଙ୍କ ଶିକ୍ଷକଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ନେବା ପାଇଁ କହିଛନ୍ତି ।

ଛାତ୍ର ଜଣକ ନଭେମ୍ୱର ୧୮ରେ ଘରରୁ ସ୍କୁଲ ଯାଇଥିବା ବେଳେ ଷ୍ଟେସନ ନିକଟରୁ ତାଙ୍କ ମୃତ ଦେହ ମିଳିଥିଲା । ପୋଲିସ ଛାତ୍ର ଜଣକର ସ୍କୁଲ ବ୍ୟାଗରୁ ହାତ ଲେଖା ନୋଟ୍ ଉଦ୍ଧାର କରିଥିଲା । ଯେଉଁଥିରେ ଉଲ୍ଲେଖ କରାଯାଇଥିଲା ଯେ ସ୍କୁଲରେ ନିର୍ଯାତନା ସହି ନପରି ଏପରି ଚରମ ନିଷ୍ପତ୍ତି ନେଉଛନ୍ତି । ନୋଟ୍ରେ ଲେଖାଅଛି, ଏପରି କରିଥିବାକୁ ମୁଁ ଦୁଃଖିତ, କିନ୍ତୁ ସ୍କୁଲର ଷ୍ଟାଫ୍ ଅନେକ କଥା କହିଛନ୍ତି, ଯେଉଁଥି ପାଇଁ ମୁଁ ଏପରି କରୁଛି । ଯଦି ମୋର କୌଣସି ଅଙ୍ଗ କାମ କରିବା ସ୍ଥିତିରେ ଥାଏ, ତେବେ ଯାହାକୁ ଦରକାର ଥିବ ତାଙ୍କୁ କାହାକୁ ଦାନ କରିଦେବେ । ମୋର ବାପା, ମାଆ ମୋ ପାଇଁ ଅନେକ କିଛି କରିଛନ୍ତି । ମୁଁ ସେମାନଙ୍କୁ କିଛି ଦେଇ ପାରିଲି ନାହିଁ, ସେଥିପାଇଁ ମୁଁ ଦୁଃଖିତ । ମୋ ଭାଇ ମୋତେ କ୍ଷମା କରିଦେବୁ, ମୁଁ ରାଗି ଥିଲି । ମାଆ ଅନେକ ଥର ମୁଁ ତୁମର ମନ ଭାଙ୍ଗିଛି, ଏବେ ଶେଷ ଥର ପାଇଁ ଭାଙ୍ଗୁଛି, କ୍ଷମା କରିଦେବ ।

ସେ ଆହୁରି ମଧ୍ୟ କହିଲେ, "ସ୍କୁଲ ଶିକ୍ଷକମାନେ ଏବେ ବି ଅଛନ୍ତି । ମୁଁ ସେମାନଙ୍କୁ କ'ଣ କହିବି ? ମୋର ଶେଷ ଇଚ୍ଛା ସେମାନଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯାଉ । ଫଳରେ ମୁଁ ଯାହା କରୁଛି, ଅନ୍ୟ କୌଣସି ଛାତ୍ର କରିବେ ନାହିଁ । ମୁଁ ଦୁଃଖିତ, କିନ୍ତୁ ଶିକ୍ଷକମାନେ ମୋ ସହିତ ଏପରି କରିଥିଲେ ।" ଛାତ୍ରଙ୍କ ବାପା ଦେଇଥିବା ଏତଲା ଅନୁଯାୟୀ, ଛାତ୍ରଟି ଶିକ୍ଷକମାନଙ୍କ ଦ୍ୱାରା ନିର୍ଯାତନା ଯୋଗୁଁ ଗମ୍ଭୀର ମାନସିକ ଚାପରେ ରହୁଥିଲା ।

ବାପା ଅଭିଯୋଗ କରିଛନ୍ତି ଯେ ତାଙ୍କ ପୁଅ କେତେକ ଶିକ୍ଷକଙ୍କ ବିଷୟରେ ବାରମ୍ବାର ଅଭିଯୋଗ କରୁଥିଲା । ସେମାନେ ଛୋଟ ଛୋଟ କଥାରେ ତାକୁ ଗାଳି, ଅପମାନ ଏବଂ ମାନସିକ ଯନ୍ତ୍ରଣା ଦେଉଥିଲେ । ସ୍କୁଲ କର୍ତ୍ତୃପକ୍ଷଙ୍କ ପାଖରେ ଅନେକ ମୌଖିକ ଅଭିଯୋଗ ସତ୍ତ୍ୱେ ତାହା ବନ୍ଦ ହୋଇନଥିବା ଏଫଆଇଆରରେ ଉଲ୍ଲେଖ କରାଯାଇଛି ।

ମୃତ୍ୟୁ ଖବର ଶୁଣି ଛାତ୍ର ଏବଂ ଅଭିଭାବକମାନେ ସ୍କୁଲ ବାହାରେ ଏକାଠି ହୋଇ ଅଭିଯୁକ୍ତଙ୍କ ବିରୁଦ୍ଧରେ କାର୍ଯ୍ୟାନୁଷ୍ଠାନ ଦାବି କରିଥିଲେ । ପୋଲିସ କହିଛି ଯେ ସେମାନେ ସୁଇସାଇଡ୍ ନୋଟରେ କରାଯାଇଥିବା ଦାବି ଏବଂ ଏଫଆଇଆରରେ ଥିବା ଅଭିଯୋଗଗୁଡ଼ିକର ତଦନ୍ତ କରୁଛନ୍ତି ।