ଶିମିଳିପାଳ ଟାଇଗର ରିଜର୍ଭରେ ପ୍ରଥମ ପର୍ଯ୍ୟାୟ ବ୍ୟାଘ୍ର ଗଣନା, ୧୦୩ ବିଟ୍‌ରେ ୧୦୩ ପ୍ରଶିକ୍ଷିତ ସର୍ଭେ ଦଳ ନିୟୋଜିତ

ବାରିପଦା୧୫।୧୧: ଓଡ଼ିଶାର ପ୍ରସିଦ୍ଧ ଶିମିଳିପାଳ ଟାଇଗର ରିଜର୍ଭରେ ସର୍ବଭାରତୀୟ ବାଘ ଗଣନା-୨୦୨୬ ଆରମ୍ଭ ହୋଇଛି । ଜାତୀୟ ବାଘ ସଂରକ୍ଷଣ ପ୍ରାଧିକରଣ (ଏନଟିସିଏ)ର ପ୍ରୋଟୋକଲ୍ ଅନୁଯାୟୀ, ଏହି ଗଣନା ଟାଇଗର ରିଜର୍ଭ ସ୍ତରରେ ଦୁଇଟି ପର୍ଯ୍ୟାୟରେ ପରିଚାଳିତ ହେବ । ପ୍ରଥମ ପର୍ଯ୍ୟାୟ ୩ ଦିନିଆ ମାଂସାହାରୀ ପ୍ରାଣୀ ଏବଂ ବଡ଼ ଧରଣର ଶାକାହାରୀ ପ୍ରାଣୀଙ୍କ ଚିହ୍ନ ସର୍ଭେ, ୪ ଦିନିଆ ଲାଇନ୍ ଟ୍ରାନଜେକ୍ଟ ଏବଂ ଗୋଟିଏ ଦିନ ଶାଗୁଣା ଓ ଅନ୍ୟାନ୍ୟ ପକ୍ଷୀ ପ୍ରଜାତିର ଗଣନା କରାଯିବ ।

ଶନିବାର ଠାରୁ ଶିମିଳିପାଳ ଦକ୍ଷିଣ ବିଭାଗରେ ଏହି ପ୍ରଥମ ପର୍ଯ୍ୟାୟ କାର୍ଯ୍ୟ ଆରମ୍ଭ ହୋଇଛି । ଏଥିପାଇଁ ୧୦୩ଟି ବିଟ୍ରେ ୧୦୩ଟି ପ୍ରଶିକ୍ଷିତ ସର୍ଭେ ଦଳ ନିୟୋଜିତ ହୋଇଛନ୍ତି । ଏହି ପର୍ଯ୍ୟାୟ ୨୨ ନଭେମ୍ବର ପର୍ଯ୍ୟନ୍ତ ଚାଲିବ ଏବଂ ଏହା ମାଧ୍ୟମରେ ମାଂସାହାରୀ ପ୍ରାଣୀଙ୍କ ଅଞ୍ଚଳ ଏବଂ ଶାକାହାରୀ ପ୍ରାଣୀଙ୍କ ଘନତ୍ୱ ଗଣନା କରାଯିବ ।

ସେହିପରି ଡିସେମ୍ବର ମାସ ଠାରୁ ତୃତୀୟ ପର୍ଯ୍ୟାୟ ବ୍ୟାପକ କ୍ୟାମେରା ଲଗାଯିବ । ଏଥିରେ ଟାଇଗର ରିଜର୍ଭର ୧୩୨୧ଟି ଗ୍ରୀଡ୍ (ପ୍ରତ୍ୟେକ ୨ବର୍ଗ କି.ମି.)ରେ ବ୍ୟାପକ କ୍ୟାମେରା ଟ୍ରାପିଂ କରାଯିବ । ଏଥିପାଇଁ ପ୍ରାୟ ୧୫୦୦ କ୍ୟାମେରା ଟ୍ରାପ୍ ଦୁଇଟି ଚକ୍ରରେ (ପ୍ରତ୍ୟେକ ଚକ୍ର ୨୫ ଦିନିଆ) ନିୟୋଜିତ ହେବ । ଏହି ଗଣନା ବାଘ ସଂରକ୍ଷଣ ପାଇଁ ଗୁରୁତ୍ୱପୂର୍ଣ୍ଣ ହୋଇଥିବା ବେଳେ ସିମିଳିପାଳର ଜୈବ ବିବିଧତା ସମ୍ପର୍କରେ ନୂଆ ତଥ୍ୟ ପ୍ରଦାନ କରିବ ବୋଲି ଶିମିଳିପାଳ ବ୍ୟାଘ୍ର ପ୍ରକଳ୍ପ ଅଧିକାରୀ ମାନେ ଆଶା କରିଛନ୍ତି ।