Delhi Blast: ଅଲ୍-ଫଲାହ ବିଶ୍ୱବିଦ୍ୟାଳକୁ କେଉଁଠୁ ଆସୁଥିଲା ଫଣ୍ଡିଂ, ତଦନ୍ତ କରିବ ED; NAAC ମଧ୍ୟ ପଠାଇଲା ନୋଟିସ

ନୂଆଦିଲ୍ଲୀ: ଦିଲ୍ଲୀର ଲାଲକିଲ୍ଲା ନିକଟରେ ସୋମବାର ସଂଧ୍ୟାରେ ହୋଇଥିବା କାର୍ ବିସ୍ଫୋରଣ ସାରା ଦେଶକୁ ଦୋହଲାଇ ଦେଇଛି । ଏହି ବିସ୍ଫୋରଣରେ ୧୩ ଜଣଙ୍କ ମୃତ୍ୟୁ ହୋଇଥିବା ବେଳେ ୨୪ ଜଣ ଆହତ ହୋଇଥିଲେ । ଏହି ବିସ୍ଫୋରଣ ପରେ ହରିୟାଣାର ଫରିଦାବାଦ ସ୍ଥିତ ଅଲ୍-ଫଲାହ ବିଶ୍ୱବିଦ୍ୟାଳୟ ସନ୍ଦେହ ଘେରକୁ ଆସିଛି । ବିଶ୍ୱବିଦ୍ୟାଳୟ ସହ ଜଡିତ ଡାକ୍ତରଙ୍କ ଗିରଫଦାରୀ ପରେ କେନ୍ଦ୍ର ସରକାର ଏବେ ୟୁନିଭର୍ସିଟିର ଫଣ୍ଡିଂ ଉତ୍ସ ଓ ବିତ୍ତୀୟ ନେଣ-ଦେଣ ଉପରେ ଅଧିକ ଯାଞ୍ଚ ପାଇଁ ନିର୍ଦ୍ଦେଶ ଦେଇଛନ୍ତି ।

ଏନଡିଟିଭି ରିପୋର୍ଟ ଅନୁସାରେ, ସରକାର ଅଲ୍-ଫଲହା ବିଶ୍ୱବିଦ୍ୟାଳୟକୁ ମିଳୁଥିବା ଫଣ୍ଡିଂର ଇଡି ତଦନ୍ତ ପାଇଁ ଆଦେଶ ଦେଇଛନ୍ତି । ଏହି ବିଶ୍ୱବିଦ୍ୟାଳୟ ଦିଲ୍ଲୀ ବିସ୍ଫୋରଣ ଘଟଣାରେ ଗିରଫ ହୋଇଥିବା ସନ୍ଦିଗ୍ଧ ଆତଙ୍କବାଦୀଙ୍କ ମଧ୍ୟରେ ଏକ ସମ୍ପର୍କର କେନ୍ଦ୍ର ଭାବେ ସାମନାକୁ ଆସିଛି । ଏହି ସଂସ୍ଥାନରେ କଥିତ ରୂପେ ଦିଲ୍ଲୀ କାର୍ ବିସ୍ଫୋରଣର ଷଡ଼ଯନ୍ତ୍ର କରାଯାଇଥିଲା । ବିଶ୍ୱବିଦ୍ୟାଳୟର ଅତି କମରେ ୪ ଜଣ ଡାକ୍ତରଙ୍କୁ ବିସ୍ଫୋରଣ ମାମଲାରେ ଗିରଫ କରାଯାଇଛି ।

ତଦନ୍ତର ମୁଖ୍ୟ ଫୋକୋସ୍ ବିଶ୍ୱବିଦ୍ୟାଳୟର ଫଣ୍ଡିଂ ଉପରେ କେନ୍ଦ୍ରିତ । ଏତେ ବଡ଼ ଆତଙ୍କୀ ମଡ୍ୟୁଲର ପର୍ଦ୍ଦାଫାସ୍ ହେବା ପରେ ଅନେକ ପ୍ରଶ୍ନ ଉଠୁଛି । ବିଶ୍ୱବିଦ୍ୟାଳୟ କ୍ୟାମ୍ପସକୁ କଟ୍ଟରପନ୍ଥୀ ଗତିବିଧି ପାଇଁ ବ୍ୟବହାର କରାଯାଉଥିଲା କି ? ତଦନ୍ତକାରୀ ଏଜେନ୍ସି ସନ୍ଦେହ କରୁଛି ଯେ ବିଦେଶୀରୁ ଫଣ୍ଡିଂ ହୋଇପାରେ, ଯାହାକୁ କଥିତ ରୂପେ ଏକ ନେଟୱାର୍କ ଜରିଆରେ ଏକାଠି କରାଯାଇଛି । ସେପଟେ ଲାଲକିଲ୍ଲା ନିକଟରେ ବିସ୍ଫୋରଣରେ ବ୍ୟବହୃତ ସାମଗ୍ରୀ କିଣିବା ପାଇଁ ୨୬ ଲକ୍ଷ ଟଙ୍କାରୁ ଅଧିକ ରାଶି ଏକାଠି କରାଯାଇଥିଲା ।

ଜଣେ ଅଧିକାରୀ କହିଛନ୍ତି ଯେ ଚାରି ସନ୍ଦିଗ୍ଧ- ମୁଦାମ୍ମିଲ ଗନଇ, ଅଦିଲ ଅହମ୍ମଦ, ସାହିନ ସଇଦ ଓ ଉମର ନବୀକୁ ମିଶି ଏହି ଅର୍ଥ ରାଶି ଏକାଠି କରିଥିଲେ । ଏହି ଟଙ୍କାକୁ ସୁରକ୍ଷିତ ରଖିବା ଓ ପରିଚାଳନା ପାଇଁ ଉମରକୁ ଦାୟିତ୍ୱ ଦିଆଯାଇଥିଲା । ଜମ୍ମୁ କାଶ୍ମୀର ପୁଲୱାମାର ବାସିନ୍ଦା ଏବଂ ଅଲ୍ ଫଲାହ ବିଶ୍ୱବିଦ୍ୟାଳୟର ସହାୟକ ପ୍ରଫେସର ଡାକ୍ତର ଉମର ଲାଲକିଲ୍ଲା ବିସ୍ଫୋରଣରରେ ବ୍ୟବହୃତ ହ୍ୟୁଣ୍ଡାଇ i20 କାର ଚଲାଉଥିଲା ।

ସେପଟେ ଏନଏଏସି ଅଲ-ଫଲାହ ବିଶ୍ୱବିଦ୍ୟାଳୟକୁ ନିଜ ୱେବସାଇଟରେ ଭୁଲ ମାନ୍ୟତା ପ୍ରଦର୍ଶିତ କରିବା ଉପରେ କାରଣ ଦର୍ଶାଅ ନୋଟିସ୍ ଜାରି କରିଛି । ଅଧିକାରୀମାନେ ଗୁରୁବାର ଏହି ସୂଚନା ଦେଇଛନ୍ତି । କାରଣ ଦର୍ଶାଅ ନୋଟିସରେ ଏନଏଏସି କହିଛି, ଅଲ-ଫଲାହ ବିଶ୍ୱବିଦ୍ୟାଳୟ, ମାନ୍ୟତା ପ୍ରାପ୍ତ ନୁହେଁ, ଏବଂ ସେ ଏନଏନନସି ଦ୍ୱାରା ମାନ୍ୟତା ପାଇଁ ଆବେଦନ ବି କରି ନାହିଁ । ସେ ନିଜ ୱେବସାଇଟରେ ସାର୍ବଜନୀନ ଭାବେ ପ୍ରଦର୍ଶନ କରିଛି ଯେ ଅଲ-ଫଲାହ ବିଶ୍ୱବିଦ୍ୟାଳୟ ଅଲ୍-ଫଲାହ ଚାରିଟେବୁଲ ଟ୍ରଷ୍ଟର ଏକ ପ୍ରୟାସ, ଯାହା ପରିସରରେ ତିନି କଲେଜ ପରିଚାଳନା କରୁଛି ।