ଏନଡିଏ ବିଜୟର ବିନ୍ଧାଣୀ ଧର୍ମେନ୍ଦ୍ର : ବଳିଷ୍ଠ ନେତୃତ୍ୱ ଆଗରେ ହାର୍ ମାନିଲେ କଂଗ୍ରେସ-ଆରଜେଡି

ପାଟନା, ୧୫|୧୧: ଫଳାଫଳ ପୁରା ଅପ୍ରତ୍ୟାଶିତ । ଫେଲ୍ ମାରିଲା ଏଗଜିଟ୍ ପୋଲ ଗଣିତ । ଆଶାଠାରୁ ଅଧିକ ଆସନରେ ବିଜୟୀ ହେଲା ଏନଡିଏ । ମାଟି କାମୁଡିଲେ ବିରୋଧୀ ମହାଗଠବନ୍ଧନ । ବିହାରରେ ପ୍ରଥମ ଥର ପାଇଁ ଏତେ ବଡ ଦୁର୍ଦ୍ଦଶାର ସାମ୍ନା କଲା ଲାଲୁ ଯାଦବଙ୍କ ଆରଜେଡି । ତେବେ ବିଜେପିର ଚକ୍ରବ୍ୟୁହରେ ଫସି ଯାଇଥିଲେ ମହାଗଠବନ୍ଧନ ନେତା ଏବଂ ପ୍ରାର୍ଥୀ । ଆଉ ଏହି ଚକ୍ରବ୍ୟୁହକୁ ରଚନା କରିଥିଲେ ବିହାର ବିଜୟର ବିନ୍ଧାଣୀ ସାଜିଥିବା କେନ୍ଦ୍ରମନ୍ତ୍ରୀ ତଥା ଓଡିଆ ପୁଅ ଧର୍ମେନ୍ଦ୍ର ପ୍ରଧାନ । ନିଜେ ସେନାପତି ସାଜି ବିରୋଧୀଙ୍କୁ ଦେଇଥିଲେ ମାତ୍ । ପୁଣି ଥରେ ନିଜକୁ ଦକ୍ଷ ଏବଂ ରାଜନୈତିକ ଗୋଟି ଚାଳନାରେ ମାହିର ବୋଲି ପ୍ରମାଣିତ କରିଥିଲେ । ଯାହାକୁ ନେଇ ଭାରତୀୟ ଜନତା ପାର୍ଟିର ଏତେ ବଡ ସଫଳତା ପଛରେ ଧର୍ମେନ୍ଦ୍ରଙ୍କ ହାତ ଥିବା କୁହାଯାଉଛି ।

ବିଜେପି ପାଇଁ ଖୁବ୍ ଗୁରୁତ୍ବପୂର୍ଣ୍ଣ ଥିଲା ବିହାର ବିଧାନସଭା ନିର୍ବାଚନ । ଯାହାକୁ ହାତଛଡା କରିବାକୁ ଚାହୁଁନଥିଲେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଗୃହମନ୍ତ୍ରୀ ଅମିତ ଶାହ । ନିର୍ବାଚନରେ ବିଜୟୀ ହେବାକୁ ନିଜର ସବୁଠୁ ଦକ୍ଷ ଯୋଦ୍ଧା ଧର୍ମେନ୍ଦ୍ର ପ୍ରଧାନଙ୍କୁ ପ୍ରଭାରୀ କରି ପଠାଇଥିଲେ ବିହାର । ଯାହା ଏନଡିଏ ବିଜୟ ପାଇଁ ଏକ ଗୁରୁତ୍ୱପୂର୍ଣ୍ଣ ରଣନୀତି ଥିଲା । ଓଡିଆ ପୁଅ ଧର୍ମେନ୍ଦ୍ର ଏହାକୁ ସୂଚାର ରୂପେ ସମ୍ପାଦନ କରିଥିଲେ । ନିଜ ପରାକାଷ୍ଠା ଏବଂ ଦକ୍ଷତାକୁ ପୁଣି ଥରେ ପ୍ରମାଣିତ କରିଥିଲେ ।

୨୦୧୦ରେ ପ୍ରଥମ ଥର ପାଇଁ ଧର୍ମେନ୍ଦ୍ରଙ୍କୁ ବିହାରର ପ୍ରଭାରୀ ଭାବେ ଦାୟିତ୍ୱ ମିଳିଥିଲା । ଏହାପରେ ୨୦୧୪ରେ ତାଙ୍କ ନେତୃତ୍ୱରେ ବିହାରରେ ରାଜନୈତିକ ଦୃଶ୍ୟପଟ୍ଟରେ ପରିବର୍ତ୍ତନ ହୋଇଥିଲା । ଲୋକସଭା ନିର୍ବାଚନରେ ବାଜିମାତ୍ କରିଥିଲେ ଏନଡିଏର ୩୧ ପ୍ରାର୍ଥୀ । ୨୦୧୫ରେ ମଧ୍ୟ ସେ ନିର୍ବାଚନ ପ୍ରଭାରୀ ନିଯୁକ୍ତ ହୋଇଥିଲେ । ୨୦୨୫ରେ ତାଙ୍କ ଉପରେ ପୁଣି ଆସ୍ଥାପ୍ରକଟ କରିଥିଲେ ବିଜେପି ନେତୃବୃନ୍ଦ ।

ବିହାର ସହ ରହିଛି ଧର୍ମେନ୍ଦ୍ରଙ୍କ ପୁରୁଣା ସମ୍ପର୍କ । ୨୦୧୨ରୁ ୨୦୧୮ ଯାଏଁ ସେ ବିହାରରୁ ରାଜ୍ୟସଭା ସଦସ୍ୟ ଭାବେ ନିର୍ବାଚିତ ହୋଇଥିଲେ । ଫଳରେ ବିହାର ରାଜନୀତିକୁ ସେ ଭଲଭାବେ ବୁଝିପାରିଥିଲେ । ଚଳିତ ଥର ଏନଡିଏର ସଫଳତା ପଛରେ ଓଡିଆ ପୁଅଙ୍କ ଯୋଜନାବଦ୍ଧ ରଣନୀତି, ସଠିକ ସମନ୍ୱୟ ଏବଂ ଜନତାଙ୍କ ସହ ଯୋଡି ହେବାର ଦକ୍ଷତା ମୁଖ୍ୟ ଭୂମିକା ଗ୍ରହଣ କରିଥିଲା । ନେତାଙ୍କୁ ଏକାଠି କରି ଚାଲିବା ଭଳି ଗୁଣ ଦଳକୁ ଏକସୂତ୍ରରେ ବାନ୍ଧି ରଖିପାରିଥିଲା । କ୍ରାଏସିସ୍ ମ୍ୟାନେଜମେଣ୍ଟ ସହ ଟ୍ରବୁଲସୁଟର ଭାବେ ସେ ପରିଗଣିତ ହୋଇଥିଲେ ।

କେବଳ ବିଜେପି ନେତା ଏବଂ କାର୍ଯ୍ୟକର୍ତ୍ତା ନୁହେଁ, ଏନଡିଏର ସହଯୋଗୀ ଦଳ ତଥା ଜେଡିୟୁ, ଏଲଜେପି, ଏଚଏଏମ, ଆରଏଲଏମର ଶୀର୍ଷ ନେତୃବୃନ୍ଦଙ୍କ ସହ ଧର୍ମେନ୍ଦ୍ରଙ୍କ ଭଲ ସମ୍ପର୍କ ରହିଛି । ଯାହା ଏନଡିଏର ବିଜୟ ମାର୍ଗକୁ ପ୍ରଶସ୍ଥ କରିଥିଲା । ବିହାର ନିର୍ବାଚନର ପ୍ରଭାରୀ ଘୋଷଣା ପରେ ସେ ବୁଥ୍ ଏବଂ ଜିଲ୍ଲା ସ୍ତରରେ ଦଳକୁ ମଜବୁତ କରିଥିଲେ । ସବୁ ବର୍ଗଙ୍କ ସହ ଆଲୋଚନା କରି ସେମାନଙ୍କ ମତକୁ ଗ୍ରହଣ କରୁଥିଲେ । ଯାହା ତାଙ୍କୁ ଲୋକାଭିମୁଖି କରିପାରିଥିଲା । ଦଳରେ ଥିବା ଅସନ୍ତୁଷ୍ଟ ନେତାଙ୍କୁ ବୁଝାଇବାଠୁ ଆରମ୍ଭ କରି ସରକାରଙ୍କ କାର୍ଯ୍ୟକୁ ଲୋକଙ୍କ ନିକଟରେ ପହଁଚାଇବାରେ ଧର୍ମେନ୍ଦ୍ର ମୁଖ୍ୟ ଭୁମିକା ଗ୍ରହଣ କରିଥିଲେ ।

କେବଳ ବିହାର ନୁହେଁ ପୂର୍ବରୁ କର୍ଣ୍ଣାଟକ ରାଜନୈତିକ ସଙ୍କଟ ବେଳେ ଦଳ ପାଇଁ ସଙ୍କଟମୋଚକ ସାଜିଥିଲେ ଧର୍ମେନ୍ଦ୍ର । ୨୦୨୧ରେ ଉତ୍ତର ପ୍ରଦେଶର ସେ ପ୍ରଭାରୀ ଦାୟିତ୍ୱରେ ଥିଲେ । ଯାହା ସେଠାରେ ବିଜେପିକୁ ବିପୁଳ ବହୁମତ ଦେଇଥିଲା । ସେହିବର୍ଷ ପଶ୍ଚିମବଙ୍ଗର ନନ୍ଦୀଗ୍ରାମରେ ମମତା ବାନାର୍ଜୀଙ୍କ ପରାଜୟ ପଛରେ ଧର୍ମେନ୍ଦ୍ରଙ୍କ ରଣନୀତି ବଡ ଭୂମିକା ଗ୍ରହଣ କରିଥିଲା । ୨୦୨୪ରେ ହରିୟାଣାରେ ବିଜେପିର ସରକାର ଗଠନରେ ଧର୍ମେନ୍ଦ୍ରଙ୍କ ହାତ ରହିଥିଲା । ଅନେକ ଚ୍ୟାଲେଞ୍ଜପୂର୍ଣ୍ଣ ସ୍ଥିତି ସତ୍ତ୍ୱେ ସେ ବିଜେପିକୁ ଐତିହାସିକ ବିଜୟ ଦେଇଥିଲେ ।