ବରଗଡ଼ ଧନୁଯାତ୍ରା, କଂସ ଚୟନରୁ ବାଦ୍ ପଡ଼ିଲେ ହୃଷୀକେଶ ଭୋଇ ଓ ଆର୍ତ୍ତତ୍ରାଣ ସୁନାନି

ବରଗଡ଼ ୧୩।୧୧ : ବିଶ୍ୱପ୍ରସିଦ୍ଧ ବରଗଡ଼ ଧନୁଯାତ୍ରା । ଚଳିତ ବର୍ଷର ଧନୁଯାତ୍ରା ଲାଗି କଂସ ଚୟନରୁ ବାଦ୍ ପଡ଼ିଲେ ହୃଷୀକେଶ ଭୋଇ ଓ ଆର୍ତ୍ତତ୍ରାଣ ସୁନାନି । ଉଭୟ ଚଳିତ ବର୍ଷ ଧନୁଯାତ୍ରାରେ କଂସ ଭୂମିକା ଲାଗି ଆବେଦନ କରିଥିଲେ । କିନ୍ତୁ କାଗଜପତ୍ର ଯାଞ୍ଚ ସମୟରେ ହୃଷୀକେଶ ଭୋଇଙ୍କ ନାଁରେ କେସ୍ ଚାଲୁଥିବାରୁ ଓ ଆର୍ତ୍ତତ୍ରାଣ ସୁନାନିଙ୍କ ବୟସ ପରିସୀମାରୁ ଅଧିକ ହୋଇଯାଇଛି । ତେଣୁ ଏମାନଙ୍କ ନାଁ ଚଳିତବର୍ଷ ଚୟନ ପ୍ରକ୍ରିୟାରୁ ବାଦ୍ ଦିଆଯାଇଛି ବୋଲି ଧନୁଯାତ୍ରା କମିଟି ସୁରେଶ୍ୱର ଶତପଥୀ ସୂଚନା ଦେଇଛନ୍ତି ।

ଆସନ୍ତା ମାସ ୨୪ ତାରିଖରୁ ଆରମ୍ଭ ହେବ ବିଶ୍ୱର ସର୍ବବୃହତ ମୁକ୍ତାକାଶ ରଙ୍ଗମଞ୍ଚ ବରଗଡ଼ ଧନୁଯାତ୍ରା। ୧୧ ଦିନ ବ୍ୟାପୀ ଚାଲିବାକୁ ଥିବା ଏହି ଧନୁଯାତ୍ରା ୨୦୨୬ ମସିହା ଜାନୁଆରୀ ମାସ ୩ ତାରିଖରେ ଶେଷ ହେବ। ତେବେ ଏହାପୂର୍ବରୁ କଳାକାର ଚୟନ ନେଇ ତାରିଖ ଘୋଷଣା କରାଯାଇଛି। ଚଳିତ ବର୍ଷ ଧନୁଯାତ୍ରା ପାଇଁ କଳାକାର ଚୟନ ତାରିଖ ପ୍ରକାଶ ପାଇଛି। ଯେଉଁଥିରେ କଂସ ସମେତ ଅନ୍ୟ ଚରିତ୍ର ପାଇଁ ବି ଚୟନ ହେବେ କଳାକାର। ଏଥିପାଇଁ ଅନେକ ଆଶାୟୀ ଆବେଦନ କରିଥିବା ବେଳେ ଆସନ୍ତା ୧୫ ତାରିଖରୁ ବିଭିନ୍ନ ଚରିତ୍ର ପାଇଁ କଳାକାର ଚୟନ ପ୍ରକିୟା ଆରମ୍ଭ ହେବ। ଆସନ୍ତା ୧୭ ତାରିଖ ପର୍ଯ୍ୟନ୍ତ ସ୍ଥାନୀୟ ବିଜୁ ପଟ୍ଟନାୟକ ଟାଉନ ହଲ ପରିସରରେ କଂସ ଚରିତ୍ର ପାଇଁ କଳାକର ଚୟନ କାର୍ଯ୍ୟ ଅନୁଷ୍ଠିତ ହେବ । ୧୫ ତାରିଖ ଦେବକୀ, ନାରଦ, ଚାଣୁର , ମୁଷ୍ଟିକ, ସାର୍ତ୍ତକି, ବସୁଦେବ , ଅକ୍ରୁର ଏବଂ ଉଗ୍ରସେନ, ୧୬ତାରିଖ ମହାମନ୍ତ୍ରୀ ଓ ସେନାପତି ଏବଂ ୧୭ ତାରିଖ ଦିନ ମହାରାଜ କଂସ ଅଭିନୟ ପାଇଁ ସାକ୍ଷାତକାର ଅନୁଷ୍ଠିତ ହେବ। ମହାରାଜ କଂସ ଚରିତ୍ରରେ ୪୪, ମହାମନ୍ତ୍ରୀରେ ୩୩, ସେନାପତିରେ ୭୪, ଦେବକୀରେ ୧୪,ନାରଦରେ ୨୦, ଚାଣୁରରେ ୧୭, ସାର୍ତ୍ତକିରେ ୧୦, ମୁଷ୍ଟିକରେ ୧୮, ବସୁଦେବରେ ୩୦, ଅକ୍ରୁରରେ ୨୦, ଉଗ୍ରସେନରେ ୧୧ ତଥା ସମୁଦାୟ ୨୯୧ କଳାକାର ଚୟନରେ ଅଂଶଗ୍ରହଣ କରିବେ। ଆବେଦନକର୍ତ୍ତା ନିଜ ଭୂମିକା ପାଇଁ ସେହି ତାରିଖରେ ପୂର୍ବାହ୍ନ ୯ଟା ୩୦ ମିନିଟରେ ବିଜୁ ପଟ୍ଟନାୟକ ଟାଉନ ହଲରେ ପହଞ୍ଚିବାକୁ ସୂଚନା ଦିଆଯାଇଛି।