US-India trade deal: ଭାରତ ଋଷ ତେଲ କିଣିବା ବନ୍ଦ କରିବା ଖବର ନେଇ ଆସିଲା ମସ୍କୋର ପ୍ରତିକ୍ରିୟା: କ’ଣ କହିଲେ ପୁଟିନ ସରକାର?

ମସ୍କୋ: US-India trade deal, ଗତକାଲି ଭାରତ ଓ ଆମେରିକା ମଧ୍ୟରେ ବାଣିଜ୍ୟ ଚୁକ୍ତି ନେଇ ଘୋଷଣା କରିଥିଲେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ। ଏବଂ କହିଥିଲେ ଭାରତ ଋଷ ଠାରୁ ତେଲ କିଣିବା ବନ୍ଦ କରି ଆମେରିକା ଠାରୁ ଅଧିକ କିଣିବ। ଏହାପରେ ସବୁଆଡ଼େ ଚର୍ଚ୍ଚା ଆରମ୍ଭ ହୋଇଯାଇଥିଲା।

ଘଟଣାକୁ ନେଇ ଋଷରେ ଆଲୋଚନା ପର୍ଯ୍ୟାଲୋଚନା ଜାରି ରହିଥିବା ବେଳେ ମଙ୍ଗଳବାର ମସ୍କୋ ପକ୍ଷରୁ ଏନେଇ ପ୍ରତିକ୍ରିୟା ଆସିଛି। ଆମେ ଭାରତ ଠାରୁ ଏଭଳି କୌଣସି କଥା ଏପର୍ଯ୍ୟନ୍ତ ଶୁଣି ନାହୁଁ ବୋଲି ମସ୍କୋ କହିଛି। ମଙ୍ଗଳବାର ସାମ୍ବାଦିକ ସମ୍ମିଳନୀରେ ମସ୍କ କହିଛି ଯେ ରୁଷୀୟ ତୈଳ କ୍ରୟ ବନ୍ଦ କରିବା ସମ୍ପର୍କରେ ଭାରତ ପକ୍ଷରୁ କୌଣସି ସରକାରୀ ବିବୃତ୍ତି ଆମକୁ ମିଳି ନାହିଁ। ଏବଂ ମସ୍କ ନୂଆଦିଲ୍ଲୀ ସହିତ ଏହାର ରଣନୈତିକ ସହଭାଗୀତା ବିକଶିତ କରିବାକୁ ଚାହୁଁଛି ବୋଲି ଋଷିଆ କହିଛି।

ଗତକାଲି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଟ୍ରୁଥ ଶୋସାଲ୍ରେ ପୋଷ୍ଟ କରି ଭାରତ ଆମେରିକା ଡିଲ୍ ସମ୍ପର୍କରେ ସୂଚନା ଦେଇଥିଲେ। ଏବଂ ବଡ଼ ଅହଂକାରର ସହିତ କହିଥିଲେ ଯେ ଭାରତ ଋଷ ତେଲ କିଣିବା ବନ୍ଦ କରିବା ସର୍ତ୍ତରେ ଏହି ଡିଲ୍ କରାଯାଇଛି। ପ୍ରଧାନମନ୍ତ୍ରୀ ମୋଦିଙ୍କ ପ୍ରତି ବନ୍ଧୁତା ଏବଂ ସମ୍ମାନ ହେତୁ ଏବଂ ତାଙ୍କ ଅନୁରୋଧ ଅନୁସାରେ ଏହି ଚୁକ୍ତିକୁ ସେ ମଞ୍ଜୁରି ଦେଇଛନ୍ତି।

ଭାରତ ଓ ଆମେରିକା ମଧ୍ୟରେ ଟ୍ରେଡ୍ ଡିଲ୍ ନେଇ ବର୍ଷାଧିକ କାଳ ଅସାମଞ୍ଜସ୍ୟ ଲାଗି ରହିଥିବା ବେଳେ ସୋମବାର ଡିଲ୍ ଫାଇନାଲ ନେଇ ଘୋଷଣା ହୋଇଥିଲା। ଟ୍ରମ୍ପ ତାଙ୍କ ପୋଷ୍ଟରେ ଲେଖିଥିଲେ “ ଭାରତ ଋଷ ତେଲ କିଣିବା ବନ୍ଦ କରି ଆମେରିକା ଠାରୁ ଅଧିକ କିଣିବାକୁ ରାଜି ହୋଇଛି।”

ଏହି ଘଟଣା ପରେ କ୍ରେମଲିନ୍ ମୁଖପାତ୍ର ଦିମିତ୍ରୀ ପେସକୋଭ୍ କହିଛନ୍ତି ଯେ ରୁଷ ଭାରତ ସହିତ ସମ୍ପର୍କ ଉପରେ ଟ୍ରମ୍ପଙ୍କ ମନ୍ତବ୍ୟକୁ ଭଲଭାବରେ ବିଶ୍ଳେଷଣ କରୁଛି। ଭାରତ ରୁଷ ତେଲ କିଣିବା ବନ୍ଦ କରିବାକୁ ନିଷ୍ପତ୍ତି ନେଇଛି କି ନାହିଁ ତାହା ସିଧାସଳଖ ପଚରାଯିବାରୁ ସେ ଉତ୍ତର ଦେଇ କହିଛନ୍ତି "ଏପର୍ଯ୍ୟନ୍ତ, ଆମେ ଏହି ପ୍ରସଙ୍ଗରେ ନୂଆଦିଲ୍ଲୀରୁ କୌଣସି ବିବୃତ୍ତି ପାଇ ନାହୁଁ। ଆମେ ଭାରତ-ଆମେରିକା ଦ୍ୱିପାକ୍ଷିକ ସମ୍ପର୍କକୁ ସମ୍ମାନ କରୁଛୁ। କିନ୍ତୁ ଆମେ ରୁଷ ଏବଂ ଭାରତ ମଧ୍ୟରେ ଏକ ଉନ୍ନତ ରଣନୈତିକ ସହଭାଗୀତା ବିକାଶକୁ କମ୍ ଗୁରୁତ୍ୱ ଦେଉ ନାହୁଁ। ଏହା ଆମ ପାଇଁ ସବୁଠାରୁ ଗୁରୁତ୍ୱପୂର୍ଣ୍ଣ। ଏବଂ ଆମେ ଦିଲ୍ଲୀ ସହିତ ଆମର ଦ୍ୱିପାକ୍ଷିକ ସମ୍ପର୍କକୁ ଆହୁରି ବିକଶିତ କରିବାକୁ ଚାହୁଁଛୁ।"

୨୦୨୨ ମସିହାରେ ୟୁକ୍ରେନ୍ ଓ ଋଷ ମଧ୍ୟରେ ଯୁଦ୍ଧ ଆରମ୍ଭ ହେବା ପରେ ଭାରତ ଋଷ ଠାରୁ ବହୁ ପରିମାଣରେ ସମୁଦ୍ରଜାତ ଅଶୋଧିତ ତୈଳ କିଣୁଥିଲା। ରିହାତି ମୂଲ୍ୟରେ ମିଳୁଥିବାରୁ ଏହା ଦେଶ ପାଇଁ ହିତକର କହି ଭାରତ ଋଷୀୟ ତୈଳ କିଣିବାର ଅନ୍ୟ ଦେଶମାନଙ୍କ ତୁଳନାରେ ଟପ୍ରେ ରହିଥିଲା। ଯାହାକୁ ନେଇ ପଶ୍ଚିମ ଦେଶଗୁଡ଼ିକ ଭାରତକୁ ଘେରିବା ଆରମ୍ଭ କରିଥିଲେ। ଭାରତ ଋଷ ଠାରୁ ତେଲ କିଣି ଯୁଦ୍ଧ ପାଇଁ ପାଣ୍ଠି ଯୋଗାଉଛି ବୋଲି ସେମାନେ ଅଭିଯୋଗ କରିଥିଲେ।

ଋଷ ଠାରୁ ତେଲ କିଣୁଥିବା ଅଭିଯୋଗ କରି ଆମେରିକା ଭାରତ ଉପରେ ଅତିରିକ୍ତ ୨୫% ଶୁଳ୍କ ଲଗାଇଥିଲା। ଜବାବୀ ଶୁଳ୍କ ସହ ଦଣ୍ଡାତ୍ମକ ଶୁଳ୍କ ଲଗାଇବା ପରେ ଭାରତ ଉପରେ ୫୦ ପ୍ରତିଶତ ଶୁଳ୍କ ହୋଇଥିଲା। ହେଲେ ଏବେ ଡିଲ୍ ଫାଇନାଲ୍ ହେବା ପରେ ଏହି ଶୁଳ୍କ ୧୮%କୁ ଖସି ଆସିଛି।

ଆମେରିକା ସହ ବାଣିଜ୍ୟ ଡିଲ୍ ହେବା ପରେ ଟ୍ରମ୍ପ କହିଛନ୍ତି “ ଆମେରିକା ଏବଂ ସମ୍ଭବତଃ ଭେନେଜୁଏଲାରୁ ବହୁତ ଅଧିକ ମାତ୍ରାରେ ତେଲ କିଣିବାକୁ ସେ(ମୋଦୀ) ରାଜି ହୋଇଛନ୍ତି। ଏହା ୟୁକ୍ରେନରେ ବର୍ତ୍ତମାନ ଚାଲିଥିବା ଯୁଦ୍ଧର ଅନ୍ତ କରିବାରେ ସାହାଯ୍ୟ କରିବ, ଯେଉଁଠାରେ ପ୍ରତି ସପ୍ତାହରେ ହଜାର ହଜାର ଲୋକ ମୃତ୍ୟୁବରଣ କରୁଛନ୍ତି।”