ଅଳଙ୍କାର ଦୋକାନରେ ହିଜାବ-ହେଲମେଟ୍ ପିନ୍ଧିବା ଉପରେ ପ୍ରତିବନ୍ଧକ, ଚେହେରା ଲୁଚାଇଲେ ଫସିବେ !

ପାଟନା: ଆପଣ ଯଦି ହିଜାବ୍ କିମ୍ବା ଓଢ଼ଣୀ ପିନ୍ଧି ଅଳଙ୍କାର କିଣିବାକୁ ଯୋଜନା କରୁଛନ୍ତି, ତେବେ ଏହି ଖବର ପଢ଼ନ୍ତୁ । କୌଣସି ଅଳଙ୍କାର ଦୋକାନରୁ ଆପଣ ହିଜାବ୍ କିମ୍ବା ଓଢ଼ଣୀ ପିନ୍ଧି ଅଳଙ୍କାର କିଣିପାରିବେ ନାହିଁ ।

ହିଜାବ ନୁହେଁ, ଆପଣଙ୍କୁ ଓଢ଼ଣୀ, ନିକାବ କିମ୍ବା ହେଲମେଟ ପିନ୍ଧି ଅଳଙ୍କାର କିଣିବାକୁ ମଧ୍ୟ ବାରଣ କରାଯିବ। ଅଲ୍ ଇଣ୍ଡିଆ ଜୁଏଲର୍ସ ଆଣ୍ଡ୍ ଗୋଲ୍ଡ ଫେଡେରେସନ ଏଥିପାଇଁ ଏକ ନିର୍ଦ୍ଦେଶନାମା ଜାରି କରିଛି।

ବିହାର ଏପରି ବ୍ୟବସ୍ଥା କାର୍ଯ୍ୟକାରୀ କରିଛି । ଦେଶର ଅନ୍ୟ କିଛି ରାଜ୍ୟରେ ମଧ୍ୟ ସମାନ ବ୍ୟବସ୍ଥା କରାଯାଇଛି । ଅନେକ ଅଳଙ୍କାର ଦୋକାନ ସମାନ ନୋଟିସ ପୋଷ୍ଟ କରିଛନ୍ତି । ଯେଉଁଥିରେ କୁହାଯାଇଛି ଯେ, ଅଳଙ୍କାର ଦୋକାନରେ ମାସ୍କ, ହେଲମେଟ, ବୁର୍ଖା କିମ୍ବା ନିକାବ ପିନ୍ଧିବା ନିଷେଧ ।

ଅଳଙ୍କାର ମହାସଂଘର ରାଜ୍ୟ ସଭାପତି ଅଶୋକ କୁମାର ବର୍ମା କହିଛନ୍ତି ଯେ, ସମ୍ପ୍ରଦାୟ ନିର୍ବିଶେଷରେ ଅଳଙ୍କାର ବ୍ୟବସାୟ ସହିତ ଜଡିତ ସମସ୍ତ ଲୋକ ତାଙ୍କର ସଦସ୍ୟ।ଅଳଙ୍କାର ବ୍ୟବସାୟୀଙ୍କ ସୁରକ୍ଷା ପାଇଁ ଏହି ନିଷ୍ପତ୍ତି ନିଆଯାଇଛି। ଯଦି କେହି ଅପରାଧ କରନ୍ତି, ତେବେ ସେମାନଙ୍କୁ ତୁରନ୍ତ ଗିରଫ କରାଯାଇପାରିବ । ସେଥିପାଇଁ ଆମେ ପ୍ରଶାସନକୁ ମଧ୍ୟ ସହଯୋଗ କରୁଛୁ।

ହେଲମେଟ, ହିଜାବ, ନିକାବରେ ମୁହଁ ଘୋଡ଼ାଇଥିବା ମହିଳା କିମ୍ବା ପୁରୁଷମାନଙ୍କୁ ଆଉ ଦୋକାନ ଭିତରକୁ ପ୍ରବେଶ କରିବାକୁ ଅନୁମତି ଦିଆଯିବ ନାହିଁ ବୋଲି ସେ ସ୍ପଷ୍ଟ କରିଛନ୍ତି । ରାଜ୍ୟରେ ଏପରି ଅନେକ ଘଟଣା ଘଟିଛି । ମୁହଁ ଲୁଚାଇ ଦୋକାନରେ ପ୍ରବେଶ କରି ଡକାୟତି କରିଛନ୍ତି ଡକାୟତ । ଦୋକାନଗୁଡ଼ିକରେ ଲାଗିଥିବା ସିସିଟିଭି କ୍ୟାମେରାରେ ମଧ୍ୟ ସେମାନଙ୍କ ମୁହଁ ଚିହ୍ନଟ କରାଯାଇ ପାରୁନାହିଁ ।

ବର୍ତ୍ତମାନ ସମୟରେ ସୁନା ଏବଂ ରୁପା ବହୁତ ମୂଲ୍ୟବାନ । ତେଣୁ ସୁରକ୍ଷା ଅତ୍ୟନ୍ତ ଜରୁରୀ । ଅଶୋକ କୁମାର ବର୍ମା କହିଛନ୍ତି ଯେ, ଏହି ନିଷ୍ପତ୍ତି କେବଳ ତାଙ୍କ ନିଜ ସୁରକ୍ଷା ପାଇଁ ନୁହେଁ ବରଂ ପ୍ରଶାସନ ସହିତ ସହଯୋଗ କରିବା ପାଇଁ ନିଆଯାଇଛି। ଏହି ନୂତନ ନିୟମ ଜାନୁଆରୀ ୮ ତାରିଖରୁ କାର୍ଯ୍ୟକାରୀ ହେବ ବୋଲି ସୂଚନା ମିଳିଛି। ଏହା ପରେ, କ୍ରେତାମାନେ ମୁହଁ ଘୋଡ଼ାଇ ଦୋକାନରେ ପ୍ରବେଶ କରିପାରିବେ ନାହିଁ।