T 20 World Cup: ଟସ୍ ଜିତି ପାକିସ୍ତାନର ବୋଲିଂ ନିଷ୍ପତ୍ତି, ଦୁଇଟି ପରିବର୍ତ୍ତନ ସହ ପଡ଼ିଆକୁ ଓହ୍ଲାଇବ ଭାରତ

କଲୋମ୍ବୋ: ଭାରତ ଓ ପାକିସ୍ତାନ ମଧ୍ୟରେ ମହାମୁକାବିଲାକୁ ଆଉ କିଛି ସମୟ ପରେ ଆରମ୍ଭ ହେବ। ମୁକାବିଲା କଲୋମ୍ବୋର ପ୍ରେମଦାସା ଷ୍ଟାଡିୟମରେ ଖେଳାଯିବ। ମ୍ୟାଚରେ ଦୁଇ ଦଳର ପ୍ରତିଷ୍ଠା ବାଜିରେ ଲାଗିଛି। ଟି-୨୦ ବିଶ୍ଵକପ୍ ୨୦୨୬ର ଏହି ମ୍ୟାଚ୍ ଉପରେ ସାରା ଦୁନିଆର ନଜର। ମ୍ୟାଚରେ ଟସ୍ ଜିତି ପାକିସ୍ତାନ ବୋଲିଂ କରିବାକୁ ନିଷ୍ପତ୍ତି ନେଇଛି। ଆଉ ପ୍ରଥମେ ବ୍ୟାଟିଂ କରିବ ଭାରତ। ଭାରତୀୟ ଦଳର ଚୂଡାନ୍ତ ଏକାଦଶରେ ଦୁଇଟି ପରିବର୍ତ୍ତନ ଘଟିଛି। ପାକିସ୍ତାନ ଦଳରେ କୌଣସି ପରିବର୍ତ୍ତନ ଘଟି ନାହିଁ।

ଭାରତ ଆଶା ଅନୁଯାୟୀ ଦୁଇଟି ପରିବର୍ତ୍ତନ ସହ ପଡ଼ିଆକୁ ଓହ୍ଲାଇଛି। ସୁସ୍ଥ ହେବା ପରେ ଅଭିଷେକ ଶର୍ମା ଚୂଡ଼ାନ୍ତ ଏକାଦଶକୁ ଫେରିଛନ୍ତି। ଆଉ ସଞ୍ଜୁ ସାମସନଙ୍କୁ ବେଞ୍ଚରେ ବସିବାକୁ ପଡ଼ିଛି। ଅନ୍ୟପଟେ ପରିବେଶ, ପିଚ୍ ଓ ଷ୍ଟାଡିୟମକୁ ଦୃଷ୍ଟିରେ ରଖି କୁଲଦୀପ ଯାଦବଙ୍କ ଚୂଡ଼ାନ୍ତ ଏକାଦଶରେ ଏଣ୍ଟ୍ରି ହୋଇଛି। ଅର୍ଶଦୀପ ସିଂଙ୍କୁ ଆଜି ବାହାରେ ବସିବାକୁ ପଡ଼ିଛି। ​​​​​​​

ଭାରତ- ପାକ ମୁକାବିଲା ସର୍ବଦା ଆଇସିସି ଟୁର୍ଣ୍ଣାମେଣ୍ଟର ମୁଖ୍ୟ ଆକର୍ଷଣ ସାଜୁଥିଲେ ହେଁ ଏଥର ଅନେକ ବିବାଦ ଯୋଡ଼ି ହୋଇଥିବାରୁ ଉଭୟ ଦେଶର ସମର୍ଥକଙ୍କ ଭାବନା ଓ ଉତ୍ସାହ ମ୍ୟାଚ୍ର ରୋମାଞ୍ଚକୁ ସ୍ୱତନ୍ତ୍ର କରିଛି । ଟି-ଟ୍ୱେଣ୍ଟି ବିଶ୍ୱକପରେ ଭାରତ ୭-୧ରେ ଆଗୁଆ ରହିଛି । ଆଜି ମଧ୍ୟ ଡିଫେଣ୍ଡିଂ ଚାମ୍ପିଅନ୍ ଦଳର ଆଧିପତ୍ୟ ଜାରି ରହିବା ଏକ ପ୍ରକାର ନିଶ୍ଚିତ । ତଥାପି ପାକିସ୍ତାନ କଡ଼ା ଟକ୍କର ଦେବାକୁ ପ୍ରସ୍ତୁତ ।

ଗତ ଏସିଆ କପରେ ଉଭୟ ଦଳ ୩ଥର ସାମ୍ନା ସାମ୍ନି ହୋଇଥିଲେ ଓ ଭାରତ ସମସ୍ତ ମ୍ୟାଚ୍ ଜିତିଥିଲା । ପ୍ରତ୍ୟେକ ମ୍ୟାଚରେ ପାକିସ୍ତାନ ଜୋରଦାର ଲଢ଼େଇ କରିଥିଲା । ତେଣୁ ପାକିସ୍ତାନକୁ ଦୁର୍ବଳ ଭାବିବା ଭାରି ପଡ଼ିବ । ଉଭୟ ଦଳର ସ୍ପିନରଙ୍କ ପ୍ରଦର୍ଶନ ଉପରେ ମ୍ୟାଚ ଫଳାଫଳ ନିର୍ଭର କରିବ ବୋଲି ମତ ପ୍ରକାଶ ପାଉଛି । ତେଣୁ ଭାରତର ବରୁଣ ଚକ୍ରବର୍ତ୍ତୀ ଓ ପାକିସ୍ତାନର ଉସମାନ ତାରିକ ନଜରରେ ରହିଛନ୍ତି ।

ଶ୍ରୀଲଙ୍କାରେ ୨ଟି ମ୍ୟାଚ ଖେଳି ସାରିଥିବା ପାକିସ୍ତାନ ମଧ୍ୟ ୪ ଜଣ ସ୍ପିନରଙ୍କୁ ନିୟୋଜିତ କରୁଛି । ଭାରତ ମଧ୍ୟ ଅତିରିକ୍ତ ସ୍ପିନର ଭାବେ କୁଲଦୀପ ଯାଦବଙ୍କୁ ସୁଯୋଗ ଦେଇଛି। ଅଭିଷେକ ଶର୍ମା ସୁସ୍ଥ ହୋଇ ଅଭ୍ୟାସ ଆରମ୍ଭ କରିଥିବାରୁ ତାଙ୍କର ଦଳକୁ ପ୍ରତ୍ୟାବର୍ତ୍ତନ ଘଟିଛି।ମାତ୍ର ତାଙ୍କ ଅପେକ୍ଷା ଇଶାନ କିଶନଙ୍କୁ ନେଇ ପାକିସ୍ତାନ ଚିନ୍ତାରେ ରହିବ । ଭାରତୀୟ ବୋଲର ମଧ୍ୟ ପାକିସ୍ତାନ ଓପନର ସାହିବଜାଦା ଫରହାନଙ୍କ ପାଇଁ ସ୍ୱତନ୍ତ୍ର ରଣନୀତି ପ୍ରସ୍ତୁତ କରିବେ।

ଭାରତୀୟ ଦଳ

ଅଭିଷେକ ଶର୍ମା, ଇଶାନ କିଶନ(ଓ୍ଵିକେଟ୍ କିପର), ତିଳକ ବର୍ମା, ସୂର୍ଯ୍ୟକୁମାର(ଅଧିନାୟକ), ହାର୍ଦ୍ଦିକ ପାଣ୍ଡ୍ୟା, ଶିବମ ଦୁବେ, ରିଙ୍କୁ ସିଂ, ଅକ୍ଷର ପଟେଲ୍, କୁଲଦୀପ ଯାଦବ, ବରୁଣ ଚକ୍ରବର୍ତ୍ତୀ, ଯଶପ୍ରୀତ ବୁମରା।
​​​​​​​​​

ପାକିସ୍ତାନ ଦଳ

ସାଇମ ଆୟୁବ, ସାହିବଜାଦା ଫରହାନ, ସଲମାନ ଆଘା(ଅଧିନାୟକ), ବାବର ଆଜମ, ମହମ୍ମଦ ନଓ୍ଵାଜ, ଉସ୍ମାନ ଖାନ(ଓ୍ଵିକେଟ୍ କିପର), ଶାଦାବ ଖାନ, ଫହୀମ ଅସ୍ରଫ, ଶାହୀନ ଆଫ୍ରିଦି, ଅବରାର ଅହମ୍ମଦ, ଉସ୍ମାନ ତାରିକ।