Amazonରେ ପୁଣି ଥରେ ବଡ଼ ଧରଣର ଛଟେଇ, ଏକା ଥରକେ ବେକାର ହୋଇଗଲେ ୧୪ ହଜାର ଲୋକ

ନୂଆଦିଲ୍ଲୀ ୩।୧୧: ଦିଗ୍ଗଜ ଇ-କମର୍ସ କମ୍ପାନୀ ଆମାଜନ ପୁଣି ଥରେ ବଡ଼ ଧରଣର କର୍ମଚାରୀ ଛଟେଇ କରିଛି। ହେଲେ ଏଥର କର୍ମଚାରୀଙ୍କୁ ଛଟେଇ କରାଯିବାର ଉପାୟ ସମସ୍ତଙ୍କୁ ଚକିତ କରିଛି। ସକାଳେ ନିଦରୁ ଉଠିବା ମାତ୍ରେ କର୍ମଚାରୀଙ୍କ ମୋବାଇଲରେ ଲାଗଲାଗ ଦୁଇଟି ମେସେଜ୍ ଆସିଥିଲା ଓ ଦେଖୁ ଦେଖୁ ହଜାର ହଜାର ଲୋକଙ୍କ ଜୀବନ ବଦଳି ଯାଇଛି। ଏହି ମେସେଜ କୌଣସି ରୁଟିନ ଆଲର୍ଟ ର ନଥିଲା ବରଂ ‘ଆପଣଙ୍କ ଚାକିରୀ ଛଟେଇ ହୋଇଯାଇଛି’ ବୋଲି ବାର୍ତ୍ତା ଥିଲା।

ଆମାଜନ ବୈଶ୍ୱିକ ସ୍ତରରେ ମୋଟ ୧୪ ହଜାର କର୍ମଚାରୀଙ୍କୁ ଚାକିରୀରୁ ଛଟେଇ କରିଛି। ସକାଳେ କର୍ମଚାରୀଙ୍କୁ ଦୁଇଟି ମେସେଜ ଆସିଥିଲା। ଏଥିରୁ ଗୋଟିକରେ ଦୟାକରି ଆପଣଙ୍କ ମେଲ ଚେକ୍ କରନ୍ତୁ ଲେଖାଥିବା ବେଳେ ଅନ୍ୟଟିରେ ହେଲପ୍ ଡ଼େସ୍କ ନମ୍ବର ଦିଆଯାଇଥିଲା। କର୍ମଚାରୀ ମେଲ ଖୋଲିବାମାତ୍ରେ ସେମାନଙ୍କ ସେବା ତତ୍କାଳ ସମାପ୍ତ କରିଦିଆଯାଇଥିବା ଜାଣିପାରିଥିଲେ। ତେବେ ସେମାନେ ଅଫିସ ପହଞ୍ଚିବା ପୂର୍ବରୁ ସେମାନଙ୍କ ବ୍ୟାଜ୍ ଓ ଲଗିନ୍ ଆକ୍ସେସ ଏଗଜିଟ୍ କରି ଦିଆ ଯାଇଥିଲା।  

ଏହି ଛଟେଇରେ ମୁଖ୍ୟତଃ ରିଟେଲ ମ୍ୟାନେଜମେଣ୍ଟ ଟିମ୍ ପ୍ରଭାବିତ ହୋଇଛି। ତେବେ କମ୍ପାନୀ ପକ୍ଷରୁ କୁହାଯାଇଛି ଯେ ବିଜନେସ୍ କୁ ସୁବ୍ୟବସ୍ଥିତ କରିବା ଓ ନୂଆ ଇନୋଭେସନ ଲାଗି ଏହି ପଦକ୍ଷେପ ନିଆଯାଇଛି। ହେଲେ ଅଚାନ ହୋଇଥିବା ଛଟେଇ କର୍ମଚାରୀଙ୍କ ମାନସିକ ସ୍ଥିତିକୁ ବିଗାଡି ଦେଇଛି। କର୍ମଚାରୀମାନେ ସୋସିଆଲ ମିଡିଆରେ ଏପରି ଛଟେଇକୁ ସବୁଠୁ ଥଣ୍ଡା ଓ ଅମାନବୀୟ ଲେଅଫ ବୋଲି କହିଛନ୍ତି।

ଆମାଜନ ଏଚଆର ମୁଖ୍ୟ ବେଥ ଗ୍ୟାଲେଟି ଇଣ୍ଟରନାଲ ମେସେଜରେ କହିଛନ୍ତି ଯେ ପ୍ରଭାବିତ କର୍ମଚାରୀଙ୍କୁ ୯୦ ଦିନ ପର୍ଯ୍ୟନ୍ତ ପୁରା ବେତନ ଓ ବେନିଫିଟ ମିଳିବ। ଏହି କର୍ମଚାରୀଙ୍କୁ ରିଟାୟାରମେଣ୍ଟ ପ୍ୟାକେଜ୍ ଓ ଜବ ପ୍ଲେସମେଣ୍ଟ ସହାୟତା ମଧ୍ୟ ଦିଆଯିବ। ସେ ଲେଖିଛନ୍ତି ଯେ ଆମେ ଜାଣିଛେ ଏହି ସମୟ ଅତ୍ୟନ୍ତ କଠିନ, ହେଲେ ଆମେ ସମସ୍ତ ପ୍ରଭାବିତ କର୍ମଚାରୀଙ୍କୁ ସହଯୋଗ କରିବୁ। ଗ୍ୟାଲେଟି ସ୍ପଷ୍ଟ ଭାବେ କହିଛନ୍ତି ଯେ ଆମାଜନର ଏହି ପଦକ୍ଷେପ କେବଳ ବ୍ୟୟ ହ୍ରାସ କରିବା ଲାଗି ନୁହେଁ ବରଂ ଏହାର ବଡ଼ କାରଣ ହେଉଛି ଆର୍ଟିଫିସିଆଲ ଇଣ୍ଟେଲିଜେନ୍ସ (ଏଆଇ) ।

ସେ କହିଛନ୍ତି ଯେ ଏଆଇ ଗ୍ରୋଥ ଆମ କାମ କରିବାର ଶୈଳୀକୁ ବଦଳେଇ ଦେଇଛି। ଏବେ ଆମେ ନୂଆ ଟେକ୍ନୋଲଜି ସହିତ ଆଗକୁ ବଢିବା ପାଇଁ ଆମ ଭିତ୍ତିଭୂମିକୁ ପୁଣି ଥରେ ତିଆରି କରିବୁ। ତେବେ ଆମାଜନ ପୂର୍ବରୁ ଗୁଗଲ, ମେଟା ଓ ଟେସ୍ଲା ଭଳି ବଡ଼ କମ୍ପାନୀମାନେ ମଧ୍ୟ କର୍ମଚାରୀଙ୍କୁ ଅଚାନକ ଏସଏମଏସ ଓ ଇ-ମେଲ ଯୋଗେ ଚାକିରୀରୁ ବାହାର କରିସାରିଛନ୍ତି। ଏବେ ଆମାଜନର ଏହି ଉପାୟ ଟେକ୍ ୱାର୍ଲଡରେ ନୂଆ ବିତର୍କ ସୃଷ୍ଟି କରିଛି।