ବିସିସିଆଇ ଭାଙ୍ଗିବ ବର୍ଷ ବର୍ଷର ପରମ୍ପରା : ଗୌହାଟୀରେ ଦେଖିବାକୁ ମିଳିବ ନୂଆ ନିୟମ

ନୂଆଦିଲ୍ଲୀ, ୧୮|୧୧: ଦକ୍ଷିଣ ଆପ୍ରିକା ବିପକ୍ଷ କୋଲକାତା ଟେଷ୍ଟରେ ୩୦ ରନରେ ପରାସ୍ତ ହୋଇଛି ଭାରତ । ଯାହାକୁ ନେଇ ଦଳକୁ ସମାଲୋଚନା କରାଯାଉଛି । ୧୨୪ ରନର ବିଜୟ ଲକ୍ଷ୍ୟ ଟିମ୍ ଇଣ୍ଡିଆ ଚେଜ୍ କରିପାରିନଥିଲା । ମାତ୍ର ୯୩ ରନରେ ସବୁ ବ୍ୟାଟର ପ୍ୟାଭିଲିୟନ ଚାଲି ଯାଇଥିଲେ । ୧୫ ବର୍ଷ ପରେ ଭାରତରେ ଟେଷ୍ଟ ମ୍ୟାଚ୍ ଜିତିଥିଲା ଦକ୍ଷିଣ ଆଫ୍ରିକା । ଏହି ବିଜୟ ସହ ଦଳ ୧-୦ରେ ସିରିଜରେ ଆଗୁଆ ରହିଛି । ଏବେ ଭାରତ ସିରିଜକୁ ବରାବର କରିବା ପାଇଁ ସବୁ କଳ ବଳ ପ୍ରୟୋଗ କରିବ ।

ଉଭୟ ଦଳ ମଧ୍ୟରେ ଶେଷ ତଥା ଦ୍ୱିତୀୟ ଟେଷ୍ଟ ଗୌହାଟୀରେ ଖେଳାଯିବ । ମୁକାବିଲାରେ ଟାଇମିଂକୁ ନେଇ ବଡ ପରିବର୍ତ୍ତନ କରାଯାଇଛି । କୋଲକାତା ଟେଷ୍ଟ ଭାରତୀୟ ସମୟାନୁସାରେ ସକାଳ ୯ଟା ୩୦ରେ ଆରମ୍ଭ ହୋଇଥିଲା । କିନ୍ତୁ ଗୌହାଟୀରେ ସକାଳ ୯ଟାକୁ ମ୍ୟାଚ୍ ଖେଳାଯିବ । ଉତ୍ତରପୂର୍ବ ଭାରତରେ ସୂର୍ଯ୍ୟୋଦୟ ଏବଂ ସୂର୍ଯ୍ୟାସ୍ତ ଶୀଘ୍ର ହେଉଥିବାରୁ ବିସିସିଆଇ ସମୟରେ ପରିବର୍ତ୍ତନ କରିଛି ।

ନଭେମ୍ବର ୨୨ରେ ଗୈହାଟୀରେ ସକାଳ ୮ଟା୩୦ରେ ଟସ୍ ହେବ । ପ୍ରଥମ ବଲ ୯ଟାକୁ ପଡିବ । ପ୍ରଥମ ସେସନ ୯ରୁ ୧୧ ଟା ଯାଏଁ ହେବ । ଏହା ପରେ ୨୦ ମିନିଟ୍ ଟି ବ୍ରେକ୍ ହେବ । ସେହିପରି ଦ୍ୱିତୀୟ ସେସନ ୧୧ଟା ୨୦ରୁ ୧. ୨୦ ଯାଏଁ ରହିବ । ଦ୍ୱିତୀୟ ସେସନ ପରେ ୪୦ ମିନିଟ୍ ପାଇଁ ଲଞ୍ଚ୍ ବ୍ରେକ୍ ହେବ । ପୁଣି ଦିନ ୨ଟାରୁ ସନ୍ଧ୍ୟା ୪ଟା ଯାଏଁ ଶେଷ ସେସନ ଖେଳାଯିବ । ଯଦି ନିର୍ଧାରିତ ସମୟରେ ସମସ୍ତ ଓଭର ନ ସରିବ ତାହାଲେ ଖେଳକୁ ଆଉ ୩୦ ମିନିଟ୍ ବୃଦ୍ଧି କରାଯିବ । ଅର୍ଥାତ ଆବଶ୍ୟକ ହେଲେ ୪ଟା ୩୦ରେ ମ୍ୟାଚ୍ ସରିବ ।

ଏହା ପ୍ରଥମ ଥର ପାଇଁ ହେଉଛି ଯେତେବେଳେ ପ୍ରଥମେ ଟି ବ୍ରେକ୍ ଏବଂ ପରେ ଲଂଚ୍ ବ୍ରେକ୍ ନିଆଯିବ । ଅର୍ଥାତ ବର୍ଷ ବର୍ଷର ପରମ୍ପରା ଭାଙ୍ଗିବାକୁ ଯାଉଛି । ବିସିସିଆଇ ସଚିବ ଦେବଜିତ ସୌକିୟା କହିଛନ୍ତି ଯେ, ପାଣିପାଗକୁ ଦେଖି ନିଷ୍ପତ୍ତି ନିଆଯାଇଛି । ଉତ୍ତର ପୂର୍ବରୁ ସୂର୍ଯ୍ୟାସ୍ତ ଏବଂ ସୂର୍ଯ୍ୟୋଦୟ ଶୀଘ୍ର ହୋଇଥାଏ । ସନ୍ଧ୍ୟା ୪ଟାରେ ଆଲୋକ କମିଯାଏ । ତେଣୁ ଅଧିକ ଖେଳିବା ସମ୍ଭବପର ନୁହେଁ । ତେଣୁ ମ୍ୟାଚକୁ ୯ଟାରେ ଆରମ୍ଭ କରାଯିବ ବୋଲି ସେ କହିଛନ୍ତି ।