'କ୍ରିକେଟ୍ ଠାରୁ ଅଧିକ କାହାକୁ ଭଲ ପାଏ ନାହିଁ', ପଲାଶଙ୍କ ସହ ବିବାହ ଭାଙ୍ଗିବା ପରେ ସ୍ମୃତି ମନ୍ଧାନାଙ୍କ ପ୍ରଥମ ବୟାନ

ନୂଆଦିଲ୍ଲୀ: ଷ୍ଟାର କ୍ରିକେଟର ସ୍ମୃତି ମନ୍ଧାନା ଭାରତ ପାଇଁ ଖେଳିବାର ୧୨ ବର୍ଷରୁ ଅଧିକ ହୋଇଛି । ଏହି ସମୟ ମଧ୍ୟରେ, ସେ ଅନୁଭବ କରିଛନ୍ତି ଯେ କ୍ରିକେଟଠାରୁ ଅଧିକ ବିଶ୍ୱରେ ଆଉ କିଛି ପସନ୍ଦ କରନ୍ତି ନାହିଁ । ଭାରତର କିମ୍ବଦନ୍ତୀ ବାମହାତୀ ବ୍ୟାଟର ମନ୍ଧାନା ବୁଧବାର ୨୦୧୩ରେ ଡେବ୍ୟୁ କରିବା ଠାରୁ ବିଶ୍ୱକପ୍ ବିଜୟରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିବା ପର୍ଯ୍ୟନ୍ତ ତାଙ୍କ ଯାତ୍ରା ବିଷୟରେ କହିଛନ୍ତି । ଗୀତିକାର ପଲାଶ ମୁଛଲଙ୍କ ସହ ବିବାହ ଭାଙ୍ଗିବା ପରେ ପ୍ରଥମ ଥର ପାଇଁ ଏକ କାର୍ଯ୍ୟକ୍ରମରେ ଯୋଗ ଦେଇଥିଲେ ମନ୍ଧାନା ।

ସ୍ମୃତି ମନ୍ଧାନା ‘ଆମାଜନ ସମ୍ଭବ ସମ୍ମିଳନୀ’ରେ କହିଛନ୍ତି, "ମୁଁ ଭାବୁନାହିଁ ଯେ ମୁଁ କ୍ରିକେଟ୍ ବ୍ୟତୀତ ଆଉ କିଛି ଭଲ ପାଏ । ଭାରତୀୟ ଜର୍ସି ପିନ୍ଧିବା ଆମର ସବୁଠାରୁ ବଡ଼ ପ୍ରେରଣା । ଆପଣ ନିଜର ସମସ୍ତ ଚିନ୍ତାକୁ ଗୋଟିଏ ପଟେ ଦେଖନ୍ତି ଓ ଏହା ହିଁ ଆପଣଙ୍କୁ ଜୀବନ ଉପରେ ଧ୍ୟାନ ଦେବାରେ ସାହାଯ୍ୟ କରେ ।"

ମନ୍ଧାନା କହିଛନ୍ତି ଯେ ସେ ତାଙ୍କ ସ୍ୱପ୍ନକୁ ନେଇ ସ୍ପଷ୍ଟ ଥିଲେ । ସେ କହିଛନ୍ତି "ପିଲାଦିନୁ ମୁଁ ବ୍ୟାଟିଂ ପାଇଁ ପାଗଳ ଥିଲି । କେହି ବୁଝି ପାରୁନଥିଲେ, କିନ୍ତୁ ସବୁବେଳେ ମୋ ମନରେ ଥିଲା ଯେ ମୁଁ ବିଶ୍ୱ ବିଜେତା ବୋଲାଇବି ।" ମନ୍ଧାନା କହିଛନ୍ତି ଯେ ଏହି ଟ୍ରଫି ଦଳର ଦୀର୍ଘ ସଂଘର୍ଷର ଫଳାଫଳ । ଏହି ବିଶ୍ୱକପ୍ ଆମେ ବର୍ଷ ବର୍ଷ ଧରି ସମ୍ମୁଖୀନ ହେଉଥିବା ସଂଘର୍ଷର ପରିଣାମ । ଆମେ ଉତ୍ସାହର ସହିତ ଏହାକୁ ଅପେକ୍ଷା କରିଥିଲୁ ।

ମନ୍ଧାନା କହିଛନ୍ତି "ମୁଁ ୧୨ ବର୍ଷରୁ ଅଧିକ ସମୟ ଧରି ଖେଳୁଛି । ଅନେକ ସମୟରେ କିଛି କିଛି ଆମ ଇଚ୍ଛା ଅନୁସାରେ ହୁଏ ନାହିଁ । ଆମେ ଫାଇନାଲ୍ ପୂର୍ବରୁ ଏହା ବିଷୟରେ ଚିନ୍ତା କରିଥିଲୁ ଏବଂ ଯେତେବେଳେ ଆମେ ଏହାକୁ ସ୍କ୍ରିନରେ ସତ ହେବାର ଦେଖିଲୁ, ଆମ ଲୋମ ଟାଙ୍କୁରି ଉଠିଥିଲା । ଏହା ଏକ ଅବିଶ୍ୱସନୀୟ ଏବଂ ସ୍ୱତନ୍ତ୍ର ମୁହୂର୍ତ୍ତ ଥିଲା ।" ମନ୍ଧାନା କହିଛନ୍ତି, ଫାଇନାଲରେ ମିତାଲି ରାଜ ଏବଂ ଝୁଲଣ ଗୋସ୍ୱାମୀଙ୍କ ଉପସ୍ଥିତି ଆହୁରି ଅଧିକ ଭାବପ୍ରବଣ କରିଥିଲା ।

ମନ୍ଧାନା କହିଛନ୍ତି, "ଆମେ ସତରେ ସେମାନଙ୍କ ପାଇଁ ଏହା ଜିତିବାକୁ ଚାହୁଁଥିଲୁ । ସେମାନଙ୍କ ଆଖିରେ ଲୁହ ଦେଖି, ଏପରି ଅନୁଭବ ହେଲା ଯେମିତି ପୂରା ମହିଳା କ୍ରିକେଟ୍ ଜିତୁଛି । ଏହା ସେମାନଙ୍କର ବିଜୟ ଥିଲା ।" ମନ୍ଧାନା କହିଛନ୍ତି, ଏହି ବିଶ୍ୱକପ୍ ଦୁଇଟି ଗୁରୁତ୍ୱପୂର୍ଣ୍ଣ ଶିକ୍ଷାକୁ ଆହୁରି ମଜଭୁତ କରିଛି । ସେ କହିଛନ୍ତି, "ପ୍ରତ୍ୟେକ ଇନିଂସ ଶୂନ୍ୟରୁ ଆରମ୍ଭ ହୁଏ, ପୂର୍ବ ଇନିଂସରେ ଆପଣ ଶତକ ମାରିଥାନ୍ତୁ ନା କାହିଁକି । କେବେବି ନିଜ ପାଇଁ ଖେଳନ୍ତୁ ନାହିଁ, ଏହି କଥା ଆମେ ପରସ୍ପରକୁ ମନେ ପକାଇ ଚାଲିଥିଲୁ ।"