ବିଶ୍ୱ ବିଜୟୀ ହରମନପ୍ରୀତ କୌରଙ୍କ ସେନାକୁ ପ୍ରଧାନମନ୍ତ୍ରୀ ଜଣାଇଲେ ଶୁଭେଚ୍ଛା, କହିଲେ...

ନୂଆଦିଲ୍ଲୀ: ବିଶ୍ୱ କ୍ରିକେଟରେ ନୂଆ ଇତିହାସ ରଚିଲେ ଭାରତୀୟ ମହିଳା କ୍ରିକେଟ୍ ଦଳ । ଟିମ୍ ଇଣ୍ଡିଆ ଦକ୍ଷିଣ ଆଫ୍ରିକାକୁ ମହିଳା ବିଶ୍ୱକପ୍ ୨୦୨୫ର ଫାଇନାଲରେ  ହରାଇ ଚାମ୍ପିଅନ ହୋଇଛି । ଭାରତର ବିଜୟରେ ପୂରା ଦେଶ ଖୁସିରେ ଝୁମି ଉଠିଛି । ଦେଶରେ ଉତ୍ସବର ମାହୋଲ ଲାଗି ରହିଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଟିମ୍ ଇଣ୍ଡିଆକୁ ଏହି ଐତିହାସିକ ବିଜୟ ନେଇ ଶୁଭେଚ୍ଛା ଜଣାଇଛନ୍ତି । ଏହି ବିଜୟକୁ ଭବିଷ୍ୟତର ଚାମ୍ପିଅନ ଖେଳାଳିଙ୍କ ପାଁ ପ୍ରେରଣାର ଉତ୍ସ ବୋଲି କହିଛନ୍ତି । 
ପ୍ରଧାନମନ୍ତ୍ରୀ ଏକ୍ସରେ ଲେଖିଛନ୍ତି, ଆଇସିସି ମହିଳା କ୍ରିକେଟ୍ ବିଶ୍ୱକପ ୨୦୨୫ର ଫାଇନାଲରେ ଭାରତୀୟ ଦଳର ଚମତ୍କାର ବିଜୟ । ଫାଇନାଲରେ ଦଳର ପ୍ରଦର୍ଶନ ଅଦ୍ଭୁତ କୌଶଳ ଓ ଆତ୍ମ ବିଶ୍ୱାସରେ ଭରି ରହିଥିଲା । ଦଳ ପୂରା ଟୁର୍ଣ୍ଣାମେଣ୍ଟର ଅସାଧାରଣ ଦଳଗତ ଖେଳ ଓ ଦୃଢତା ଦେଖାଇଛନ୍ତି । ଆମର ଖେଳାଳିଙ୍କୁ ଅଭିନନ୍ଦନ । ଏହି ଐତିହାସିକ ବିଜୟ ଭବିଷ୍ୟତର ଚାମ୍ପିଅନ ଖେଳାଳିଙ୍କୁ କ୍ରୀଡାରେ ଭାଗ ନେବା ପାଇଁ ପ୍ରେରିତ କରିବ ।
ନଭି ମୁମ୍ବାଇର ଡିୱାଇ ପାଟିଲ ଷ୍ଟାଡିୟମରେ ଖେଳାଯାଇଥିବା ଫାଇନାଲରେ ପ୍ରଥମେ ବ୍ୟାଟିଂ କରିଥିବା ଭାରତ ୨୯୮ ରନ କରିଥିଲା । ଜବାବରେ ଦକ୍ଷିଣ ଆଫ୍ରିକା ୪୫.୩ ଓଭରରେ ୨୪୬ ରନରେ ଅଲଆଉଟ୍ ହୋଇଛି । ୫୨ ବର୍ଷର ପ୍ରତୀକ୍ଷା ପରେ ଭାରତ ଚାମ୍ପିଅନ ହେବା ସହ ଇତିହାସ ରଚିଛି । ପରାଜୟ ସହ ପ୍ରଥମ ଥର ବିଶ୍ୱକପ୍ ଫାଇନାଲ୍ ଖେଳିଥିବା ଦକ୍ଷିଣ ଆଫ୍ରିକା ମହିଳା ଦଳର ବିଶ୍ୱକପ୍ ଜିତିବା ସ୍ୱପ୍ନ ଭାଙ୍ଗି ଯାଇଛି । ଅନ୍ୟପଟେ କପିଲ ଦେବ ଓ ମହେନ୍ଦ୍ର ସିଂ ଧୋନୀଙ୍କ କ୍ଲବରେ ସାମିଲ ହୋଇଛନ୍ତି ହମରନପ୍ରୀତ କୌର । 
ଭାରତର ବିଜୟରେ ହିରୋ ସାଜିଛନ୍ତି ଶେଫାଳି ବର୍ମା ଓ ଦୀପ୍ତି ଶର୍ମା । ଯିଏ ବିଶ୍ୱକପ ଦଳରେ ଆଦୌ ନ ଥିଲେ । ପ୍ରତୀକା ରାୱଲ ଆହତ ହେବାରୁ ଶେଫାଳିଙ୍କୁ ସେମିରେ ଦଳରେ ସାମିଲ୍ କରାଯାଇଥିଲା । ଆଉ ଫାଇନାଲରେ ଶେଫାଳି ବ୍ୟାଟିଂରେ ୮୭ ରନ କରିବା ସହ ବୋଲିଂରେ ୨ଟି ୱିକେଟ୍ ନେଇଛନ୍ତି । ଦୀପ୍ତି ଶର୍ମା ୫୮ ରନ କରିବା ସହ ୫ ୱିକେଟ୍ ନେଇ ଦଳ ବିଜୟରେ ପ୍ରମୁଖ ଭୂମିକା ଗ୍ରହଣ କରିଛନ୍ତି । ଦୀପ୍ତିଙ୍କ ଘାତକ ବୋଲିଂ ଯୋଗୁଁ ଭାରତୀୟ କ୍ରିକେଟ୍ ଦଳ ଇତିହାସ ରଚି ପାରିଛି ।