କୋଲକାତାରେ ଗର୍ଜିଲେ ଶାହ : ୨୦୨୬ରେ ହଟିବ ଟିଏମସି, ବିଜେପି ଗଢିବ ବିକଶିତ ପଶ୍ଚିମବଙ୍ଗ

କୋଲକାତା,୩୦/୧୨ : ପଶ୍ଚିମବଙ୍ଗରେ ଶାନ୍ତି ଫେରିବ । ଦୁର୍ନୀତି ହଟିବ । ଖୋଜି ଖୋଜି ବାଂଲାଦେଶୀଙ୍କୁ ଏଠାରୁ ବିଦା କରାଯିବ । କିଛି ଏପରି ଢଙ୍ଗରେ କୋଲକାତାରୁ ମମତା ବାନାର୍ଜୀଙ୍କୁ ଟାର୍ଗେଟ୍ କରିଛନ୍ତି କେନ୍ଦ୍ର ଗୃହମନ୍ତ୍ରୀ ଅମିତ ଶାହ । ଏହାସହ ରାଜ୍ୟରେ ୧୫ ବର୍ଷ ଧରି ଚାଲିଥିବା ଭୟ, ଭ୍ରଷ୍ଟାଚାର ଏବଂ ଅନୁପ୍ରବେଶର ଅନ୍ତ ଘଟିବ ବୋଲି ଶାହ କହିଛନ୍ତି ।

ମଙ୍ଗଳବାର ପଶ୍ଚିମବଙ୍ଗର ରାଜଧାନୀ କୋଲକାତାରେ ଶାହ ସାମ୍ବାଦିକ ସମ୍ମିଳନୀ କରିଛନ୍ତି । ଏଥିରେ ସେ ମୁଖ୍ୟମନ୍ତ୍ରୀ ମମତା ବାନାର୍ଜୀଙ୍କ ଉପରେ ବର୍ଷିଛନ୍ତି । ଶାହ କହିଛନ୍ତି ଯେ, ୨୦୨୬ରେ ବିଜେପି ସରକାର ଗଠନ ହେଲେ ଅନେକ ପରିବର୍ତ୍ତନ ହେବ । ଅନୁପ୍ରବେଶକାରୀଙ୍କୁ ବାଛି ବାଛି ବିଦା କରାଯିବ । ରାଜ୍ୟରେ ବିକାଶର ଗତି ବଢିବ । ପଶ୍ଚିମବଙ୍ଗକୁ ସାଂସ୍କୃତିକ ସ୍ତରରେ ସୁଦୃଢ କରାଯିବ ।

ସେ ଆହୁରି କହିଛନ୍ତି ଯେ, ଅନୁପ୍ରବେଶକାରୀଙ୍କ ସମସ୍ୟା କେବଳ ରାଜ୍ୟର ନୁହେଁ ଏହା ଜାତୀୟ ପ୍ରସଙ୍ଗ । ଦେଶର ସୁରକ୍ଷା ସହ ଏହା ଜଡିତ । ଦେଶର ସଂସ୍କୃତିକୁ ରକ୍ଷା କରିବାକୁ ହେଲେ ପଶ୍ଚିମବଙ୍ଗ ଦେଇଥିବା ସୀମାକୁ ସିଲ୍ କରାଯିବା ଜରୁରୀ । ଏହା ଟିଏମସି ନୁହେଁ କେବଳ ବିଜେପି କରିପାରିବ । ୨୦୨୬ ଏପ୍ରିଲ ୧୫ ପରେ ବିଜେପି ସରକାର ଗଠନ ହେବ । ଅନେକ ମହାପୁରୁଷଙ୍କ ସ୍ବପ୍ନର ବେଙ୍ଗଲ ପ୍ରତିଷ୍ଠା କରାଯିବ ବୋଲି ଜୋର ଦେଇଛନ୍ତି ଗୃହମନ୍ତ୍ରୀ ।