ମିଆଁମାରରେ ଶକ୍ତିଶାଳୀ ଭୂମିକମ୍ପ ଅନୁଭୂତ, କୋଲକାତା ବି ଥରିଲା; ତୀବ୍ରତା ୬.୦ ରେକର୍ଡ

କୋଲକାତା: ମିଆଁମାରରେ ମଙ୍ଗଳବାର ଦିନ ୬ ତୀବ୍ରତାର ଭୂମିକମ୍ପ ଅନୁଭୂତ ହୋଇଛି । କୋଲକାତା ଏବଂ ବାଂଲାଦେଶର ଅନେକ ଅଞ୍ଚଳରେ ମଧ୍ୟ ଭୂମିକମ୍ପ ହୋଇଥିବା ଜଣାପଡ଼ିଛି । ତଥ୍ୟ ଅନୁଯାୟୀ, ଭୂକମ୍ପର କେନ୍ଦ୍ରସ୍ଥଳ ମିଆଁମାରର ଆକ୍ୟାବରୁ ପ୍ରାୟ ୭୦ ମାଇଲ ପୂର୍ବରେ ଥିଲା। ଏହି ଭୂମିକମ୍ପ ଯୋଗୁଁ କୋଲକାତା ସମେତ ପଶ୍ଚିମବଙ୍ଗର ଅନେକ ସ୍ଥାନରେ କମ୍ପନ ସୃଷ୍ଟି ହୋଇଛି। କ୍ଷୟକ୍ଷତି କିମ୍ବା ଜୀବନହାନୀର କୌଣସି ରିପୋର୍ଟ ମିଳିନାହିଁ । କିନ୍ତୁ ଭୂମିକମ୍ପ କିଛି ସମୟ ପାଇଁ ଲୋକଙ୍କ ମଧ୍ୟରେ ଭୟର ବାତାବରଣ ସୃଷ୍ଟି କରିଥିଲା।

ସୂଚନା ଅନୁଯାୟୀ, ଗତ ୭୧ ଘଣ୍ଟା ମଧ୍ୟରେ ଏହା ମିଆଁମାରରେ ତୃତୀୟ ଥର ପାଇଁ ରେକର୍ଡ ହୋଇଥିବା ଭୂମିକମ୍ପ। ସୌଭାଗ୍ୟବଶତଃ, ଏପର୍ଯ୍ୟନ୍ତ କୌଣସି କ୍ଷୟକ୍ଷତିର ରିପୋର୍ଟ ନାହିଁ। ବାଂଲାଦେଶରେ ମଧ୍ୟ ଏହି ଭୂମିକମ୍ପ ଅନୁଭୂତ ହୋଇଛି । ଏହା ୨୪ ଘଣ୍ଟାରୁ କମ୍ ସମୟ ମଧ୍ୟରେ ଦ୍ୱିତୀୟ ଥର ପାଇଁ ଅନୁଭୂତ ହୋଇଛି । ନ୍ୟାସନାଲ ସେଣ୍ଟର ଫର୍ ସିସମୋଲୋଜି (NCS) ଅନୁଯାୟୀ, ମଙ୍ଗଳବାର ବାଂଲାଦେଶରେ ୪.୧ ତୀବ୍ରତାର ଏକ ଭୂମିକମ୍ପ ଅନୁଭୂତ ହୋଇଥିଲା।

ଏନସିଏସ୍ ଅନୁଯାୟୀ, ଭୂମିକମ୍ପ ପ୍ରାୟ ୧୫୦ କିଲୋମିଟର ଗଭୀରତାରେ ହୋଇଥିଲା। ବିଶେଷଜ୍ଞମାନେ କହିଛନ୍ତି ଯେ, ପ୍ରତି ୩୦ ସେକେଣ୍ଡରେ ପୃଥିବୀର କୌଣସି ନା କୌଣସି ସ୍ଥାନରେ ଭୂମିକମ୍ପ ହୁଏ । କିନ୍ତୁ ଅଧିକାଂଶ ଏତେ ଧୀର ଯେ, ସେଗୁଡ଼ିକ ଚିହ୍ନଟ ହୋଇନଥାଏ। ଡେଲି ଷ୍ଟାର ଅନୁଯାୟୀ, ୪.୦ ତୀବ୍ରତାର ଭୂମିକମ୍ପ ପ୍ରାୟ ୬ ଟନ୍ ଟିଏନଟି ବିସ୍ଫୋରଣ ସହିତ ସମାନ।

ଗତ ବର୍ଷ ମାର୍ଚ୍ଚ ମାସରେ ମିଆଁମାରରେ ଏକ ଭୟଙ୍କର ଭୂମିକମ୍ପ ହୋଇଥିଲା। ଭୂମିକମ୍ପର ତୀବ୍ରତା ୭.୭ ଥିଲା । ଫଳରେ ସୁଉଚ୍ଚ କୋଠା ସମେତ ଅନେକ ଛୋଟବଡ଼ କୋଠା ଭୁଶୁଡ଼ି ପଡ଼ିଥିଲା। ଭୂମିକମ୍ପ ଯୋଗୁଁ ଦେଶର ଅନେକ ସ୍ଥାନରେ ବିଦ୍ୟୁତ୍ ସରବରାହ ବିଚ୍ଛିନ୍ନ ହୋଇଯାଇଥିଲା ଏବଂ ପୋଲ ଓ ରାସ୍ତା ଗୁରୁତର ଭାବରେ କ୍ଷତିଗ୍ରସ୍ତ ହୋଇଥିଲା। ଭୂକମ୍ପର କେନ୍ଦ୍ରସ୍ଥଳ ସାଗାଇଙ୍ଗ ସହର ନିକଟରେ ଥିଲା। ମିଆଁମାରର ଦ୍ୱିତୀୟ ବୃହତ୍ତମ ସହର ମାଣ୍ଡାଲେ ଅଧିକ କ୍ଷତିଗ୍ରସ୍ତ ହୋଇଥିଲା । ଗଣମାଧ୍ୟମ ରିପୋର୍ଟରୁ ଜଣାପଡ଼ିଥିଲା ଯେ, ଭୂମିକମ୍ପରେ ପ୍ରାୟ ୩୫୦୦ ଲୋକଙ୍କର ମୃତ୍ୟୁ ହୋଇଥିଲା।