Jharkhand DGP: ଓଡ଼ିଶାର ଝିଅ ତଦାଶା ମିଶ୍ର ହେଲେ ଝାଡ଼ଖଣ୍ଡର ପ୍ରଥମ ମହିଳା ଡିଜିପି

ରାଞ୍ଚି: ଝାଡ଼ଖଣ୍ଡର ପ୍ରଥମ ମହିଳା ପୋଲିସ ମହାନିର୍ଦ୍ଦେଶକ (ଡିଜିପି) ଭାବରେ ଆଇପିଏସ୍ ଅଧିକାରୀ ତଦାଶା ମିଶ୍ର ଦାୟିତ୍ୱ ଗ୍ରହଣ କରିଛନ୍ତି । ଗୁରୁବାର ସରକାର ତାଙ୍କୁ କାର୍ଯ୍ୟକାରୀ ଡିଜିପି ଭାବରେ ନିଯୁକ୍ତ କରିଛନ୍ତି । ଶୁକ୍ରବାର ତଦାଶା ମିଶ୍ର ପୋଲିସ ମୁଖ୍ୟାଳୟରେ ଡିଜିପି ଭାବରେ ତାଙ୍କର ଦାୟିତ୍ୱ ଗ୍ରହଣ କରିଛନ୍ତି । ଓଡ଼ିଶା ଝିଅ ତଦାଶା ମିଶ୍ର ଏହି ଦାୟିତ୍ୱ ଗ୍ରହଣ କରିବା ପରେ ଇତିହାସ ରଚିଛନ୍ତି । ତଦାଶା ମିଶ୍ରଙ୍କ ନିଯୁକ୍ତି କେବଳ ପୋଲିସ ବିଭାଗରେ ଏକ ଗୁରୁତ୍ୱପୂର୍ଣ୍ଣ ପ୍ରଶାସନିକ ପଦକ୍ଷେପ ନୁହେଁ, ବରଂ ମହିଳା ସଶକ୍ତିକରଣ ଦିଗରେ ଏକ ମାଇଲ ଖୁଣ୍ଟ ଅଟେ ।

ଓଡ଼ିଶାରେ ଜନ୍ମିତ ତଦାଶା ମିଶ୍ର ୧୯୯୪ ବ୍ୟାଚର ଆଇପିଏସ୍ ଅଧିକାରୀ । ଝାଡ଼ଖଣ୍ଡ ରାଜ୍ୟ ଗଠନ ପରେ ସେ ଏହି କ୍ୟାଡର ଆସିଥିଲେ । ତାଙ୍କର ତିନି ଦଶନ୍ଧିର ପୋଲିସ କ୍ୟାରିୟରରେ ସେ ଅନେକ ଗୁରୁତ୍ୱପୂର୍ଣ୍ଣ ପଦରେ କାର୍ଯ୍ୟ କରିଛନ୍ତି । ବୋକାରୋର ଏସପି, ରେଲୱେ ଏଡିଜି ଓ ଗୃହ, ଜେଲ୍ ଏବଂ ବିପର୍ଯ୍ୟୟ ବିଭାଗର ସ୍ୱତନ୍ତ୍ର ସଚିବ ଭାବେ କାମ କରି ନିଜ ପ୍ରଶାସନିକ ଦକ୍ଷତାର ପରିଚୟ ଦେଇଥିଲେ । ତାଙ୍କ କାର୍ଯ୍ୟଶୈଳୀ, ସମ୍ୱେଦନଶୀଳତା ଓ ମହିଳା ସୁରକ୍ଷା ପ୍ରତି ପ୍ରତିବଦ୍ଧ ଦୃଷ୍ଟିକୋଣ ପାଇଁ ସେ ସବୁବେଳେ ଚର୍ଚ୍ଚିତ ରହିଛନ୍ତି ।

ରାଜ୍ୟ ପୋଲିସ ବ୍ୟବସ୍ଥାରେ ନୂତନ ଚିନ୍ତାଧାରା ଏବଂ ନେତୃତ୍ୱ ପାଇଁ ତାଦାଶା ମିଶ୍ରଙ୍କ ନିଯୁକ୍ତିକୁ ଏକ ସକାରାତ୍ମକ ପଦକ୍ଷେପ ଭାବରେ ଦେଖାଯାଉଛି । ଝାଡ଼ଖଣ୍ଡ ଭଳି ଏକ ଚ୍ୟାଲେଞ୍ଜିଂ ରାଜ୍ୟରେ, ଯେଉଁଠାରେ ଅପରାଧ, ନକ୍ସଲ ଏବଂ ସାମାଜିକ ଅସମାନତା ଭଳି ସମସ୍ୟା ଲାଗି ରହିଛି, ସେଠାରେ ଜଣେ ମହିଳା ଅଧିକାରୀ ଶୀର୍ଷ ପଦବୀ ଗ୍ରହଣ କରିବା ଏକ ଗୁରୁତ୍ୱପୂର୍ଣ୍ଣ ପରିବର୍ତ୍ତନ ବୋଲି ବିବେଚନା କରାଯାଉଛି  ।

ତଦାଶା ମିଶ୍ରଙ୍କ ନିଯୁକ୍ତି କେବଳ ଝାଡ଼ଖଣ୍ଡରେ ନୁହେଁ ବରଂ ସାରା ଦେଶରେ ମହିଳା ଅଧିକାରୀମାନଙ୍କୁ ପ୍ରେରଣା ଦେଇଛି । ପୋଲିସ ବିଭାଗ ଭଳି ପାରମ୍ପାରିକ ପୁରୁଷ ପ୍ରାଧାନ୍ୟ କ୍ଷେତ୍ରରେ ତାଙ୍କର ଶୀର୍ଷ ସ୍ଥାନକୁ ଉଠିବା ଏକ ନୂତନ ଉଦାହରଣ ସୃଷ୍ଟି କରିଛି । ଓଡିଶାରେ ଜନ୍ମିତ ଅଧିକାରୀଙ୍କ ସଫଳତା ରାଜ୍ୟ ପାଇଁ ମଧ୍ୟ ଗର୍ବ ଆଣିଛି ।