ଟ୍ରମ୍ପ ପ୍ରଶାସନକୁ ବଡ଼ ଝଟକା: ଆମେରିକା-ଇରାନ ଯୁଦ୍ଧକୁ ବିରୋଧ କରି ଇସ୍ତଫା ଦେଲେ ଧାର୍ମିକ ସ୍ୱାଧୀନତା କମିଟିର ଏକମାତ୍ର ମୁସଲମାନ ମହିଳା

ୱାଶିଂଟନ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କ ପ୍ରଶାସନକୁ ଏକ ବଡ଼ ଝଟକା ଲାଗିଛି। ଇରାନ ବିରୋଧରେ ଆମେରିକାର ଯୁଦ୍ଧ ଏବଂ ପାଲେଷ୍ଟାଇନ୍ ପ୍ରସଙ୍ଗକୁ ନେଇ ହ୍ୱାଇଟ୍ ହାଉସ୍ ଧାର୍ମିକ ସ୍ୱାଧୀନତା ଆୟୋଗର ଏକମାତ୍ର ମୁସଲମାନ ମହିଳା ସଦସ୍ୟ ସମୀରା ମୁନ୍ସି ନିଜ ପଦରୁ ଇସ୍ତଫା ଦେଇଛନ୍ତି। ସେ ସରକାରଙ୍କ ନୀତିକୁ ତୀବ୍ର ନିନ୍ଦା କରିବା ସହ 'ପ୍ରତିବାଦ ସ୍ୱରୂପ' ଏହି ପଦକ୍ଷେପ ନେଇଥିବା ଘୋଷଣା କରିଛନ୍ତି।

ଇସ୍ତଫାର ପ୍ରମୁଖ କାରଣ

ସୋସିଆଲ ମିଡିଆ ପ୍ଲାଟଫର୍ମ 'ଏକ୍ସ' (X) ଏବଂ ସବଷ୍ଟାକରେ ଏକ ପ୍ରବନ୍ଧ ମାଧ୍ୟମରେ ସମୀରା ନିଜ ଇସ୍ତଫାର ଦୁଇଟି ମୁଖ୍ୟ କାରଣ ଦର୍ଶାଇଛନ୍ତି:

କ୍ୟାରି ପ୍ରିଜିନ୍-ବୋଲରଙ୍କ ବହିଷ୍କାର: ପାଲେଷ୍ଟାଇନକୁ ସମର୍ଥନ କରୁଥିବାରୁ କମିଶନର କ୍ୟାରିଙ୍କୁ ପଦରୁ ହଟାଇ ଦିଆଯିବା ଘଟଣାକୁ ସେ ବିରୋଧ କରିଛନ୍ତି।

ଇରାନ ବିରୋଧରେ ଆମେରିକାର ବେଆଇନ ଯୁଦ୍ଧ: ସାମ୍ବିଧାନିକ କିମ୍ବା କଂଗ୍ରେସର ଅନୁମୋଦନ ବିନା ଇରାନ ସହ ଆରମ୍ଭ ହୋଇଥିବା ଯୁଦ୍ଧକୁ ସେ ନିନ୍ଦା କରିଛନ୍ତି।

'ସହକର୍ମୀମାନେ ମୋ ଧର୍ମକୁ ପରିହାସ କରୁଥିଲେ'

ମୁନ୍ସି ଅଭିଯୋଗ କରିଛନ୍ତି ଯେ କମିଶନର କିଛି ସଦସ୍ୟ ତାଙ୍କ ଧର୍ମକୁ ପରିହାସ କରୁଥିଲେ ଏବଂ ତାଙ୍କ ସମ୍ପ୍ରଦାୟ ପ୍ରତି ଶତ୍ରୁତା ମନୋଭାବ ପୋଷଣ କରୁଥିଲେ। ସେ କହିଛନ୍ତି ଯେ ଆମେରିକୀୟ ମୁସଲମାନମାନଙ୍କ ଅଧିକାରକୁ କ୍ଷୁଣ୍ଣ କରାଯାଉଛି। ଗୋଟିଏ ନିର୍ଦ୍ଦିଷ୍ଟ ଜିଓନିଷ୍ଟ ରାଜନୈତିକ ଏଜେଣ୍ଡାକୁ ଆଗକୁ ବଢ଼ାଇବା ପାଇଁ ଲୋକଙ୍କ ଅଭିବ୍ୟକ୍ତିର ସ୍ୱାଧୀନତା ଛଡ଼ାଇ ନିଆଯାଉଛି ଏବଂ ସେମାନଙ୍କ ଜୀବନକୁ ବିପଦରେ ପକାଯାଉଛି।

ଆମେରିକା ଟିକସଦାତାଙ୍କ ପଇସାରେ ଗଣହତ୍ୟା!

ଟ୍ରମ୍ପ ପ୍ରଶାସନର କଡ଼ା ସମାଲୋଚନା କରି ମୁନ୍ସି କହିଛନ୍ତି, "ମୁଁ ଇସ୍ରାଏଲ ଅପେକ୍ଷା ଆମେରିକାକୁ ସମର୍ଥନ କରେ। ଏହାର ଅର୍ଥ ମୁଁ ଟ୍ରମ୍ପ କିମ୍ବା ଏହି ସରକାରଙ୍କୁ ସମର୍ଥନ କରିପାରିବି ନାହିଁ।" ନିରୀହ ପାଲେଷ୍ଟାଇନୀ ଏବଂ ଇରାନୀୟମାନଙ୍କ ବିରୋଧରେ ହିଂସା ପାଇଁ ଆମେରିକୀୟ ଟିକସଦାତାଙ୍କ ଅର୍ଥ ବ୍ୟବହାର କରାଯାଉଥିବାରୁ ସେ ଗଭୀର କ୍ଷୋଭ ପ୍ରକାଶ କରିଛନ୍ତି। ନିଜର ଏହି ନିଷ୍ପତ୍ତି କୌଣସି ଭୟ କିମ୍ବା ଚାପର ବଶବର୍ତ୍ତୀ ହୋଇ ନେଇନାହାଁନ୍ତି ବୋଲି ସେ ସ୍ପଷ୍ଟ କରିଛନ୍ତି।

କମିଶନରେ ଏକଘରକିଆ ହୋଇଥିଲେ ସମୀରା

ଉଲ୍ଲେଖଯୋଗ୍ୟ ଯେ, ଗାଜାରେ ଇସ୍ରାଏଲର ଆକ୍ରମଣକୁ ଗଣହତ୍ୟା କହିବା ଏବଂ ଜିଓନିଜିମ୍ କୁ ବିରୋଧ କରିବା କାରଣରୁ ନିକଟରେ ରାଷ୍ଟ୍ରପତି ଟ୍ରମ୍ପ କମିଶନର କ୍ୟାରି ପ୍ରିଜିନ୍-ବୋଲରଙ୍କୁ ପଦରୁ ବହିଷ୍କାର କରିଥିଲେ। ସମୀରା କହିଛନ୍ତି ଯେ, ସେପ୍ଟେମ୍ବର ୨୦୨୫ ରେ ପାଲେଷ୍ଟାଇନ୍ ସପକ୍ଷରେ ସାକ୍ଷ୍ୟ ଦେବା ପରଠାରୁ ତାଙ୍କୁ ମଧ୍ୟ କମିଶନରେ ଏକଘରକିଆ କରିଦିଆଯାଇଥିଲା। ଶୁଣାଣି ପୂର୍ବରୁ ତାଙ୍କୁ ଆଉ ସାକ୍ଷୀ ତାଲିକା ଦିଆଯାଉନଥିଲା।

ଯୁଦ୍ଧକୁ ଆମେରିକୀୟଙ୍କ ବିରୋଧ

ଗଣମାଧ୍ୟମ ପକ୍ଷରୁ କରାଯାଇଥିବା ଏକ ସର୍ଭେ ଅନୁଯାୟୀ, ପ୍ରତି ୧୦ ଜଣରୁ ୬ ଜଣ ଆମେରିକୀୟ ଇରାନ ବିରୋଧରେ ଆମେରିକାର ସାମରିକ କାର୍ଯ୍ୟାନୁଷ୍ଠାନ ନିଷ୍ପତ୍ତିକୁ ବିରୋଧ କରୁଛନ୍ତି। ସୂଚନାଯୋଗ୍ୟ ଯେ, ବର୍ତ୍ତମାନ ସୁଦ୍ଧା ଇରାନ-ଆମେରିକା ଓ ଇସ୍ରାଏଲ ଯୁଦ୍ଧରେ ୧,୨୭୦ ଜଣଙ୍କ ମୃତ୍ୟୁ ହୋଇଥିବା ବେଳେ ଗାଜାରେ ୭୨,୧୩୬ ଜଣ ପାଲେଷ୍ଟାଇନୀ ପ୍ରାଣ ହରାଇସାରିଛନ୍ତି।