ଆନ୍ଧ୍ରପ୍ରଦେଶ ବିଜୟନଗରମ୍‌ରୁ ନିର୍ଯାତିତ ଓଡିଆ ଶ୍ରମିକ ଉଦ୍ଧାର

ସୁନ୍ଦରଗଡ ୨୨|୧୨: ଆନ୍ଧ୍ର ବିଜୟନଗରମ୍‌ରେ ନିର୍ଯାତିତ ଓଡିଆ ଶ୍ରମିକଙ୍କୁ ଉଦ୍ଧାର କରି ଫେରାଇ ଅଣାଯାଇଛି । ସୁନ୍ଦରଗଡ ଡିଏସ୍‌ପି ଦାମୋଦର ମାଝିଙ୍କ ନେତୃତ୍ବରେ ଆନ୍ଧ୍ର ଯାଇଥିଲା ୪ ଜଣିଆ ଟିମ୍ । ଏହି ଟିମ୍ ଆନ୍ଧ୍ର ବିଜୟନଗରମ୍‌ରୁ ୬ ଶ୍ରମିକଙ୍କୁ ଉଦ୍ଧାର କରିଛି । ସୁନ୍ଦରଗଡ଼ ଜିଲ୍ଲା ହେମଗିରି ବ୍ଲକ୍ ଭୁର୍ତ୍ତା ଗାଁର ୧୧ ଜଣ ଶ୍ରମିକ ଜଣେ ଦାଦନ ଦଲାଲ କଥାରେ ରାଜି ହୋଇ ବିଜୟନଗରମ୍‌ରେ ଇଟାଭାଟିରେ କାମ କରିବାକୁ ଯାଇଥିଲେ। ସେଠାରେ ସେମାନଙ୍କୁ ଦାଦନ ଦଲାଲ ନିସ୍ତୁକ ମାଡ଼ ମାରିବା ସହିତ ଜଣେ ଶ୍ରମିକଙ୍କ ମୁହଁରେ ଏସିଡ୍ ଢାଳି ଦେଇଥିଲା । ସେହିପରି ଅନ୍ୟ ଶ୍ରମିକଙ୍କୁ ମାଡ଼ ମାରି ଆହତ କରିଥିଲା । ୫ଶ୍ରମିକ ଖସି ଆସିବା ପୂରା ଘଟଣା ବର୍ଣ୍ଣନା କରିଥିଲେ । ଅଟକ ଥିବା ଅନ୍ୟ ୬ ଶ୍ରମିକଙ୍କୁ ଉଦ୍ଧାର ପାଇଁ ପରିବାର ଲୋକ ଗୁହାରି ଜଣାଇବା ପରେ ପ୍ରଶାସନ ତତ୍ପରତା ଦେଖାଇଥିଲା ।