ଚନ୍ଦ୍ର ଗ୍ରହଣରେ ଗର୍ଭବତୀ ମହିଳାମାନେ ଭୁଲ୍‌ରେ ବି କରନ୍ତୁ ନାହିଁ ଏହି କାମ, ନଚେତ୍ ପିଲା ଉପରେ ପଡିବ ପ୍ରଭାବ

ନୂଆଦିଲ୍ଲୀ ୦୨।୦୩; ଗ୍ରହଣ ସମୟକୁ ସାଧାରଣ ସମୟ ଅପେକ୍ଷା ଅଧିକ ସମ୍ବେଦନଶୀଳ ଏବଂ ଅଶୁଭ ବୋଲି ବିବେଚନା କରାଯାଏ । ବିଶେଷ କରି ଚନ୍ଦ୍ରଗ୍ରହଣ ଏକ ପ୍ରମୁଖ ମହାଜାଗତିକ ଘଟଣା ହେବା ସହିତ ଏହାର ଆଧ୍ୟାତ୍ମିକ ଗୁରୁତ୍ୱ ମଧ୍ୟ ରହିଛି । ମାନ୍ୟତା ଅଛି ଯେ, ଏହି ସମୟରେ କୌଣସି ଶୁଭ କିମ୍ବା ମାଙ୍ଗଳିକ କାର୍ଯ୍ୟ କରିବା ଅନୁଚିତ୍ । ଏହି ଅବଧିରେ ପୂଜାପାଠ, ସାଧନା ଏବଂ ସତର୍କତା ଉପରେ ଅଧିକ ଗୁରୁତ୍ୱ ଦେବାକୁ ପରାମର୍ଶ ଦିଆଯାଇଛି । ବିଶେଷ କରି ଗର୍ଭବତୀ ମହିଳାମାନଙ୍କୁ ଏହି ସମୟରେ ଅଧିକ ସାବଧାନ ରହିବାକୁ କୁହାଯାଇଥାଏ ।

ଚନ୍ଦ୍ରଗ୍ରହଣକୁ କାହିଁକି ଅଶୁଭ ମାନାଯାଏ?

ଧାର୍ମିକ ବିଶ୍ୱାସ ଅନୁଯାୟୀ, ଗ୍ରହଣ କାଳରେ ବାୟୁମଣ୍ଡଳର ଶକ୍ତିରେ ପରିବର୍ତ୍ତନ ଆସେ ଏବଂ ନକାରାତ୍ମକ ପ୍ରଭାବ ବୃଦ୍ଧି ପାଇଥାଏ । ଏହାର ପ୍ରଭାବ ଗର୍ଭବତୀ ମହିଳା ଏବଂ ଗର୍ଭସ୍ଥ ଶିଶୁ ଉପରେ ଅଧିକ ପଡ଼ିବାର ସମ୍ଭାବନା ଥାଏ । ମାନ୍ୟତା ରହିଛି ଯେ, ଗ୍ରହଣ ସମୟରେ ଚନ୍ଦ୍ରର କିରଣ ଶୁଦ୍ଧ ହୋଇନଥାଏ, ତେଣୁ ଏହି ସମୟରେ ଅନାବଶ୍ୟକ ଭାବେ ବାହାରକୁ ଯିବା କିମ୍ବା ସିଧାସଳଖ ଚନ୍ଦ୍ରକୁ ଦେଖିବା ଉଚିତ୍ ନୁହେଁ ।

ଗ୍ରହଣ ସମୟରେ କେଉଁ ସବୁ ସାବଧାନତା ଅବଲମ୍ବନ କରିବେ?

ଧାରୁଆ ବସ୍ତୁରୁ ଦୂରେଇ ରୁହନ୍ତୁ: ଗ୍ରହଣ ସମୟରେ ଗର୍ଭବତୀ ମହିଳାମାନେ ଛୁଞ୍ଚି, ଛୁରୀ, କଞ୍ଚି ଭଳି ଧାରୁଆ କିମ୍ବା ମୁନିଆ ବସ୍ତୁ ବ୍ୟବହାର କରିବା ଉଚିତ୍ ନୁହେଁ । ପାରମ୍ପରିକ ବିଶ୍ୱାସ ଅନୁଯାୟୀ, ଏହାର ବ୍ୟବହାର ଗର୍ଭସ୍ଥ ଶିଶୁ ଉପରେ ଖରାପ ପ୍ରଭାବ ପକାଇପାରେ ।

ସିଲେଇ ଓ ବୁଣାକାମ ବାରଣ: ଏହି ସମୟରେ ସିଲେଇ, ବୁଣାକାମ କିମ୍ବା କୌଣସି ପ୍ରକାରର ହସ୍ତକଳା କାମରୁ ଦୂରେଇ ରହିବାକୁ ପରାମର୍ଶ ଦିଆଯାଏ ।

ସକାରାତ୍ମକ ଚିନ୍ତାଧାରା: ଗ୍ରହଣ ସମୟରେ ଅଧିକ ସମୟ ବିଶ୍ରାମ କରିବା ଏବଂ ମନରେ ସକାରାତ୍ମକ ଭାବନା ରଖିବା ଶୁଭଫଳ ପ୍ରଦାନ କରିଥାଏ ।

ସାବଧାନତା ସହିତ କିଛି ଆଧ୍ୟାତ୍ମିକ ପ୍ରତିକାର ମଧ୍ୟ ବେଶ୍ ଲାଭଦାୟକ ହୋଇଥାଏ । ନିଜ ଇଷ୍ଟଦେବଙ୍କୁ ସ୍ମରଣ କରିବା ସହ ବିଶେଷ କରି ଚନ୍ଦ୍ର ସମ୍ବନ୍ଧୀୟ ମନ୍ତ୍ର ଜପ କଲେ ସକାରାତ୍ମକ ଶକ୍ତି ମିଳିଥାଏ । ଏକ ପାରମ୍ପରିକ ପ୍ରଥା ଅନୁଯାୟୀ, ଗର୍ଭବତୀ ମହିଳା ନିଜ ଉଚ୍ଚତା ସମାନ ଏକ ସୂତା ନେଇ ଘରର କୌଣସି ସୁରକ୍ଷିତ ସ୍ଥାନରେ ରଖିବା ଉଚିତ୍ । ଗ୍ରହଣ ଶେଷ ହେବା ପରେ ସେହି ସୂତାକୁ ପ୍ରବାହିତ ଜଳରେ ବିସର୍ଜନ କଲେ ଗ୍ରହଣର ପ୍ରଭାବ କମିଯାଏ ବୋଲି ବିଶ୍ୱାସ କରାଯାଏ ।

ଅଧିକ ପଢନ୍ତୁ- Holika Dahan 2026: ଆଜି ନା କାଲି, କେବେ ପାାଳିବେ ହୋଲିକା ଦହନ ? ଦ୍ୱନ୍ଦ୍ୱ ଦୂର କରିବା ପାଇଁ ଜାଣନ୍ତୁ ଶୁଭ ମୁହୁର୍ତ୍ତ