ବୋନସରେ ବିଡା ବିଡା ଟଙ୍କା ଗଦାଇଦେଲେ ମାଲିକ, କର୍ମଚାରୀଙ୍କୁ କହିଲେ- ‘ଯେତେ ଇଚ୍ଛା ନେଇଯାଅ...’

ବେଜିଂ, ୨୬/୦୨: ବେସରକାରୀ ସଂସ୍ଥାରେ ବୋନସକୁ ଅନାଇ ରହିଥାନ୍ତି କର୍ମଚାରୀ । କେତେବେଳେ ବୋନସ୍ ମିଲିବ ଏବଂ କେତେ ପ୍ରତିଶତ ମିଳିବ ସେନେଇ ଆଶା ରଖିଥାନ୍ତି । ଭାରତରେ ଦୀପାବଳି, ହୋଲି, ଦଶହରା ସମୟରେ ବୋନସ ମିଳିଥାଏ । କିନ୍ତୁ ଚାଇନାର ଏକ କମ୍ପାନୀ ବୋନସର ଏମିତି କିଛି କରିଛି ଯାହା ସମସ୍ତଙ୍କୁ ଚକିତ କରିଦେଇଛି ।

ସାଉଥ୍ ଚାଇନା ମର୍ଣ୍ଣିଂ ପୋଷ୍ଟ ଅନୁସାରେ, ଚୀନର ଏକ କମ୍ପାନୀ ଏବଂ ଏହାର ମାଲିକ ଗତବର୍ଷ ୨୭୦ ମିଲିୟନ ୟୁଆନ୍(ଚୀନ ଅର୍ଥ) ଆୟ କରିଥିଲେ । ଏହା ମଧ୍ୟରୁ ସେ ୧୮୦ ମିଲିୟନ ୟୁଆନ ଅର୍ଥାତ ୨୬ ମିଲିୟନ ୟୁଏସ ଡଲାର ବୋନସ ବାଣ୍ଟିଛନ୍ତି । ଏସବୁ ଘଟଣା ଗତ ଫେବ୍ରୁଆରୀ ୧୩ ତାରିଖରେ ଘଟିଛି ।

ଚାଇନାର ହେନାନ ପ୍ରାନ୍ତରେ ଅଛି କୁଆଙ୍ଗଶାନ୍ କ୍ରେନ୍ କମ୍ପାନୀ ଲିମିଟେଡ୍ । କମ୍ପାନୀ ପକ୍ଷରୁ ୧୩ ତାରିଖରେ ବାର୍ଷିକ ଉତ୍ସବର ଆୟୋଜନ କରାଯାଇଥିଲା । କାର୍ଯ୍ୟକ୍ରମରେ କମ୍ପାନୀର କର୍ତ୍ତୃପକ୍ଷ ୬୦ ମିଲିୟନ ୟୁଆନ୍ ବା ୮.୭ ମିଲିୟନ ଆମେରିକୀୟ ଡଲାରର କ୍ୟାସ୍ ବା ନଗତ ଅର୍ଥ ବାଣ୍ଟିଛନ୍ତି । ଯେଉଁଥିରେ ୭୦୦୦ କର୍ମଚାରୀ ଯୋଗ ଦେଇଥିଲେ । ସେମାନଙ୍କ ପାଇଁ ୮୦୦ ପ୍ରକାରର ବ୍ୟଞ୍ଜନ ପ୍ରସ୍ତୁତ ହୋଇଥିଲା ।

ଖାଲି ଏତିକି ନୁହେଁ କମ୍ପାନୀର ମାଲିକ ଟଙ୍କା ବିଡାକୁ ଚେବୁଲରେ ବିଛାଇ ରଖିଥିଲେ । ଏହାପରେ କର୍ମଚାରୀଙ୍କୁ ବୋନସ ନେବାକୁ ଡକାଯାଇଥିଲା । ଏକ ନିର୍ଦ୍ଦିଷ୍ଟ ସମୟ ଭିତରେ କର୍ମଚାରୀଙ୍କୁ ଟଙ୍କା ବିଡା ଉଠାଇ ଗଣିବାକୁ ହୋଇଥିଲା । ନିର୍ଦ୍ଦିଷ୍ଟ ସମୟ ଭିତରେ ଯିଏ ଯେତେ ଅର୍ଥ ଗଣିପାରୁଥିଲେ ସେସମସ୍ତ ଅର୍ଥ ତାଙ୍କର ହୋଇଯାଉଥିଲା । କର୍ମଚାରୀମାନେ ମଧ୍ୟ ଟଙ୍କା ବିଡା ଗଣି ନିଜ ପାଖରେ ରଖିଥିଲେ । ସମୟ ସରିବା ପରେ ଯାହା ପାଖରେ ଯେତେ ନୋଟ୍ ବିଡା ରହୁଥିଲା ସେସମସ୍ତ ଅର୍ଥକୁ ସେମାନେ ଘରକୁ ନେଇଥିଲେ ।

ଏହି ସମସ୍ତ ଘଟଣାକୁ ଚାଇନାରେ ଅନଲାଇନ୍ ପ୍ରସାରଣ କରାଯାଇଥିଲା ।ଏବେ ସୋସିଆଲ ମିଡିଆରେ ବୋନସ ବିତରଣ କାର୍ଯ୍ୟକ୍ରମର ଅନେକ ଭିଡିଓ ଭାଇରାଲ ହେଉଛି । କର୍ମଚାରୀମାନେ ଟେବୁଲ ଉପରେ ରଖାଯାଇଥିବା ଟଙ୍କା ବିଡାକୁ ଧରି ଗଣୁଥିବା ଭିଡିଓରେ ଦେଖିବାକୁ ମିଳିଛି ।

ବୋନସ କାର୍ଯ୍ୟକ୍ରମ ପରେ କମ୍ପାନୀ ମାଲିକ କୁଇ ପେଇଜୁନ୍ କହିଛନ୍ତି ଯେ, ସେମାନେ ଓ୍ୱାସିଂମେସିନ୍ ବାଣ୍ଟୁ ନାହାଁନ୍ତି । ଗତବର୍ଷ ସେମାନେ ସୁନା ମୁଦି ଦେଇଥିଲେ । ହାର ମଧ୍ୟ ପ୍ରଦାନ କରିଥିଲେ । ଏବେ ନଗତ ଅର୍ଥ ଦିଆଯାଇଛି । ଜଣକା ପିଛା ପ୍ରାୟ ୨୦ ହଜାର ୟୁଆନ୍ ପ୍ରଦାନ କରାଯାଇଛି । ଲାଭର ୭୦ ପ୍ରତିଶତକୁ ୭ ହଜାର କର୍ମଚାରୀଙ୍କ ମଧ୍ୟରେ ବାଣ୍ଟି ଦିଆଯାଇଥିବା ସେ କହିଛନ୍ତି ।