ଗୋଟିଏ ଗ୍ରୁପରେ ଭାରତ-ପାକିସ୍ତାନ ! ଟି୨୦ ବିଶ୍ୱକପରେ ପୁଣି ମୁହାଁମୁହିଁ ହେବେ ଦୁଇ ଦେଶ

ନୂଆଦିଲ୍ଲୀ, ୨୩|୧୧: ପୁଣି ଥରେ ମୁହାଁମୁହିଁ ହେବେ ଭାରତ ଏବଂ ପାକିସ୍ତାନ । ବଡ ଇଭେଣ୍ଟରେ ସାମ୍ନାସାମ୍ନି ହେଲେ ଦୁଇ ଦଳ । ଦୁଇ ଦଳଙ୍କୁ ଗୋଟିଏ ଗ୍ରୁପରେ ଆଉ ଥରେ ରଖିଛି ଆଇସିସି । ଅର୍ଥାତ ୨୦୨୬ରେ ଆୟୋଜିତ ହେବାକୁ ଥିବା ଟି୨୦ ବିଶ୍ୱକପରେ ଦୁଇ ପାରମ୍ପରିକ ପ୍ରତିଦ୍ୱନ୍ଦ୍ୱୀ ଗୋଟିଏ ଗ୍ରୁପରେ ରହିଛନ୍ତି ।

ଦେଖିବାକୁ ଗଲେ ଭାରତ ଏବଂ ପାକିସ୍ତାନ ମଧ୍ୟରେ ଭଲ ସମ୍ପର୍କ ନାହିଁ । ପହଲଗାମ ଆକ୍ରମଣ ପରେ ଭାରତ ଅପେରସନ ସିନ୍ଦୂର କରିଥିଲା । ପାକିସ୍ତାନ ମଧ୍ୟରେ ପଶି ଆତଙ୍କବାଦୀଙ୍କୁ ନିପାତ କରିଥିଲା । ତାପରଠୁ ଉଭୟ ଦେଶ ମଧ୍ୟରେ ସମ୍ପର୍କ ପୁରା ଖରାପ ହୋଇଯାଇଛି । ଯାହାର ପ୍ରଭାବ କ୍ରିକେଟର ମଇଦାନରେ ଦେଖିବାକୁ ମିଳିଥିଲା । ଏସିଆ କପରେ ଖେଳାଳି ପରସ୍ପର ସହ ହାତ ମିଶାଇ ନଥିଲେ । ମହିଳା ବିଶ୍ୱକପରେ ସମାନ ଦୃଶ୍ୟ ଦେଖିବାକୁ ମିଳିଥିଲା ।

ଏବେ ୨୦୨୬ରେ ଆଉ ଥରେ ମୁହାଁମୁହିଁ ହେବେ ଭାରତ ଏବଂ ପାକ୍ । ଯାହାର ଆୟୋଜନ କରୁଛନ୍ତି ଭାରତ ଏବଂ ଶ୍ରୀଲଙ୍କା । ତେବେ ଟୁର୍ଣ୍ଣାମେଣ୍ଟେ କିଏ କେଉଁ ଗ୍ରୁପରେ ରହିବେ ସେନେଇ ଆଇସିସି ନିଷ୍ପତ୍ତି ନେଇଛି । ଏହି ଗ୍ରୁପରେ ଭାରତ ଏବଂ ପାକିସ୍ତାନ ସହ ନେଦରଲାଣ୍ସ, ନାମିବ୍ୟା ଏବଂ ଆମେରିକା ରହିଛନ୍ତି । ସୁପର୮କୁ ନଜରରେ ରଖି ଗ୍ରୁପ୍ ପ୍ରସ୍ତୁତ କରାଯାଇଥିବା ଅନେକ ମତ ଦେଉଛନ୍ତି ।

ଭାରତର ମୁମ୍ବାଇ, କୋଲକାତା, ଚେନ୍ନାଇ, ଦିଲ୍ଲୀ ଏବଂ ଅହମ୍ମଦାବାଦରେ ମ୍ୟାଚ୍ ଖେଳାଯିବ । ସେହିପରି ଶ୍ରୀଲଙ୍କାର କଲମ୍ବୋ ଏବଂ କ୍ୟାଣ୍ଡିରେ ମୁକାବିଲା ଖେଳାଯିବ । ଯଦି ପାକିସ୍ତାନ ଫାଇନାଲରେ ପହଁଚେ ତେବେ ଅହମ୍ମଦାବାଦ ବଦଳରେ ଶ୍ରୀଲଙ୍କାରେ ଫାଇନାଲ ମୁକାବିଲା ହେବ ।

ସବୁଠାରୁ ବଡ କଥା ହେଲା ଯେ, ଉତ୍ତେଜନା ପରଠୁ ସମସ୍ତ ଆଇସିସି ଇଭେଣ୍ଟରେ ଭାରତ ପାକିସ୍ତାନକୁ ପରାସ୍ତ କରିଛି । ପାକିସ୍ତାନର ସିନିୟର ମହିଳା ଏବଂ ପୁରୁଷ ଟିମ୍ ଶୋଚନୀୟ ଭାବେ ପରାସ୍ତ ହୋଇଛନ୍ତି । ତେଣୁ ଆଇସିସି ଇଭେଣ୍ଟ ପାକିସ୍ତାନ ପାଇଁ ଅଧିକ ଗୁରୁତ୍ୱ ବହନ କରିବ । ସେପଟେ ଭାରତ ମଧ୍ୟ ନିଜର ଦବଦବାକୁ ବଜାୟ ରଖିବାକୁ ଚେଷ୍ଟା କରିବ ।