ବନ୍ଧୁକ ଦେଖାଇ ନେଇଯାଇଥିଲେ ଅଢ଼େଇ ଲକ୍ଷ ଟଙ୍କା ସହ ୧୫ଲକ୍ଷ ଟଙ୍କାର ସୁନାଗହଣା : ଧରାପଡିଲେ ୩ ଡକାୟତ, ଆଉ ୧୧ ଫେରାର

କାମାକ୍ଷାନଗର ୯।୧୧: ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ଆମ୍ବପଳାସ ଗାଁ ଅଭିମନ୍ୟୁପୁର ସାହିରେ ହୋଇଥିବା ସଶସ୍ତ୍ର ଡକାୟତି ଘଟଣାର ପର୍ଦ୍ଦାଫାଶ  । ସଶସ୍ତ୍ର ଡକାୟତି ଗ୍ୟାଙ୍ଗର ୩ ଗିରଫ । ଆହୁରି ୧୧ ଜଣ ଏବେବି ଫେରାର ହୋଇଥିବା ସୂଚନା ମିଳିଛି ।

ସୂଚନାଯଗ୍ୟ ଯେ, ଗତ ନଭେମ୍ବର ୩ ତାରିଖରେ ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ଆମ୍ବପଳାସ ଗାଁ ଅଭିମନ୍ୟୁପୁର ସାହିରେ ହୋଇଥିବା ବଡ଼ ଧରଣ ଶସସ୍ତ୍ର ଡକାୟତି ଗ୍ୟାଙ୍ଗର ୩ ଜଣ ଡକାୟତଙ୍କୁ ଧରିଛି ପରଜଙ୍ଗ ପୋଲିସ । ସେମାନଙ୍କ ଠାରୁ ଗୋଟିଏ ମୋଟର ସାଇକେଲ, ୧୪ ଗ୍ରାମ ସୁନା ଓ ୩ଟି ମୋବାଇଲ ଫୋନ୍ ଜବତ କରାଯାଇଛି । ଗିରଫ ଅଭିଯୁକ୍ତ ମାନେ ହେଲେ ଆମ୍ବପଳାସ ଗାଁର ମଣ୍ଟୁ ସାହୁ, ସିଂହଡା ଗାଁର ବିଷ୍ଣୁ ସାହୁ ଏବଂ ତାଳଚେର କଲୋନୀ ସାହିର ରତିକାନ୍ତ ନାଏକ । ଅନ୍ୟ ୧୧ ଜଣ ଡକାୟତ ଫେରାର ଥିବା ଜଣାପଡିଛି ।

ମୋଟ୍ ୧୪ ଜଣ ଡକାୟତ ଅଭିମନ୍ୟୁପୁର ସାହିର ରମେଶ ମହାପାତ୍ର ଏବଂ ଗଗନ ମହାପାତ୍ରଙ୍କ ଘରେ ଗୁଳି କରି ଏବଂ ବନ୍ଧୁକ ଦେଖାଇ ୧୫ ଲକ୍ଷ ଟଙ୍କାର ସୁନାଗହଣା ଓ ନଗଦ ୨ ଲକ୍ଷ ୫୦ ହଜାର ଟଙ୍କା ଲୁଟିନେଇ ଫେରାର ହୋଇଯାଇଥିଲେ । ଡକାୟତି ବେଳର ସିସିଟିଭିରେ ୮ ଜଣ ଡକାୟତ ଥିବା ଜଣା ପଡିଥିଲା । ଯାହାକୁ ନେଇ ପରଜଙ୍ଗ ପୋଲିସ ପାଇଁ ଏକ ବଡ଼ ଚ୍ୟାଲେଞ୍ଜ ଥିଲା । ତେବେ ଆମ୍ବପଳାସ ଗାଁର ଜଣେ ଡକାୟତର ସହଯୋଗରେ ଅପରାଧୀ ଗ୍ୟାଙ୍ଗ ନିକଟରେ ପହଞ୍ଚି ପାରିଛି ପୋଲିସ । ଅନ୍ୟ ଫେରାର ଡକାୟତ ମାନଙ୍କୁ ଖୁବ୍‌ଶୀଘ୍ର ଧରା ଯିବ ବୋଲି ପୋଲିସ ସୂତ୍ରରୁ ସୂଚନା ମିଳିଛି ।