ଦୁଇ ବର୍ଷ ପରେ ଟିମ୍ ଇଣ୍ଡିଆକୁ ଫେରିବେ ଇଶାନ କିଶନ, ନାଗପୁର ଟି-୨୦ରେ ତିନି ନମ୍ୱରରେ କରିବେ ବ୍ୟାଟିଂ

ନୂଆଦିଲ୍ଲୀ: ସବୁ ଫର୍ମାଟରେ ଟିମ୍ ଇଣ୍ଡିଆରୁ ଦୁଇ ବର୍ଷ ବାହାରେ ରହିବା ପରେ ଇଶାନ କିଶନ ଅନ୍ତର୍ଜାତୀୟ କ୍ରିକେଟକୁ ଫେରିବେ । ଜାନୁଆରୀ ୨୧ ବୁଧବାର ନାଗପୁରରେ ନ୍ୟୁଜିଲାଣ୍ଡ ବିପକ୍ଷରେ ପାଞ୍ଚ ମ୍ୟାଚ୍ ବିଶିଷ୍ଟ ସିରିଜର ପ୍ରଥମ ଟି-୨୦ ଅନ୍ତର୍ଜାତୀୟ ମ୍ୟାଚରେ ଜାତୀୟ ଦଳକୁ ଫେରିବାକୁ ଯାଉଛନ୍ତି । ଗତ ମାସରେ ସୟଦ ମୁସ୍ତାକ ଅଲି ଟ୍ରଫିରେ ଇଶାନ କିଶନଙ୍କ ଚମତ୍କାର ପ୍ରଦର୍ଶନ ଥିଲା । ତାଙ୍କ ଅଧିନାୟକତ୍ୱରେ, ଇଶାନ କିଶନ ଝାଡ଼ଖଣ୍ଡକୁ ଚାମ୍ପିଅନ କରାଇଥିଲେ ।

ଏହାପରେ ଇଶାନ କିଶନଙ୍କୁ ଟି-୨୦ ବିଶ୍ୱକପ୍ ପାଇଁ ଭାରତର ଦଳରେ ସାମିଲ କରାଯାଇଥିଲା । ଉଲ୍ଲେଖଯୋଗ୍ୟ, ଦଳର ସନ୍ତୁଳନ ବଜାୟ ରଖିବା ପାଇଁ ଉପ-ଅଧିନାୟକ ଶୁଭମନ ଗିଲଙ୍କୁ ଟି-୨୦ ବିଶ୍ୱକପ୍ ଦଳରୁ ବାଦ ଦିଆଯାଇଥିଲା । ତିଲକ ବର୍ମା ଆହତ ହେବା ପରେ ଇଶାନ କିଶନଙ୍କ ଖେଳିବା ନେଇ ଅଧିନାୟକ ସୂର୍ଯ୍ୟକୁମାର ଯାଦବ ନିଶ୍ଚିତ କରିଛନ୍ତି । ନଭେମ୍ବର ୨୦୨୩ ପରେ ଭାରତୀୟ ଜର୍ସିରେ ପ୍ରଥମ ମ୍ୟାଚ୍ ଖେଳିବେ ।

ଅଧିନାୟକ ସୂର୍ଯ୍ୟ କୁମାର ଯାଦବ କହିଛନ୍ତି, "ଇଶାନ କାଲି ତୃତୀୟ ନମ୍ବରରେ ବ୍ୟାଟିଂ କରିବେ ।“ ତିଲକ ବର୍ମାଙ୍କ ସ୍ଥାନରେ କିଶାନଙ୍କୁ ଏହି ସିରିଜରେ ସାମିଲ କରାଯାଇଥିଲା । ସୂର୍ଯ୍ୟକୁମାର ଯାଦବ କହିଛନ୍ତି, "ଆମେ ପ୍ରଥମେ ତାଙ୍କୁ ବିଶ୍ୱକପ୍ ଦଳ ପାଇଁ ଚୟନ କରିଥିଲୁ, ତେଣୁ ତାଙ୍କୁ ପ୍ରଥମ ସୁଯୋଗ ମିଳିବା ଠିକ୍ । ସେ ବହୁତ ଦିନ ହେଲା ଭାରତ ପାଇଁ ଖେଳି ନାହାନ୍ତି । ସେ ପ୍ରଥମେ ଖେଳିବାକୁ ଯୋଗ୍ୟ । ଦୁର୍ଭାଗ୍ୟବଶତଃ, ତିଲକ ସେହି ସ୍ଥାନରେ ନାହାନ୍ତି, ତେଣୁ ଆମେ ଭାବୁଛୁ ଯେ ଇଶାନ ତୃତୀୟ ନମ୍ବରରେ ଆମର ସର୍ବୋତ୍ତମ ବିକଳ୍ପ ।" ନ୍ୟୁଜିଲାଣ୍ଡ ବିପକ୍ଷରେ ଟି-୨୦ ଅନ୍ତର୍ଜାତୀୟ ସିରିଜ୍ ଭାରତ ଏବଂ ଶ୍ରୀଲଙ୍କାରେ ଅନୁଷ୍ଠିତ ହେବାକୁ ଥିବା ଟି-୨୦ ବିଶ୍ୱକପ୍ ପାଇଁ ଭାରତର ଶେଷ ପ୍ରସ୍ତୁତି ହେବ ।