୮ ବଲରେ ୮ ଛକା, ୧୧ ବଲରେ ଅର୍ଦ୍ଧଶତକ, ଭାଙ୍ଗିଲା ଯୁବରାଜ-ଶାସ୍ତ୍ରୀଙ୍କ ମହାରେକର୍ଡ

ନୂଆଦିଲ୍ଲୀ: ମେଘାଳୟର ବ୍ୟାଟର ଆକାଶ ଚୌଧୁରୀ ରଣଜୀ ଟ୍ରଫିରେ ରଚିଲେ ଇତିହାସ। କ୍ରିକେଟ୍‌ ଜଗତରେ ଏମିତି କମାଲ କରିଛନ୍ତି, ଯାହା ପୂର୍ବେ ଏମିତି ହୋଇ ନ ଥିଲା। ଆକାଶ ରବିବାର ୧୧ ବଲରେ ଅର୍ଦ୍ଧଶତକ ହାସଲ କରି ବିଶ୍ଵ ରେକର୍ଡ କରିଛନ୍ତି। ସୁରଟ କେସିକେ ପିଥଓ୍ଵାଲା ଗ୍ରାଉଣ୍ଡରେ ଅରୁଣାଚଳ ପ୍ରଦେଶ ବିପକ୍ଷ ଚଳିତ ରଣଜୀ ସିଜିନର ଏକ ମ୍ୟାଚରେ ଆକାଶ ମାତ୍ର ୧୧ ବଲ୍‌ରୁ ୫୦ ରନ କରି ବିଶ୍ଵ ରେକର୍ଡ ନିଜ ନାଁରେ କରିଛନ୍ତି। ଏହା ପୂର୍ବରୁ ପ୍ରଥମ ଶ୍ରେଣୀ କ୍ରିକେଟ୍‌ରେ ଦ୍ରୁତତମ ଅର୍ଦ୍ଧଶତକ ମାରିବାର ରେକର୍ଡ ଓ୍ଵେନ ହ୍ଵାଇଟ୍(୧୨ ବଲ୍)ଙ୍କ ନାମରେ ଥିଲା। ସେ ୨୦୧୨ରେ ଲିସେଷ୍ଟରସାୟର ଏବଂ ଏକ୍ସେସ ମଧ୍ୟରେ ଖେଳା ଯାଇଥିବା ମ୍ୟାଚ୍‌ରେ ସେ ଏହି ରେକର୍ଡ କରିଥିଲେ।

ଆକାଶ ପ୍ରଥମ ଶ୍ରେଣୀ କ୍ରିକେଟ୍‌ରେ ଗୋଟିଏ ଓଭରରେ ଛଟି ଛକା ମାରିଛନ୍ତି। ଏହି କୀର୍ତ୍ତିମାନ ସ୍ଥାପନ କରିବାରେ ସେ ହେଉଛନ୍ତି ତୃତୀୟ ଖେଳାଳି। ଏହା ବ୍ୟତୀତ ଏହି ଫର୍ମାଟ୍‌ରେ ଦ୍ରୁତତମ ଅର୍ଦ୍ଧଶତକ ହାସଲ କରିବାର ରେକର୍ଡ ବି କରିଛନ୍ତି। ସେ ଲଗାତାର ୮ ବଲରେ ମାରିଛନ୍ତି ୮ ଛକା। ୧୧ ବଲରୁ ହାସଲ କରିଛନ୍ତି ଅର୍ଦ୍ଧଶତକ।

ଗୋଟିଏ ଓଭରରେ ଛଅ ଛକା ମାରିବା ସହ ଆକାଶ ଚୌଧୁରୀ ରବି ଶାସ୍ତ୍ରୀଙ୍କ ରେକର୍ଡର ସମକକ୍ଷ ହୋଇଛନ୍ତି। ରବି ଶାସ୍ତ୍ରୀ ୧୯୮୪-୮୫ରେ ବରୋଦା ବିପକ୍ଷରେ ଗୋଟିଏ ଓଭରରେ ଛଅ ଛକା ମାରିଥିଲେ। ହେଲେ ଆକାଶ ଲଗାତାର ୮ ବଲରେ ୮ ଛକା ମାରିବାରେ ପ୍ରଥମ ବ୍ୟାଟର ହୋଇଛନ୍ତି। ଅନ୍ତର୍ଜାତୀୟ ଟି-୨୦ରେ ଯୁବରାଜ ୧୨ ବଲରୁ ଅର୍ଦ୍ଧଶତକ ହାସଲ କରିଥିଲେ। ତେବେ ମୋଟାମୋଟି କ୍ରିକେଟ୍‌ରେ ଆକାଶ ଚୌଧୁରୀ ଯୁବରାଜଙ୍କ ଏହି ମହାରେକର୍ଡ ବି ଭାଙ୍ଗିଛନ୍ତି।

ଆଠ ନମ୍ବରରେ ବ୍ୟାଟିଂ କରିବାକୁ ଆସିଥିବା ଆକାଶ ନିଜ ଇନିଂସର ଆରମ୍ଭ ଡଟ୍ ବଲରୁ ଏବଂ ଦୁଇଟି ସିଙ୍ଗଲ ରନରୁ କରିଥିଲେ। ଏହା ପରେ ପରବର୍ତ୍ତୀ ଆଠଟି ବଲରେ ସେ ଆଠ ଛକା ମାରି ନିଜର ଅର୍ଦ୍ଧଶତକ ପୂରା କରିଛନ୍ତି। ତାଙ୍କର ଏହି ଦମଦାର ଇନିଂସ ବଳରେ ମେଘାଳୟ ନିଜର ପ୍ରଥମ ଇନିଂସ ୬ ଓ୍ଵିକେଟ୍ ହରାଇ ୬୨୮ ରନର ବିଶାଳ ସ୍କୋର କରିଛି।

ଆକାଶ ଏହି କାରନାମା ପ୍ଲେଟ ଗ୍ରୁପର ଅରୁଣାଚଳ ପ୍ରଦେଶ ବିପକ୍ଷ ମ୍ୟାଚ୍‌ର ଦ୍ଵିତୀୟ ଦିନରେ କରିଛନ୍ତି। ସେ ଇନିଂସର ୧୨୬ତମ ଓଭରରେ ବାମହାତୀ ସ୍ପିନର ଲିମର ଡାବିଙ୍କ ଓଭରରେ ଛଅ ଛକା ମାରିଛନ୍ତି। ଏହିପରି ଭାବେ ସେ ଏକ ଖାସ୍ କ୍ଲବରେ ସାମିଲ ହୋଇଛନ୍ତି ଯେଉଁଥିରେ ରବି ଶାସ୍ତ୍ରୀ ଓ ଗ୍ୟାରୀ ସୋବର୍ସଙ୍କ ପରି ଖେଳାଳି ଅଛନ୍ତି। ଦକ୍ଷିଣ ଆଫ୍ରିକାର ମାଇକ ପ୍ରକ୍ଟର ମଧ୍ୟ ଲଗାତାର ଛଅ ଛକା ମାରିଥିଲେ। ମାତ୍ର ସେ ଦୁଇଟି ଓଭରରେ ହିଁ ଏହି ଉପଲବ୍ଧି ହାସଲ କରିଥିଲେ।

୨୫ ବର୍ଷୀୟ ଆକାଶ ନିଜର ୩୧ତମ ପ୍ରଥମ ଶ୍ରେଣୀ କ୍ରିକେଟ୍ ଖେଳୁଛନ୍ତି। ସେ ୨୦୧୯ରେ ପଦାର୍ପଣ କରିଥିଲେ। ସେ ୨୮ ଦିନିକିଆ ଓ ୩୦ଟି ଟି-୨୦ ମ୍ୟାଚ୍ ଖେଳିଛନ୍ତି। ଚଳିତ ମାସ ଆରମ୍ଭରେ ବିହାର ବିପକ୍ଷରେ ଆକାଶ ୬୨ ବଲରୁ ଅପରାଜିତ ୬୦ ରନ କରିଥିଲେ।

ପ୍ରଥମ ଶ୍ରେଣୀ କ୍ରିକେଟରେ ଦ୍ରୁତତମ ଅର୍ଦ୍ଧଶତକ

୧୧ ବଲ୍ - ଆକାଶ କୁମାର ଚୌଧୁରୀ - ଭାରତ

୧୨ ବଲ୍ - ୱେନ୍ ୱାୟଟ୍ - ଇଂଲଣ୍ଡ

୧୩ ବଲ୍ - ମାଇକେଲ୍ ଭାନ୍ ଭ୍ୟୁରେନ୍ - ଦକ୍ଷିଣ ଆଫ୍ରିକା

୧୪ ବଲ୍ - ନେଡ୍ ଏକର୍ସଲି - ଇଂଲଣ୍ଡ

୧୫ ବଲ୍ - ଖାଲିଦ ମହମୁଦ - ପାକିସ୍ତାନ

୧୫ ବଲ୍ - ବନ୍ଦୀପ୍ ସିଂହ - ଭାରତ