ନେପାଳରେ ଭୀଷଣ ବସ୍ ଦୁର୍ଘଟଣା, ୧୩ ମୃତ, ୩୪ ଆହତ

କାଠମାଂଡୁ ୬।୨: ବୈତାଡି ଜିଲ୍ଲାରେ ଗୁରୁବାର ବିଳମ୍ବିତ ରାତ୍ରିରେ ଭୀଷଣ ବସ୍ ଦୁର୍ଘଟଣା ଘଟିଛି। ଯାତ୍ରୀବାହୀ ବସ୍ ଟି ନିୟନ୍ତ୍ରଣ ହରାଇ ୨୦୦ ଫୁଟ ଗଭୀର ଖାଇକୁ ଖସି ପଡିଛି। ଫଳରେ ବସ୍ ରେ ଯାତ୍ରା କରୁଥିବା ୧୩ ଜଣ ଯାତ୍ରୀଙ୍କ ମୃତ୍ୟୁ ହୋଇଥିବା ବେଳେ ୩୪ ଜଣ ଆହତ ହୋଇଛନ୍ତି। ନେପାଳର ଏହି ଜିଲ୍ଲାଟି ଉତ୍ତରାଖଣ୍ଡ ପିଥୋରାଗଡ଼ ନିକଟରେ। ବିପଦଜନକ ପାହାଡିଆ ସଡ଼କରେ ଏହି ଦୁର୍ଘଟଣା ଘଟିଛି।

ବସ୍ ରେ ଥିବା ଅଧିକାଂଶ ଯାତ୍ରୀ ଏକ ବିବାହ ଉତ୍ସବରୁ ଫେରୁଥିଲେ। ପୋଲିସ ଅନୁସାରେ ବସ୍ ଟି ପାହାଡିଆ ରାସ୍ତାରେ ଚାଲୁଥିବା ବେଳେ ଅଚାନକ ରାସ୍ତାରୁ ଓହ୍ଲାଇ ଯାଇ ଗଭୀର ଖାଇକୁ ଖସି ପଡିଛି। ଦୁର୍ଘଟଣା ସୂଚନା ମିଳିବାମାତ୍ରେ ସ୍ଥାନୀୟ ପୋଲିସ ଓ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚି ଉଦ୍ଧାର କାର୍ଯ୍ୟ ଆରମ୍ଭ କରିଥିଲେ। ଆହତ ଯାତ୍ରୀମାନଙ୍କୁ ବୈତାଲୀ ଓ ଡଡେଲଧୁରା ରେ ଥିବା ନିକଟସ୍ଥ ହସ୍ପିଟାଲମାନକୁ ପଠାଯାଇଥିବା ବେଳେ ଡାକ୍ତରଙ୍କ ଟିମ୍ ୨୪ ଘଣ୍ଟିଆ ସ୍ୱାସ୍ଥ୍ୟ ସେବା ଯୋଗାଇ ଦେଇଛନ୍ତି। କିଛି ଆହତଙ୍କ ଅବସ୍ଥା ଗୁରୁତର ରହିଛି ଏଣୁ ଡାକ୍ତର ସେମାନଙ୍କ ଉପରେ ନଜର ରଖିଛନ୍ତି।

ନେପାଳ ପାହାଡିଆ ଅଞ୍ଚଳରେ ସର୍ପିଳ ରାସ୍ତା ଯୋଗୁ ଅନେକ ସମୟରେ ବସ୍ ଦୁର୍ଘଟଣା ଘଟୁଛି। ଖରାପ ପାଗ, ଦ୍ରୁତ ଗତି ଓ ଡ୍ରାଇଭରଙ୍କ ବେପରୁଆ ବାହନ ଚାଳନା ଏହି ସବୁ ଦୁର୍ଘଟଣାର ମୁଖ୍ୟ କାରଣ। ତେବେ ବୈତାଡି ବସ୍ ଦୁର୍ଘଟଣା ଦେଶର ସଡ଼କ ସୁରକ୍ଷା ଉପରେ ପୁଣି ପ୍ରଶ୍ନ ଚିହ୍ନ ଲଗାଇଛି। ସ୍ଥାନୀୟ ପ୍ରଶାସନ ବସ୍ ଦୁର୍ଘଟଣାର ଯାଞ୍ଚ ଆରମ୍ଭ କରିଛି। ଏହି ଦୁଃଖଦ ଘଟଣା ପରିବାରଙ୍କ ଲାଗି ଏକ ଶକ୍ତ ଝଟକା। ମୃତକଙ୍କ ପରିଜନଙ୍କୁ ତୁରନ୍ତ ସହାୟତା ପ୍ରଦାନ ଓ ଆହତଙ୍କ ସୁସ୍ଥତା କାମନା କରାଯାଉଛି। ନେପାଳ ସରକାର ଓ ସ୍ଥାନୀୟ ଲୋକେ ଏପରି ଦୁର୍ଘଟଣାର ମୁକାବିଲା ନିମନ୍ତେ ଉପାୟ ଉପରେ ବିଚାର କରୁଛନ୍ତି।

ଏହା ବି ପଢନ୍ତୁ :-ଅବୁଧାବୀରେ ଋଷିଆ-ୟୁକ୍ରେନ ଶାନ୍ତିବର୍ତ୍ତା ଶେଷ, ହୋଇ ପାରିଲାନି ବଡ଼ ବୁଝାମଣା