ବୀମା କମ୍ପାନୀରେ ହେବ ୧୦୦ ପ୍ରତିଶତ FDI ନିବେଶ, କେନ୍ଦ୍ର କ୍ୟାବିନେଟ୍ର ଲାଗିଲା ମୋହର

ନୂଆଦିଲ୍ଲୀ ୧୩।୧୨ : ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଅଧ୍ୟକ୍ଷତାରେ ବସିଥିବା କେନ୍ଦ୍ର କ୍ୟାବିନେଟ୍‌  ବୈଠକରେ ଅନେକ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯାଇଛି। ବୀମା କମ୍ପାନିଗୁଡ଼ିକରେ ଏଫ୍‌ଡିଆଇ ସୀମାକୁ ୧୦୦%କୁ ବଢ଼ାଇବା ଲାଗି  ଉଦ୍ଦିଷ୍ଟ ବିଲ୍‌କୁ ମିଳିଛି ଅନୁମୋଦନ ।  ଏହାସହିତ ଶିଳ୍ପ କ୍ଷେତ୍ରରେ କେତେକ ଢ଼ାଞ୍ଚାଗତ  ସଂସ୍କାରକୁ ମିଳିଛି ମଞ୍ଜୁରି । ଏଥିସହିତ ବୀମା କ୍ଷେତ୍ରକୁ  ମଜଭୁତ କରିବା ଲକ୍ଷ୍ୟ ରହିଛି। ଏହି ସଂଶୋଧନ ଦ୍ୱାରା ଦେଶକୁ ବୃହତ୍‌ ମାତ୍ରାରେ  ବିଦେଶୀ ନିବେଶ ଆସିବ। ଶିଳ୍ପ କ୍ଷେତ୍ରରେ ପ୍ରତିଯୋଗିତା  ବଢ଼ିବ ଏବଂ ଭାରତର ବୀମା ବଜାରରେ ଗ୍ରାହକ ସେବାରେ ଉନ୍ନତି ଆସିବ। ଚଳିତ ଶୀତ ଅଧିବେଶନରେ ଏହି ବିଲ୍‌  ଉପସ୍ଥାପିତ ହେବ। ଦେଶରେ  ବୀମା ପହଞ୍ଚ ବଢ଼ାଇବା ସହିତ ବୀମା ଆଇନ(ସଂଶୋଧିତ) ବିଲ୍‌ ୨୦୨୫ ଶିଳ୍ପ ଅଭିବୃଦ୍ଧିକୁ ତ୍ୱରାନ୍ୱିତ କରିବ। ଏହା ସହିତ ଶିଳ୍ପର ବିକାଶରେ ସହାୟକ ହେବ ଏବଂ  ଇଜ୍‌ ଅଫ୍‌ ଡୁଇଙ୍ଗ ବିଜ୍‌ନେସ୍‌ରେ ଆଣିବ ସୁଧାର।

ସୂଚନାଯୋଗ୍ୟ ଯେ, ଏଯାବତ୍‌ ବୀମା ଶିଳ୍ପ ୮୨,୦୦୦ କୋଟି  ଟଙ୍କାର ଏଫ୍‌ଡିଆଇ ସଂଗ୍ରହ କରିଛି।  ସେହିଭଳି କୋଇଲା ଶିଳ୍ପ ପାଇଁ ଏକ ବଡ଼ ନିଷ୍ପତ୍ତି  ନିଆଯାଇଛି। କ୍ୟାବିନେଟ୍‌ କୋଇଲା ଲିଙ୍କେଜ୍‌ର ନିଲାମୀ  ପାଇଁ ଉଦ୍ଦିଷ୍ଟ ନୀତିକୁ ମଞ୍ଜୁରି ଦେଇଛି। ଏହି ନୂଆ ନୀତିର  ନାମ ‘କୋଲ୍‌ ସେତୁ’ ୱିଣ୍ଡୋ ରଖାଯାଇଛି। ଏହାର  ଉଦ୍ଦେଶ୍ୟ ହେଉଛି ବିନା କୌଣସି ବାଧାରେ କୁଶଳତା  ଏବଂ ପାରଦର୍ଶୀ ଉପାୟରେ କୋଇଲାର ବ୍ୟବହାର  କରିବା। ଏହି ନୀତି ଅଧୀନରେ କୋଇଲାର ଉପଯୋଗ ଯେକୌଣସି ଔଦ୍ୟୋଗିକ କାର୍ଯ୍ୟ ଏବଂ ରପ୍ତାନି ପାଇଁ  କରାଯାଇପାରିବ। ନୂଆ ନୀତି ସରକାରଙ୍କ ଦ୍ୱାରା କୋଇଲା କ୍ଷେତ୍ରରେ କରାଯାଉଥିବା ସୁଧାରଗୁଡ଼ିକର ଶୃଙ୍ଖଳାରେ  ଅନ୍ୟ ଏକ ମହତ୍ୱପୂର୍ଣ୍ଣ ପଦକ୍ଷେପ। ଏହି ନୀତି ଲମ୍ବା ଅବଧି ପାଇଁ ନିଲାମ ଆଧାରରେ  କୋଇଲା ଲିଙ୍କେଜ୍‌କୁ ଆବଣ୍ଟିତ କରିବାର ଅନୁମତି ଦେବ। ଏହାର ଅର୍ଥ କୌଣସି ଘରୋଇ କ୍ରେତା, ଯିଏ  କୋଇଲା ଆବଶ୍ୟକ କରୁଛନ୍ତି ସେ ଏହି ‘କୋଲ୍‌ ସେତୁ’  ୱିଣ୍ଡୋରେ ଅଂଶଗ୍ରହଣ କରିପାରିବେ । ଏହି ୱିଣ୍ଡୋ  ଅଧୀନରେ କୋକିଂ କୋଲ୍‌ର ନିଲାମ କରାଯିବ ନାହିଁ । କ୍ୟାବିନେଟ୍‌ ନିଷ୍ପତ୍ତି ଘୋଷଣା କରି କେନ୍ଦ୍ରମନ୍ତ୍ରୀ ଅଶ୍ୱିନୀ  ବୈଷ୍ଣବ କହିଲେ, ଏହି ପଦକ୍ଷେପର ଉଦ୍ଦେଶ୍ୟ ହେଉଛି ବ୍ୟାପାରକୁ ସହଜ କରିବା । ଏହାସହିତ ଘରୋଇ କୋଇଲା ଭଣ୍ଡାରକୁ ବଢ଼ାଇବା ଏହାର ଲକ୍ଷ୍ୟ। ଫଳରେ ଦେଶର ଶକ୍ତି ଆବଶ୍ୟକତାକୁ ପୂରଣ କରିବା ପାଇଁ  ଆମଦାନି କୋଇଲା ଉପରେ ଭାରତର ନିର୍ଭରତା କମିବ। କ୍ୟାବିନେଟ୍‌ ୨୦୨୬ ଋତୁ ପାଇଁ କୋପ୍ରା ବା ଶୁଖା  ନଡ଼ିଆର ସର୍ବନିମ୍ନ ସହାୟକ ମୂଲ୍ୟ(ଏମ୍‌ଏସ୍‌ପି) ବୃଦ୍ଧିକୁ ମଞ୍ଜୁରି ଦେଇଛି। ଏ ନିଷ୍ପତ୍ତି ଚାଷୀଙ୍କ ପାଇଁ ଏକ ବଡ଼  ଆଶ୍ୱସ୍ତି । ଏବେ ୨୦୨୬ ଋତୁ ପାଇଁ ଭଲ ଗୁଣବତ୍ତାଯୁକ୍ତ ମିଲିଂ କୋପ୍ରାର ଏମ୍‌ଏସ୍‌ପି କୁଇଣ୍ଟାଲ ପିଛା ୧୨,୦୨୭  ଟଙ୍କା ଧାର୍ଯ୍ୟ କରାଯାଇଛି। ସେହିଭଳି ବଲ୍‌ କୋପ୍ରାର ଏମ୍‌ଏସ୍‌ପି କୁଇଣ୍ଟାଲ ପିଛା ୧୨,୫୦୦ ଟଙ୍କା ଧାର୍ଯ୍ୟ  କରାଯାଇଛି। ପୂର୍ବ ଋତୁ ତୁଳନାରେ ଉଭୟର ଏମ୍‌ଏସ୍‌ପି  ଯଥାକ୍ରମେ ୪୪୫ ଟଙ୍କା ଏବଂ ୪୦୦ ଟଙ୍କା ବଢ଼ାଯାଇଛି। ଫଳରେ ଚାଷୀଙ୍କୁ ସେମାନଙ୍କ ଉତ୍ପାଦନର ଉଚିତ ମୂଲ୍ୟ  ମିଳିବ ଓ ସେମାନଙ୍କ ଆୟ ବଢ଼ିବ।