ଅଷ୍ଟ୍ରେଲିଆରେ ଭାରତ ପ୍ରତି ଅପମାନ: ଗାନ୍ଧୀ ପ୍ରତିମୂର୍ତ୍ତୀ କାଟି ନେଇଗଲେ ଦୁର୍ବୃତ୍ତ, ନୂଆଦିଲ୍ଲୀର ତୀବ୍ର ବିରୋଧ

ନୂଆଦିଲ୍ଲୀ: ଅଷ୍ଟ୍ରେଲିଆରେ ଭାରତ ବିରୋଧୀ ତତ୍ୱଙ୍କ ଉତ୍ପାତ ଜାରି ରହିଛି। ମେଲବୋର୍ଣ୍ଣର ରୋଭିଲ୍ରେ ଥିବା ଅଷ୍ଟ୍ରେଲିୟନ୍ ଇଣ୍ଡିଆନ୍ କମ୍ୟୁନିଟି ସେଣ୍ଟରରେ ମହାତ୍ମା ଗାନ୍ଧୀଙ୍କ ଏକ ବ୍ରୋଞ୍ଜ ପ୍ରତିମୂର୍ତ୍ତିକୁ ପାଦରୁ କାଟି ଚୋରି କରି ନିଆଯାଇଛି। ଘଟଣାକୁ ନେଇ ଭାରତୀୟ-ଅଷ୍ଟ୍ରେଲିୟ ସମ୍ପ୍ରଦାୟ ମଧ୍ୟରେ ଗଭୀର ଅଶନ୍ତୋଷ ପ୍ରକାଶ ପାଇଛି।

ଏହି ଘଟଣାକୁ ନେଇ ଭାରତ ପକ୍ଷରୁ ମଧ୍ୟ ତୀବ୍ର ପ୍ରତିକ୍ରିୟା ପ୍ରକାଶ ପାଇଛି। ନୂଆଦିଲ୍ଲୀ ଆନୁଷ୍ଠାନିକ ଭାବରେ ଏହି ମାମଲାକୁ ଅଷ୍ଟ୍ରେଲୀୟ କର୍ତ୍ତୃପକ୍ଷଙ୍କ ନିକଟରେ ଉଠାଇଛି। ଉକ୍ତ ସ୍ଥାନରେ ତୁରନ୍ତ ଗାନ୍ଧୀ ପ୍ରତିମୂର୍ତ୍ତି ପୁନରୁଦ୍ଧାର କରିବା ସହ ଦୋଷୀଙ୍କୁ ଚିହ୍ନଟ କରିବା ପାଇଁ ପଦକ୍ଷେପ ନେବାକୁ ଭାରତ ଅଷ୍ଟ୍ରେଲିଆକୁ ଅନୁରୋଧ କରିଛି।

ମାମଲାରେ ଗଣମାଧ୍ୟମ ପ୍ରଶ୍ନର ଉତ୍ତର ଦେଇ, ବୈଦେଶିକ ମନ୍ତ୍ରଣାଳୟର ସରକାରୀ ମୁଖପାତ୍ର ରଣଧୀର ଜୟସୱାଲ କହିଛନ୍ତି “ଆମେ ଏହି ମାମଲାକୁ ଅଷ୍ଟ୍ରେଲୀୟ କର୍ତ୍ତୃପକ୍ଷଙ୍କ ନିକଟରେ ଦୃଢ଼ ଭାବରେ ଉଠାଇଛୁ ଏବଂ ନିଖୋଜ ପ୍ରତିମାକୁ ପୁନରୁଦ୍ଧାର କରିବା ପାଇଁ ତୁରନ୍ତ ପଦକ୍ଷେପ ନେବାକୁ ଏବଂ ଦୋଷୀମାନଙ୍କୁ ଦାୟୀ କରିବାକୁ ଅନୁରୋଧ କରିଛୁ।”

ଦ ଅଷ୍ଟ୍ରେଲିଆ ଟୁଡେ ରିପୋର୍ଟ ଅନୁଯାୟୀ, ଏହି ପ୍ରତିମୂର୍ତ୍ତିଟି ନୂଆଦିଲ୍ଲୀର ଭାରତୀୟ ସାଂସ୍କୃତିକ ସମ୍ପର୍କ ପରିଷଦ (ICCR) ଦ୍ୱାରା ଉପହାର ସ୍ୱରୂପ ଦିଆଯାଇଥିଲା। ୧୨ ନଭେମ୍ବର ୨୦୨୧ରେ ଅଷ୍ଟ୍ରେଲିଆର ପୂର୍ବତନ ପ୍ରଧାନମନ୍ତ୍ରୀ ସ୍କଟ୍ ମୋରିସନଙ୍କ ଦ୍ୱାରା ଏହାକୁ ଉଦଘାଟନ କରାଯାଇଥିଲା। ଏହା ଭାରତୀୟଙ୍କ ପାଇଁ ଏକ ଗୁରୁତ୍ୱପୂର୍ଣ୍ଣ ସାଂସ୍କୃତିକ, ଐତିହାସିକ ଏବଂ ପ୍ରତୀକାତ୍ମକ ଗୁରୁତ୍ୱ ବହନ କରେ। ଏହି ମାମଲାରେ ଅଷ୍ଟ୍ରେଲିଆ ପୁଲିସ ତଦନ୍ତ ଆରମ୍ଭ କରିଛି। ପୁଲିସ ୩ ଜଣଙ୍କୁ ସନ୍ଦେହ କରୁଥିବା ବେଳେ ଏପର୍ଯ୍ୟନ୍ତ କାହାକୁ ଗିରଫ କରାଯାଇ ନାହିଁ।