Box Office: ଧୂରନ୍ଧର ରବିବାର ଏମିତି ଆୟ କରିଛି ଯାହା ପୂର୍ବରୁ କେବେ ଘଟିନି, Avatar 3 ବି ପ୍ରଭାବିତ

ମୁମ୍ବାଇ: ରଣବୀର ସିଂ ଓ ଅକ୍ଷୟ ଖନ୍ନାଙ୍କ ଅଭିନୀତ ଫିଲ୍ମ ଧୂରନ୍ଧର ବକ୍ସଅଫିସରେ ଧମାଲ ମଚାଇ ଚାଲିଛି। ଫିଲ୍ମ ତୃତୀୟ ସପ୍ତାହରେ ଜବରଦସ୍ତ ଧମାକା କରିଛି। ଏ ପର୍ଯ୍ୟନ୍ତ କୌଣସି ବି ଫିଲ୍ମ ତୃତୀୟ ସପ୍ତାହରେ ସେତିକି ଆୟ କରି ନାହାନ୍ତି ଯେତିକି ଆୟ ଧୂରନ୍ଧର କରିଛି। ଅନେକ ଫିଲ୍ମର କଲେକ୍ସନ ଉପରେ ମଧ୍ୟ ଖରାପ ପ୍ରଭାବ ପକାଇଛି ଧୂରନ୍ଧର। ଆଗକୁ କ୍ରିସମାସ ଓ ନୂଆ ବର୍ଷ ଥିବାରୁ ଫିଲ୍ମ ବକ୍ସ ଅଫିସରେ ଧମାଲ୍ କରିବା ନିଶ୍ଚିତ। ଧୂରନ୍ଧରର ପ୍ରଭାବ ଏମିତି ରହିଛି ଯେ, ହଲିଉଡ ଫିଲ୍ମ ଅବତାର ୩ର କଡ଼ା ଟକ୍କର ପରେ ବି ଏହାର କଲେକ୍ସନ ହ୍ରାସ ଘଟିନି।

ଡିସେମ୍ବର ୫ରେ ରିଲିଜ୍ ହୋଇଥିବା ଧୂରନ୍ଧରକୁ ୧୫ ଦିନ ସମୟ ବିତି ସାରିଛି। ସଂପ୍ରତି ଫିଲ୍ମ ପ୍ରତିଦିନ ୨୨ କୋଟିରୁ ଅଧିକ ଆୟ କରୁଛି। ପୁଣି ଓ୍ଵିକେଣ୍ଡରେ ବକ୍ସଅଫିସ କଲେକ୍ସନ ଡବଲ୍ ହେଉଛି। ସାଧାରଣତଃ ତୃତୀୟ ଓ୍ଵିକେଣ୍ଡରେ ଫିଲ୍ମର ଆୟର ଗତି ଧିମା ପଡ଼ିଥାଏ। ମାତ୍ର ଧୂରନ୍ଧର ଚକିତ କରିବା ଭଳି ଆୟ କରୁଛି।. ତୃତୀୟ ଶନିବାର ଫିଲ୍ମ ୩୪ କୋଟି ଓ ରବିବାର ରାତି ୯ଟା ୩୦ ସୁଦ୍ଧା ୩୬ କୋଟିରୁ ଅଧିକ ଆୟ କରି ସାରିଛି। ଏହା ସହିତ ଧୂରନ୍ଧରର ବକ୍ସ ଅଫିସ କଲେକ୍ସନ ୫୫୩ କୋଟିରୁ ଅଧିକ ରହିଛି।

ହଲିଉଡ ଫିଲ୍ମ ନିର୍ମାତା ଜେମ୍ସ କ୍ୟାମେରୁନଙ୍କ ଫିଲ୍ମ ଅବତାର ୩କୁ ମଧ୍ୟ ଦର୍ଶକ ବେଶ ପସନ୍ଦ କରିଛନ୍ତି। ଡିସେମ୍ବର ୧୯ରେ ଅବତାର ଫାୟର ଆଣ୍ଡ ଆସ ରିଲିଜ୍ ହୋଇଛି। ଅବତାରକୁ ନେଇ ସିନେ ପ୍ରେମୀଙ୍କ ମଧ୍ୟରେ ଜବରଦସ୍ତ ଉତ୍ସାହ ଦେଖିବାକୁ ମିଳିଛି। ଏହି ଫିଲ୍ମ ସାରା ଦୁନିଆରେ ୫୦୦ କୋଟିରୁ ଅଧିକ ସହ ଓପନିଂ କରି ସାରିଛି। ମାତ୍ର ଭାରତରେ ଫିଲ୍ମଟି ପ୍ରଥମ ଦିନରେ ୧୯ କୋଟି ଟଙ୍କା ବ୍ୟବସାୟ କରିଛି। ଶନିବାର ୨୨.୨୫ କୋଟି ଏବଂ ରବିବାର ଖବର ଲେଖାଯିବା ସୁଦ୍ଧା ୨୩ କୋଟି ଆୟ କରି ସାରିଛି। ଭାରତରେ ଫିଲ୍ମଟି ମୋଟ୍ ୬୪ କୋଟି ଆୟ କରି ସାରିଛି। ଧୂରନ୍ଧରର ଝଡ଼ର ପ୍ରଭାବ ଅବତାର ୩ ଉପରେ ଦେଖିବାକୁ ମିଳିଛି।