ଭୋଟ ଗଣନା ପୂର୍ବରୁ ତେଜସ୍ୱୀଙ୍କ ଜରୁରୀ ବୈଠକ, ଯୋଗଦେଲେ ପ୍ରମୁଖ ନେତା

ପାଟନା ୧୩।୧୧: ବିହାର ୨୪୩ ସଦସୀୟ ବିଧାନସଭା ପାଇଁ ହୋଇଥିବା ଭୋଟ ଗ୍ରହଣର ଫଳାଫଳ ନଭେମ୍ବର ୧୪ରେ ଘୋଷଣା ହେବ। ଭୋଟ ଗଣନା ପାଇଁ ରାଜ୍ୟର ୩୮ ଜିଲ୍ଲାରେ ଥିବା ୪୬ଟି କେନ୍ଦ୍ରରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଛି। ଦ୍ୱିତୀୟ ପର୍ଯ୍ୟାୟ ଭୋଟ ଗଣନା ପରେ ହୋଇଥିବା ବୁଥ ବାହୁଡା ମତ ସର୍ଭେରେ ପ୍ରାୟ ଏଗଜିଟ୍ ପୋଲ ଏନଡିଏ ପ୍ରଚଣ୍ଡ ବହୁମତ ସହିତ ପୁଣି ସରକାର ଗଢିବ ବୋଲି ଆକଳନ କରିଛନ୍ତି। ତେବେ ଭୋଟ ଗଣନା ପୂର୍ବରୁ ବିରୋଧୀ ମହାମେଣ୍ଟ ଏବେ ଚିନ୍ତାରେ ପଡି ଯାଇଛି। ଆରଜେଡି ନେତା ତେଜସ୍ୱୀ ଯାଦବ ପାଟନାସ୍ଥିତ ତାଙ୍କ ସରକାରୀ ବାସଭବନରେ ମହାମେଣ୍ଟ ନେତାଙ୍କ ସହ ଗୁରୁବାର ସନ୍ଧ୍ୟାରେ ଏକ ଗୁରୁତ୍ୱପୂର୍ଣ୍ଣ ବୈଠକ କରିଛନ୍ତି।

ତେଜସ୍ୱୀଙ୍କ ଏହି ବୈଠକରେ ବିକାଶଶୀଳ ଇନସାନ ପାର୍ଟି (ଭିଆଇପି) ଅଧ୍ୟକ୍ଷ ମୁକେଶ ସାହାଣୀଙ୍କ ସମେତ ସିପିଆଇ (ଏମଏଲ) ସାଧାରଣ ସମ୍ପାଦକ ଦୀପଙ୍କର ଭଟ୍ଟାଚାର୍ଯ୍ୟଙ୍କ ଓ ଅନେକ ବରିଷ୍ଠ ନେତା ଯୋଗ ଦେଇଛନ୍ତି। ତେବେ ତରବରିଆ ଭାବେ ଡକାଯାଇଥିବା ଏହି ବୈଠକ ନେଇ ପୂର୍ବରୁ କୌଣସି ସୂଚନା ଦିଆଯାଇ ନଥିଲା। ହେଲେ ବୈଠକରେ ଭୋଟ ଗଣନା ସମ୍ପର୍କିତ ପ୍ରସ୍ତୁତି ନେଇ ଚର୍ଚ୍ଚା ହୋଇଥିବା ଜଣାପଡିଛି। ଏହା ଛଡା ତେଜସ୍ୱୀ ଗୁରୁବାର ପୂର୍ବାହ୍ନରୁ ବିରୋଧୀ ଦଳ ନେତା ଓ କାର୍ଯ୍ୟକର୍ତ୍ତାମାନଙ୍କ ସହ ଲଗାତାର ସମ୍ପର୍କରେ ଥିଲେ।

ବୈଠକରେ ତେଜସ୍ୱୀ ବିହାରର ଜନତା ଓ ସମ୍ବିଧାନ ପ୍ରେମୀଙ୍କ ଉଚ୍ଚ ପ୍ରଶଂସା କରି କହିଛନ୍ତି ଯେ ଗଣତନ୍ତ୍ରର ଜନନୀ ବିହାରର ନ୍ୟାୟ ପ୍ରିୟ ଜନତା ଓ ସମ୍ବିଧାନପ୍ରେମୀ ସବୁ ସାମାଜିକ ଏବଂ ରାଜନୈତିକ କାର୍ଯ୍ୟକର୍ତ୍ତା ଉତ୍ସାହ, ଆଶା ଓ ସତର୍କତାର ସହ ସଚେତନ, ସାବଧାନ ଓ କୌଣସି ପ୍ରକାରର ଅନୁଚିତ ଅସାମ୍ବିଧାନିକ କାର୍ଯ୍ୟର ମୁକାବିଲା ନିମନ୍ତେ ସମ୍ପୂର୍ଣ୍ଣ ସଜାଗ ଓ ପ୍ରସ୍ତୁତ ରହନ୍ତୁ। ତେବେ ଏହି ବୈଠକ ପୂର୍ବରୁ ତେଜସ୍ୱୀ ଆରଜେଡି ପ୍ରାର୍ଥୀ ଓ ଜିଲ୍ଲୀସ୍ତରୀୟ ପଦାଧିକାରୀଙ୍କ ସହ ଅନଲାଇନରେ ବୈଠକ କରି ଭୋଟ ଗଣନା ରଣନୀତି ଉପରେ ଆଲୋଚନା କରିଥିଲେ।

ପିଛିଲା ଦୁଇ ଦଶନ୍ଧୀରେ ଏହା ବିହାରରେ ପ୍ରଥମ ବିଧାନସଭା ନିର୍ବାଚନ ଯାହା ବିଶେଷ ଗହନ ପୁନରୀକ୍ଷଣ (ଏସଆଇଆର) ପରେ ଅନୁଷ୍ଠିତ ହୋଇଛି। ଏହି ନିର୍ବାଚନରେ ବିହାର ରାଜନୈତିକ ଭବିଷ୍ୟତକୁ ନେଇ ବେଶ୍ ଉତ୍ସାହ ଦେଖାଯାଇଛି।