ଇମ୍ରାନ ଖାନଙ୍କୁ ଏବେ ବିପଦ ଭାବୁଛି ପାକିସ୍ତାନ, ଦେଶରୁ ନିର୍ବାସିତ କରିବାକୁ ଚାହୁଁଛି ସେନା!

ଇସ୍ଲାମାବାଦ ୬।୧୨: ପାକିସ୍ତାନ ଜେଲରେ ବନ୍ଦୀ ପୂର୍ବତନ ପ୍ରଧାନମନ୍ତ୍ରୀ ଇମ୍ରାନ ଖାନଙ୍କ ଲାଗି ସେନା ତାର ଆଭିମୁଖ୍ୟ କଡ଼ା କରିଛି। ପାକିସ୍ତାନ ସେନା ମୁଖପାତ୍ର ଇମ୍ରାନଙ୍କୁ ଦେଶ ଲାଗି ବିପଦ ବୋଲି କହିଛନ୍ତି। ଜେଲରେ ଇମ୍ରାନଙ୍କ ମୃତ୍ୟୁ ହୋଇଥିବା ନେଇ ଦୀର୍ଘ ୧ ସପ୍ତାହ ଧରି ଲାଗି ରହିଥିବା ଆକଳନ ପରେ ସେନା ଶନିବାର ଏହି ବୟାନ ଦେଇଛି। ଅସୀମ ମୁନିର ପାକିସ୍ତାନ ସେନାର ଚିଫ୍ ଅଫ ଡିଫେନ୍ସ ଫୋର୍ସ (ସିଡିଏଫ) ହେବା ପରେ ଇମ୍ରାନଙ୍କ ପ୍ରତି ଏପରି ଆକ୍ରମଣ ହୋଇଛି। ଏଣୁ ଏଥିରେ ଏବେ ପ୍ରଶ୍ନ ଉଠୁଛି ଇମ୍ରାନଙ୍କୁ ନେଇ ଅସୀମ ମୁନିରଙ୍କ ଆଗାମୀ ପଦକ୍ଷେପ କ’ଣ ହେବ? ତାଙ୍କୁ ଜୀବନରୁ ମାରିଦେବେ ନା ଦେଶରୁ ତଡିଦେବେ ସେ ନେଇ ଏବେ ଅଟକଳବାଜୀ ଆରମ୍ଭ ହୋଇଯାଇଛି।

ଏସିୟାନେଟ୍ ନ୍ୟୁଜ ରିପୋର୍ଟ ଅନୁସାରେ ଅସୀମ ମୁନିର ଗତ ଦିନରେ କେବଳ ଇମ୍ରାନଙ୍କୁ ବାଦ ଦେଇ ବାକି ସବୁ ରାଜନୈତିକ ଦଳର ନେତାଙ୍କୁ ହାତେଇ ପାରିଛନ୍ତି। ଏଣୁ ମୁନିର ତାଙ୍କ ଶେଷ ବାଧା ଇମ୍ରାନ ଖାନଙ୍କୁ ହୁଏତ ନିଶେଷ କରି ଦେଇ ପାରନ୍ତି ନଚେତ ଦେଶରୁ ବାହାରିଯିବାକୁ ବାଧ୍ୟ କରିପାରନ୍ତି। ମୁନିର ଭାବୁଛନ୍ତି ଯଦି ଇମ୍ରାନ ଦେଶରେ ରହନ୍ତି ଓ ତାଙ୍କ ସରକାର ଆସେ ତେବେ ଏହାର ପରିଣାମ ତାଙ୍କୁ ହିଁ ଭୋଗିବାକୁ ପଡିବ।

ସେପଟେ ଅଗଷ୍ଟ ୨୦୨୩ରୁ ଆଦିଆଲା ଜେଲରେ ବନ୍ଦୀ ଇମ୍ରାନ ଖାନଙ୍କ ଲୋକପ୍ରିୟତା ଦେଶରେ ଲଗାତାର ବଢିବାରେ ଲାଗିଛି। ତାଙ୍କ ଲୋକପ୍ରିୟତା ରାଜନୈତିକ ବିରୋଧୀଙ୍କ ଠୁ ଅଧିକ ମୁନିରଙ୍କ ଲାଗି ଚ୍ୟାଲେଞ୍ଜ ହୋଇ ପାରେ। ଏଣୁ ଇମ୍ରାନଙ୍କ ଲୋକପ୍ରିୟତା ପାକିସ୍ତାନ ସୈନ୍ୟ ପ୍ରତିଷ୍ଠାନକୁ ଏବେ ଡରାଉଛି। ଇମ୍ରାନ ଖାନଙ୍କ ପାର୍ଟି ପିଟିଆଇ ଭାବୁଛି ଯେ ଅସୀମ ମୁନିରଙ୍କ ଇସାରାରେ ଇମ୍ରାନଙ୍କୁ ଜେଲରେ ନିର୍ଯାତନା ଦିଆଯାଉଛି। ସୈନ୍ୟ ନେତୃତ୍ୱକୁ ନେଇ ଇମ୍ରାନଙ୍କ ମନରେ ରୋଷ ରହିଛି ଯାହା ଅତୀତରେ ବି ଦେଖା ଯାଇଛି। ଏଣୁ ମୁନିର ବିଭିନ୍ନ ଉପାୟରେ ଇମ୍ରାନଙ୍କୁ ଭାଙ୍ଗିବାକୁ ଉଦ୍ୟମ କରୁଛନ୍ତି।

ଏଣୁ ଏପରି ଲାଗୁଛି ଅସୀମ ମୁନିର ହୁଏତ ଇମ୍ରାନଙ୍କୁ ଏବେ ନିଶେଷ କରିଦେବାକୁ ଚାହିଁବେ ନଚେତ ତାଙ୍କୁ ନିର୍ବାସନ ଲାଗି ବାଧ୍ୟ କରିବେ। ଏଥିରେ ଯଦି ମୁନିର ସଫଳ ନ ହୁଅନ୍ତି ତେବେ ଦେଶରେ ଇମ୍ରାନଙ୍କ ସରକାର ଫେରିବା ନିଶ୍ଚିତ। ଯଦିଏପରି କିଛି ହୁଏ ଅସୀମ ମୁନିରଙ୍କ ସହ ସେଇଆ ହେବ ଯାହା ଏବେ ଇମ୍ରାନଙ୍କ ସହ ହେଉଛି। ସିଡିଏଫ ହେବା ପରେ ଅସୀମ ମୁନିର ଦେଶର ସବୁଠୁ ଶକ୍ତିଶାଳୀ ବ୍ୟକ୍ତି ଭାବେ ଏବେ ଆନନ୍ଦ ନେଉଛନ୍ତି। ଅନ୍ୟପଟେ ଜେଲରେ ବନ୍ଦୀ ଥାଇ ମଧ୍ୟ ଇମ୍ରାନ ଙ୍କ ଲୋକପ୍ରିୟତା କମୁ ନାହିଁ। ଏହା ଏପରି ଏକ ପରିସ୍ଥିତି ଯାହା ପାକିସ୍ତାନର ଆଗାମୀ ଦଶକର ଦିଗ ନିର୍ଦ୍ଧାରଣ କରିବ।