ଆମେରିକାରେ ଶକ୍ତିଶାଳୀ ବରଫ ଝଡର ଆତଙ୍କ : ୧୦ ହଜାର ବିମାନ ବାତିଲ, ଘରୁ ବାହାରିବାକୁ ଲାଗୁଛି ଡର

ନ୍ୟୁୟର୍କ, ୨୪/୦୨: ଖାଲି ବରଫ ଏବଂ ବରଫ । ଆମେରିକାରେ ଭୟଙ୍କର ପରିସ୍ଥିତି । ୟୁଏସର ଉତ୍ତରପୂର୍ବ ଅଞ୍ଚଳରେ ଏକ ଶକ୍ତିଶାଳୀ ଓ୍ୱିଣ୍ଟର୍ ଷ୍ଟର୍ମ ବା ବରଫ ଝଡ ଭୀଷଣ କ୍ଷୟକ୍ଷତି ଘଟାଇଛି । ଫଳରେ ଜୀବନଜୀବିକା ଠପ୍ ହୋଇଯାଇଛି । ଲକ୍ଷ ଲକ୍ଷ ଲୋକେ ଘର ଭିତରେ ଫସି ରହିଛନ୍ତି । ସାଧାରଣ ଦିନରେ ଗହଳି ଚହଳି ଲାଗୁଥିବା ସହର ପୁରା ଶାନ୍ତ ହୋଇପଡିଛି । ସ୍କୁଲ କଲେଜକୁ ମଧ୍ୟ ବନ୍ଦ କରାଯାଇଚି । ସେହିପରି ହଜାର ହଜାର ବିମାନର ଉଡାଣକୁ କର୍ତ୍ତୃପକ୍ଷ ବାତିଲ କରିଦେଇଛନ୍ତି ।

ଫ୍ଲାଇଟ୍ ଆଓ୍ୱାର୍ ଅନୁସାରେ, ଫେବ୍ରୁଆରୀ ୨୧ରୁ ୨୪ ମଧ୍ୟରେ ୧୦ ହଜାରରୁ ଅଧିକ ବିମାନର ଉଡାଣ ବାତିଲ କରାଯାଇଛି । କେବଳ ସୋମବାର ୫ ହଜାର ବିମାନ ବାତିଲ ହୋଇଛି । ମଙ୍ଗଳବାର ୧୩୦୦ର ଅଧିକ ବିମାନର ଉଡାଣକୁ ରବ୍ଦ କରିଦିଆଯାଇଛି । ଜନ୍ ଏଫ୍ କେନେଡି ଅନ୍ତର୍ଜାତୀୟ ବିମାନ ବନ୍ଦର, ଲାଗାର୍ଡିଆ ବିମାନବନ୍ଦର, ବୋଷ୍ଟନ ଏବଂ ନ୍ୟୁୟର୍କ ବିମାନ ବନ୍ଦର ସବୁଠୁ ଅଧିକ ପ୍ରଭାବିତ ହୋଇଛି । ଅନେକ ରାଜ୍ୟରେ ଟ୍ରେନ୍ ଏବଂ ବସ ସେବା ରବ୍ଦ କରିଦିଆଯାଇଛି ।

ଏହି ଖବରଟି ପଢନ୍ତୁ... ଗମ୍ଭୀର କ'ଣ କରୁଛନ୍ତି କିଛି ଜାଣି ହେଉନି, କୋଚ୍ ଭାବେ ଦାୟିତ୍ୱ ନେଉ ନାହାଁନ୍ତି : ବର୍ଷିଲେ ଭେଟେରାନ୍ ଖେଳାଳି

ନ୍ୟୁୟର୍କରେ ୧୫ ଇଞ୍ଚର ବରଫ

ନ୍ୟୁୟର୍କ ସହର ପ୍ରଶାସନ ଜନତାଙ୍କୁ ଘରୁ ନ ବାହାରିବାକୁ କହିଛି । ଜରୁରୀ କାମ ଥିଲେ ହିଁ ବାହାରିବାକୁ ପରାମର୍ଶ ଦିଆଯାଇଛି । ସହରର ଅନେକ ରାସ୍ତାରେ ୧୫ ଇଞ୍ଚ ମୋଟାର ବରଫ ଜମି ରହିଛି । ସେହିପରି ନ୍ୟୁଜର୍ସିରେ ୨ ଫୁଟର ବରଫପାତ ହୋଇଛି । ସେହିପରି ଫିଲାଡେଲଫିଆରେ ଏକ ଫୁଟର ମୋଟା ବରଫ ଜମି ରହିଛି । ବୋଷ୍ଟନରେ ସୋମବାର ରାତି ସୁଦ୍ଧା ଭୀଷଣ ବରଫପାତ ହୋଇଛି ।

ପାଣିପାଗ ବିଭାଗର କହିବାନୁସାରେ, ଘଣ୍ଟାପ୍ରତି ୪୫ରୁ ୫୦ କିଲୋମିଟଟର ବେଗରେ ପବନ ହେଉଛି । ଏହାକୁ ବ୍ଲିଜାର୍ଡ କାଟାଗୋରୀରେ ରଖାଯାଇଛି । ଉପକୂଳ ଅଞ୍ଚଳରେ ୯୫ରୁ ୧୦୦ କିମି ବେଗରେ ବରଫଝଡ ହେଉଛି । ଏହା ଆଗାମୀ କିଛି ଦିନ ଯାଏଁ ଜାରି ରହିବ ।

ପ୍ରବଳ ବରଫ ଝଡ କାରଣରୁ ଅନେକ ସ୍ଥାନରେ ବିଦ୍ୟୁତ ସରବରାହ ବ୍ୟାହତ ହୋଇଛି । ନ୍ୟୁଜର୍ସିରେ ଲକ୍ଷ ଲକ୍ଷ ଲୋକ ଅନ୍ଧାରରେ ରହିଛନ୍ତି । ମାସାଚ୍ୟୁଟସ ସମେତ ନ୍ୟୁୟର୍କର କିଛି ଜାଗାରେ ଜରୁରୀକାଳିନ ସ୍ଥିତି ଜାରି କରାଯାଇଥିବା ଗଭର୍ଣ୍ଣର କ୍ୟାଥି ହୋଚୁଲ୍ ପ୍ରକାଶ କରିଛନ୍ତି ।