Amitabh Kant: ‘ଭାରତରେ ନିୟାମକ ଅନୁପାଳନ ଅଧିକ, ସମାଜବାଦୀ ମାନସିରକା ଏବେବି ଜାରି’

ନୂଆଦିଲ୍ଲୀ: ଭାରତର ପୂର୍ବତନ ଜି-୨୦ ଶେରପା ଅମିତାଭ କାନ୍ତ ଗୁରୁବାର ଭାରତୀୟ ଉଦ୍ୟୋଗ ଉପରେ ପଡୁଥିବା ନିୟାମକ ଅନୁପାଳନ ବୋଝ କଥା ଉଠାଇଛନ୍ତି । ଏହାସହ ଦେଶରେ ସମାଜବାଦୀ ମାନସିକତା ଏବେବି ରହିଛି ବୋଲି ସେ ଦୁଃଖର ସହ କହିଛନ୍ତି । ଏକ୍ସଲେନ୍ସ ଏନେବଲର୍ସ କାର୍ଯ୍ୟକ୍ରମରେ ଭାଷଣ ଦେଇ ଅମିତାଭ କାନ୍ତ କହିଛନ୍ତି, "ଭାରତର ନିୟାମକ ବାତାବରଣ ଅନୁପାଳନର ଅଧିକ ବୋଝ ପକାଉଛି ।  ବ୍ରିଟିଶ ରାଜ୍ ଅନେକ ଦିଗରେ ଲାଇସେନ୍ସ ରାଜର ରୂପ ନେଇଛି ଏବଂ ଆମର ସମାଜବାଦୀ ମାନସିକତା ଏବେବି ବଜାୟ ଅଛି ।"

ସେ କହିଛନ୍ତି ଯେ ଭାରତର ଉଦ୍ୟୋଗଗୁଡ଼ିକୁ ଅତ୍ୟଧିକ ନିୟନ୍ତ୍ରଣ ଏବଂ ଅନୁପାଳନ ବୋଝରୁ ମୁକ୍ତ କରାଯିବା ଆବଶ୍ୟକ । ପୂର୍ବତନ ବ୍ୟୁରୋକ୍ରାଟ୍ ଛଅ ବର୍ଷ ପାଇଁ ସରକାରୀ ଥିଙ୍କ ଟ୍ୟାଙ୍କ ନୀତି ଆୟୋଗର ମୁଖ୍ୟ କାର୍ଯ୍ୟନିର୍ବାହୀ ଭାବରେ ମଧ୍ୟ କାର୍ଯ୍ୟ କରିଥିଲେ । ଅମିତାଭ କାନ୍ତ କହିଛନ୍ତି ଯେ ନିୟମାବଳୀକୁ "ନିରପେକ୍ଷ ନିୟନ୍ତ୍ରଣ ପାଇଁ ଖଣ୍ଡା ଭାବରେ ନୁହେଁ, ବିଶ୍ୱାସ ଏବଂ ସ୍ୱଚ୍ଛତାର ଢାଲ ଭାବରେ" ପୁନଃଆକାର ଦେବା ଆବଶ୍ୟକ ।

ସେ କହିଛନ୍ତି ଯେ ନିୟମାବଳୀ “ନବସୃଜନ ଓ ରୋଜଗାର ସୃଜନକୁ ବିଧିତ ନକରିବା ଦରକାର”, ବରଂ ଏପରି ଭୂମିକା ଗ୍ରହଣ କରିବା ଦରକାର ଯାହା ବିକାଶକୁ ପ୍ରୋତ୍ସାହିତ କରିବ । ସେ ଚେତାବନୀ ଦେଇଛନ୍ତି ଯେ ବିକଶିତ ଭାରତ ଅଭିଯାନ ଅଧିନରେ ୩୦ ଟ୍ରିଲିୟନ ଆମେରିକୀୟ ଡଲାରର ସକଳ ଘରୋଇ ଉତ୍ପାଦ ଲକ୍ଷ୍ୟ ଜଟିଳ ନିୟମାବଳୀ ସହ ହାସଲ କରାଯାଇପାରିବ ନାହିଁ ।

ଅମିତାଭ କାନ୍ତ ନିଜ ଦାବି ଉଲ୍ଲେଖ କରି କହିଛନ୍ତି, ସରକାର ଓ ନିୟମାବଳୀର ଭୂମିକାକୁ ନିୟନ୍ତ୍ରିତରୁ ସକ୍ଷମକୁ ପରିବର୍ତ୍ତନ କରିବାକୁ ପଡ଼ିବ । ସେ ଏକ ପ୍ରଭାବ ମୂଲ୍ୟାଙ୍କନକୁ ସଂସ୍ଥାଗତ କରିବାର ଆବଶ୍ୟକତା ଉପରେ ଜୋର ଦେଇଛନ୍ତି । ଗୋଟିଏ ନିୟାମକ ଭିତରେ ଶକ୍ତିଗୁଡ଼ିକୁ କେନ୍ଦ୍ରିତ କରିବା ଉପରେ ସେ ଆପତ୍ତି ଉଠାଇଛନ୍ତି । ସେ କହିଛନ୍ତି, "ଭାରତୀୟ ନିୟାମକମାନଙ୍କୁ ନିୟମ ପ୍ରଣୟନ, ପ୍ରବର୍ତ୍ତନ ଏବଂ ବିଚାର ପାଇଁ ତିନୋଟି ସ୍ୱତନ୍ତ୍ର ପର୍ଯ୍ୟାୟ ପାଇଁ ପୁନର୍ଗଠିତ କରାଯିବା ଉଚିତ । ଯେଉଁଠାରେ ଏହା ସମ୍ଭବ ନୁହେଁ, ସେଠାରେ ସ୍ୱାଧୀନ ଟ୍ରିବ୍ୟୁନାଲଗୁଡ଼ିକ ହସ୍ତକ୍ଷେପ କରିବା ଉଚିତ ।"