ଭାରତ-ୟୁଏସ ଡିଲ୍ ପରେ ବ୍ୟବସାୟ ଖୁସ୍ : ବଢିବ ରପ୍ତାନୀ, ଶସ୍ତା ହେବ ଏସବୁ ଜିନିଷ

ନୂଆଦିଲ୍ଲୀ,୦୩|୦୨ :ଭାରତ ଏବଂ ଆମେରିକା ମଧ୍ୟରେ ଆରମ୍ଭ ହୋଇଛି ବ୍ୟବସାୟର ନୂଆ ଯୁଗ । ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ଫୋନ୍ କରିଛନ୍ତି ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ୍ । ଭାରତ ଉପରେ ଲଗାଯାଇଥିବା ହାଇ ଟାରିଫ୍ କୁ ମଧ୍ୟ ହ୍ରାସ କରିବାକୁ ନିଷ୍ପତ୍ତି ନିଆଯାଇଛି । ଏହାର ପ୍ରଭାର ସିଧାସଳଖ ବ୍ୟବସାୟୀଙ୍କ ଉପରେ ପଡିବ । ଘରୋଇ ବଜାରରେ ଅନେକ ସାମଗ୍ରୀ ଏବେ ଶସ୍ତାରେ ମିଳିବ । ଏହାସହ ଆମେରିକାରେ ଭାରତୀୟ ବସ୍ତୁର ଚାହିଦା ବୃଦ୍ଧି ପାଇବ ।

ଗତ କିଛି ମାସ ହେଲା ଭାରତ ଏବଂ ଆମେରିକା ମଧ୍ୟରେ ସମ୍ପର୍କ ଭଲ ନଥିଲା । ଭାରତ ଋଷଠୁ ତେଲ କିଣୁଥିବା ନେଇ ଆମେରିକା ଅଭିଯୋଗ କରିଥିଲା । ଫଳରେ ଉଚ୍ଚା ଟାରିଫ୍ ଲଗାଇଥିଲା । ଯାହା ଦେଶର ବ୍ୟବସାୟୀଙ୍କୁ କ୍ଷତି ପହଁଚାଇଥିଲା । କ୍ଷୁଦ୍ର ବ୍ୟବସାୟୀମାନେ କୌଣସି ନୂଆ ରପ୍ତାନୀ ପାଇଁ ଅର୍ଡର ରଖୁନଥିଲେ । ବଡବଡ ବ୍ୟବସାୟୀମାନେ ସିପମେଣ୍ଟ୍ ଅର୍ଡର ରଖୁଥିଲେ ବି ସେତେଟା ଲାଭ ହେଉନଥିଲା ।

ଏବେ ଉଭୟ ଦେଶ ମଧ୍ୟରେ ନୂଆ ବ୍ୟବସାୟ ବୁଝାମଣା ପରେ ଭାରତୀୟ ବସ୍ତୁର ଚାହିଦା ବଢିଛି । ଏହା ଅନ୍ୟ ଦେଶର ଜିନିଷକୁ କଡା ଟକ୍କର ଦେବା ଆରମ୍ଭ କରିଛି । ଭାରତ ଉପରେ ଏବେ ୧୮ ପ୍ରତିଶତ ଟାରିଫ୍ ଲାଗିବ । ପୂର୍ବରୁ ଏହା ୨୫ ପ୍ରତିଶତ ଥିଲା । ଏହାଦ୍ୱାରା ଅନ୍ୟ ଦେଶର କାରବାର ତୁଳନାରେ ଭାରତର ବସ୍ତୁ ଅଧିକ ପ୍ରତିଦ୍ୱନ୍ଦ୍ୱିତା କରିପାରିବ ।

ଭାରତର ରପ୍ତାନୀ ହେଉଥିବା ପୋଷାକ ଉପରେ ଏବେ ୧୮ ପ୍ରତିଶତ ଟାରିଫ୍ ଲାଗିବ । ଯାହା ବାଂଲାଦେଶ ଏବଂ ଶ୍ରୀଲଙ୍କା ଉପରେ ଲଗାଯାଇଥିବା ଟାରିଫ୍ ତୁଳନାରେ କମ୍ । ଏହାଛଡା ଭାରତୀୟ କାରପେଟ୍ ମଧ୍ୟ ପୂର୍ବରୁ ନିଜର ଚାହିଦା ହରାଇଥିଲା । ଏବେ ପୁଣି ଏହାର ଡିମାଣ୍ଡ୍ ବଢିବ । ଗହଣା ସମେତ ଅନ୍ୟ ଅଳଙ୍କାର ଆମେରିକା ବଜାରରେ ଅନ୍ୟଦେଶର ସାମଗ୍ରୀ ଅନୁସାରେ ଶସ୍ତା ହୋଇଯିବ । ଯାହା ଭାରତୀୟ ବ୍ୟବସାୟୀଙ୍କୁ ଭଲ ଲାଭ ଦେବ । ତେବେ ଅଟୋମାବାଇଲ ଶିଳ୍ପରେ କେତେ ଲାଭ ହେବ ତାହା ଏଯାଏଁ ସ୍ପଷ୍ଟ ହୋଇନାହିଁ । ବୁଝାମଣା ସମ୍ବନ୍ଧୀୟ ସମସ୍ତ ତଥ୍ୟ ଆସିଲେ ଏଥିରେ ସ୍ପଷ୍ଟତା ମିଳିବ ।

ଗତ ଏପ୍ରିଲରୁ ନଭେମ୍ବର ମଧ୍ୟରେ ଭାରତର ଆମେରିକାକୁ ରପ୍ତାନୀରେ ୧୧.୩ ପ୍ରତିଶତ ବୃଦ୍ଧି ଘଟିଥିଲା । ଯାହାର ମୂଲ୍ୟ ପ୍ରାୟ ୫୯ ବିଲିୟନ ଡଲାର ହେବ । କେବଳ ସ୍ମାର୍ଟଫୋନ୍ ୧୬.୭ ବିଲିୟନ ଡଲାରର ରପ୍ତାନୀ ହୋଇଛି । ଇଲେକ୍ଟ୍ରୋନିକ୍ସ ଏବଂ ଫାର୍ମା ମଧ୍ୟ ଭଲ ରପ୍ତାନୀ ହୋଇଛି । ଏସବୁ ଉପରେ ଟାରିଫର ପ୍ରଭାବ ପଡିନାହିଁ ।

ଦୁଇ ଗଣତନ୍ତ୍ରକୁ ଯୋଗାଇବ ଶକ୍ତି

କେନ୍ଦ୍ରମନ୍ତ୍ରୀ ଅମିତ ଶାହ ସୋସିଆଲ ସାଇଟ୍ ଏକ୍ସରେ କହିଛନ୍ତି ଯେ, ଭାରତ ଏବଂ ଆମେରିକା ମଧ୍ୟରେ ହୋଇଥିବା ଡିଲ୍ ନୂଆ ସୁଯୋଗ ସୃଷ୍ଟି କରିବ । ଆମେରିକା ଟାରିଫକୁ ୧୮ ପ୍ରତିଶତକୁ କମାଇଦେଇଛି । ଏହା ଦୁଇ ଦେଶ ପାଇଁ ସହାୟକ ହେବ ।

ସେହିପରି କେନ୍ଦ୍ର ବାଣିଜ୍ୟ ଏବଂ ଶିଳ୍ପ ମନ୍ତ୍ରୀ ପିୟୁଷ ଗୋୟଲ କହିଛନ୍ତି ଯେ, ଭାରତ ଏବଂ ଆମେରିକା ହେଉଛନ୍ତି ପାରମ୍ପରିକ ମିତ୍ର । ଉଭୟଙ୍କ ଏକାଠି ପ୍ରଯୁକ୍ତିବିଦ୍ୟା, ବିକାଶ, ଶାନ୍ତି ଏବଂ ସମୃଦ୍ଧି ଦିଗରେ କାମ କରୁଛନ୍ତି । ଯାହା ଭାରତ ଏବଂ ଆମେରିକାର ଭବିଷ୍ୟତର ପାଇଁ ଖୁବ୍ ଭଲ ହେବ ବୋଲି ସେ କହିଛନ୍ତି ।