ହେଲିକପ୍ଟର, ସଶସ୍ତ୍ର ଯାନ... ଛୋଟେଇ ଚାଲୁଥିବା ମାଦୁରୋଙ୍କୁ ଏଭଳି ନ୍ୟୁୟର୍କ କୋର୍ଟକୁ ନେଲା DEA

ନୂଆଦିଲ୍ଲୀ: ଭେନେଜୁଏଲାରୁ ଗିରଫ ନେତା ନିକୋଲାସ ମାଦୁରୋ ସୋମବାର ଆମେରିକୀୟ କୋର୍ଟରେ ହାଜର ହୋଇଛନ୍ତି । କାରାକାସରେ ତାଙ୍କର ନାଟକୀୟ ଗିରଫଦାରୀର ୩ ଦିନ ପରେ ଏହି ଘଟଣା ଘଟିଛି। ୬୩ ବର୍ଷୀୟ ମାଦୁରୋଙ୍କୁ ହେଲିକପ୍ଟର ଯୋଗେ ମାନହାଟନ ଫେଡେରାଲ କୋର୍ଟ ନିକଟସ୍ଥ ଏକ ହେଲିପୋର୍ଟକୁ ନିଆଯାଇଥିଲା ଏବଂ ସେଠାରୁ ତାଙ୍କୁ ଏକ ସଶସ୍ତ୍ର ଯାନରେ ସ୍ଥାନାନ୍ତର କରାଯାଇଥିଲା।

ମାଦୁରୋ ଧୂସର କାରାଗାର ପୋଷାକ ଏବଂ କମଳା ରଙ୍ଗର ଜୋତା ପିନ୍ଧିଥିଲେ ।  ତାଙ୍କୁ ଡ୍ରଗ୍ ଏନଫୋର୍ସମେଣ୍ଟ (DEA) ଏଜେଣ୍ଟମାନେ କୋର୍ଟକୁ ନେଇଯାଇଥିଲେ।  ଏହି ସମୟରେ ମାଦୁରୋ ଛୋଟେଇ ଛୋଟେଇ ଚାଲୁଥିବା ଦେଖିବାକୁ ମିଳିଥିଲା । 

ଏହା ପୂର୍ବରୁ ବ୍ରୁକଲିନର ମେଟ୍ରୋପଲିଟାନ୍ ଡିଟେନସନ୍ ସେଣ୍ଟରରୁ ଏକ କାରକେଡ୍‌ ବାହାରିଥିଲା । ସେଠାରେ ମାଦୁରୋ ଆମେରିକାରେ ପହଞ୍ଚିବା ପରଠାରୁ ଡ୍ରଗ୍ସ ଏବଂ ଅସ୍ତ୍ରଶସ୍ତ୍ର ଚୋରାଚାଲାଣ ଅଭିଯୋଗରେ ବନ୍ଦୀ ଅଛନ୍ତି। ଆଜି ପରେ ତାଙ୍କୁ କୋର୍ଟରେ ଆନୁଷ୍ଠାନିକ ଭାବରେ ନାର୍କୋଟ୍ରାଫିକ୍ ଅଭିଯୋଗର ସମ୍ମୁଖୀନ ହେବାକୁ ପଡିବ ବୋଲି ଆଶା କରାଯାଉଛି। ସପ୍ତାହାନ୍ତରେ କାରାକାସରେ ଏକ ଆଶ୍ଚର୍ଯ୍ୟଜନକ ଆମେରିକୀୟ ସାମରିକ ଅଭିଯାନରେ ଗିରଫ ହୋଇଥିଲେ ମାଦୁରୋ। ସେଠାରୁ ତାଙ୍କୁ ନ୍ୟୁୟର୍କ ନିଆଯାଇଥିଲା । 

ଏହି ମାମଲାଟି ନ୍ୟୁୟର୍କ କୋର୍ଟର ବିଚାରପତି ଆଲଭିନ୍ କେ. ହେଲେର୍ଷ୍ଟାଇନଙ୍କୁ ଦିଆଯାଇଛି। ୧୯୯୮ ମସିହାରେ ରାଷ୍ଟ୍ରପତି ବିଲ୍ କ୍ଲିଣ୍ଟନ୍ ଦ୍ୱାରା ମନୋନୀତ ଏବଂ ୨୦୧୧ ମସିହାରୁ ଜଣେ ବରିଷ୍ଠ ବିଚାରପତି ହେଲେର୍ଷ୍ଟାଇନ୍ କୋର୍ଟର ସବୁଠାରୁ ଅଭିଜ୍ଞ ଜଜଙ୍କ ମଧ୍ୟରୁ ଜଣେ।

ସେ  ହାଇ-ପ୍ରୋଫାଇଲ୍ ଆତଙ୍କବାଦ ଏବଂ ଜାତୀୟ ସୁରକ୍ଷା ମାମଲାଗୁଡ଼ିକର ଅଧ୍ୟକ୍ଷତା କରିଛନ୍ତି।  ସେ ଭେନେଜୁଏଲାର ପୂର୍ବତନ ଗୁପ୍ତଚର ମୁଖ୍ୟ ହୁଗୋ କାର୍ଭାଜଲ୍ ବାରିଓସ୍ ସହିତ ଜଡିତ ମାମଲାରେ ବିଚାରପତି ଥିଲେ ।  ତାଙ୍କ ସମ୍ମୁଖରେ ନାର୍କୋ-ଆତଙ୍କବାଦ-ସମ୍ବନ୍ଧୀୟ ଅଭିଯୋଗ ପାଇଁ ଦୋଷୀ ସାବ୍ୟସ୍ତ ହୋଇଥିଲେ କାର୍ଭାଜଲ୍ ବାରିଓସ୍।