ଡିଜିଟାଲ୍ ଆରେଷ୍ଟ ଉପରେ ସୁପ୍ରିମକୋର୍ଟଙ୍କ ବଡ଼ ରାୟ, ଦେଶର ସମସ୍ତ ମାମଲାର ତଦନ୍ତ କରିବ ସିବିଆଇ

ନୂଆଦିଲ୍ଲୀ: ଡିଜିଟାଲ୍ ଆରେଷ୍ଟ ମାମଲାରେ ସୁପ୍ରିମକୋର୍ଟ ଏକ ବଡ଼ ଆଦେଶ ଦେଇଛନ୍ତି । ସର୍ବୋଚ୍ଚ ଅଦାଲତ ସାରା ଦେଶରେ ଡିଜିଟାଲ୍ ଆରେଷ୍ଟ ମାମଲାର ତଦନ୍ତ ସିବିଆଇକୁ ହସ୍ତାନ୍ତର କରିଛନ୍ତି । ସବୁ ରାଜ୍ୟର ପୋଲିସକୁ କେନ୍ଦ୍ରୀୟ ଏଜେନ୍ସିକୁ ସହଯୋଗ କରିବା ପାଇଁ ନିର୍ଦ୍ଦେଶ ଦେଇଛନ୍ତି । ଆଇବିଆଇକୁ ନୋଟିସ୍ ଜାରି କରି ଏହି ମାମଲାରେ ପକ୍ଷଭୁକ୍ତ କରାଯାଇଛି । ସୁପ୍ରିମକୋର୍ଟ ଦୁଇ ସପ୍ତାହ ପରେ ପୁଣି ଥରେ ମାମଲାର ଶୁଣାଣି କରିବେ । ଏହା ବ୍ୟତୀତ ଆଇଟି ମଧ୍ୟସ୍ଥି ନିୟମ ୨୦୨୧ ଅଧିନରେ ଅଧିକାରୀ ସିବିଆଇକୁ ପୂର୍ଣ୍ଣ ସହଯୋଗ ପ୍ରଦାନ କରିବେ ।

ପ୍ରଧାନ ବିଚାରପଚି ଜଷ୍ଟିସ ସୂର୍ଯ୍ୟକାନ୍ତ ଆଦେଶ ଦେଇ କହିଛନ୍ତି ଯେ ଅଧିକାଂଶ ରାଜ୍ୟ ଗୋଟିଏ ସ୍ୱରରେ କହିଛନ୍ତି ଯେ ଅଧିକାଂଶ ବରିଷ୍ଠ ନାଗରିକଙ୍କୁ ବିଭିନ୍ନ ଉପାୟରେ ଟାର୍ଗେଟ୍ କରାଯାଉଛି । ସିଜେଆଇ କହିଛନ୍ତି କୋର୍ଟଙ୍କୁ ଅବଗତ କରାଯାଇଥିବା ଘଟଣାରେ ପ୍ରାଥମିକ ତଦନ୍ତ ପରେ, ଏମାଇକସ୍ ସ୍କାମକୁ ତିନି ଶ୍ରେଣୀରେ ବିଭକ୍ତ କରାଯାଇଛି । ଏଥିରେ ଡିଜିଟାଲ୍ ଆରେଷ୍ଟ, ନିବେଶ ଦୁର୍ନୀତି ଓ ସାମୟିକ ନିଯୁକ୍ତି ଜାଲିଆତି ସାମିଲ ରହିଛି । ଏହା ସାଇବର ଅପରାଧର ଗମ୍ଭୀର କ୍ଷେତ୍ର ମଧ୍ୟରୁ ଗୋଟିଏ, ଯେଉଁଥିରେ ଜୋରଜବରଦସ୍ତ ଟଙ୍କା ଆଦାୟ କରାଯାଇଥାଏ, କିମ୍ୱା ମୋଟ ଅର୍ଥରାଶି ଜମା କରିବା ଲାଗି ପ୍ରଲୋଭିତ କରି ଠକେଇ କରିଥାନ୍ତି ।

ଆଦେଶ ଅନୁସାରେ ଯେଉଁ ରାଜ୍ୟଗୁଡ଼ିକ ସିବିଆଇକୁ ସହମତି ଦେଇ ନାହାନ୍ତି, ସେମାନେ ନିଜ ଅଧିକାର କ୍ଷେତ୍ରରେ ଆଇଟି ଅଧିନିୟମ ୨୦୨୧ ଅନ୍ତର୍ଗତରେ ତଦନ୍ତ ପାଇଁ ସହମତି ପ୍ରଦାନ କରିବେ । ଯାହା ଦ୍ୱାରା ସିବିଆଇ ସାରା ଭାରତରେ ବ୍ୟାପକ ତଦନ୍ତ କରିପାରିବ । ଏହାସହ ଅପରାଧର ଗମ୍ଭୀରତା ଓ କ୍ଷେତ୍ରୀୟ ଅଧିକାର ଆମ ସୀମା ବାହାରେ ରହିଥିବାରୁ, ଆବଶ୍ୟକ ସ୍ଥଳେ ସିବିଆଇକୁ ଇଣ୍ଟରପୋଲଠାରୁ ସହାୟତା ନେବା ପାଇଁ କୁହାଯାଇଛି ।

ସିମ୍ ଜାରି କରିବା ବେଳେ ଅବହେଳା ଓ ସତକର୍ତ୍ତା ଅବଲମ୍ୱନ କରା ନଯିବା କ୍ଷେତ୍ରରେ କାର୍ଯ୍ୟାନୁଷ୍ଠାନ ପାଇଁ ଦୂରସଂଚାର ବିଭାଗକୁ କୋର୍ଟଙ୍କ ସାମନାରେ ଏକ ପ୍ରସ୍ତାବ ପ୍ରସ୍ତୁତ କରିବା ପାଇଁ ନିର୍ଦ୍ଦେଶ ଦିଆଯାଇଛି । ଏହି ଆଦେଶ ପରେ ସିମ୍ କାର୍ଡ ଦୁରୁପଯୋଗକୁ ରୋକିବା ପାଇଁ ସମସ୍ତ ଦୂରସଂଚାର ସେବା ପ୍ରଦାନକାରୀଙ୍କୁ ଏହା ଲାଗୁ କରିବାକୁ ପଡ଼ିବ ।

ଏହା ବ୍ୟତୀତ ସିବିଆଇକୁ ପିସିଏ ଅଧିନରେ ସେହି ବ୍ୟାଙ୍କରଙ୍କ ଭୂମିକା ଯାଞ୍ଚ ପାଇଁ ପୂରା ଅଧିକାର ଦେଇଛନ୍ତି, ଯେଉଁଥିରେ ଡିଜିଟାଲ୍ ଆରେଷ୍ଟ ଦୁର୍ନୀତି ପାଇଁ ବ୍ୟାଙ୍କ ଆକାଉଣ୍ଟ ଖୋଲା ଯାଇଛି । ସୁପ୍ରିମକୋର୍ଟ କହିଛନ୍ତି ଯେ ଆରବିଆଇକୁ ଏହି ନ୍ୟାୟାଳୟର ସହାୟତା କରିବା ପାଇଁ ପକ୍ଷଭୁକ୍ତ କରାଯାଇଛି । ସେହିପରି ଦୁର୍ନୀତିରେ ବ୍ୟବହୃତ ଆକାଉଣ୍ଟ ଓ ଅପରାଧିକ ଆୟ ରୋକିବା ପାଇଁ ଏଆଇ/ ମେସିନ ଲର୍ଣ୍ଣିଂ ଲାଗୁ କରିବା ପାଇଁ ଆରବିଆଇକୁ ନିର୍ଦ୍ଦେଶ ଦେଇଛନ୍ତି ।