ଖାକି ପୋଷାକ ପିନ୍ଧି ଶିକ୍ଷକଙ୍କ ଘରୁ ଲୁଟ୍ : 'ଆମେ ପୋଲିସ, ତୁମ ନାଁରେ ଓ୍ୱାରେଣ୍ଟ୍ ଅଛି' କହି ନେଇଗଲେ ୧୫ ଲକ୍ଷର ଗହଣା

ପାଟନା, ୦୯/୧୨: ପୋଲିସ ବେଶରେ ଲୁଟ୍ । ଖାକି ପୋଷାକ ପିନ୍ଧି ଆସିଲେ ସୁନା ଗହଣା ନେଇ ପଳାଇଲେ । ଚୋରଙ୍କ ଏପରି କାରନାମା ବିହାରର ପାଟନାରେ ସାମ୍ନାକୁ ଆସିଛି । ସିମରାତାଲା ଥାନା ଅଞ୍ଚଳରେ ଘଟିଥିବା ଘଟଣା ରାଜ୍ୟରେ ଆଇନଶୃଙ୍ଖଳା ପରିସ୍ଥିତି ଉପରେ ପ୍ରଶ୍ନବାଚୀ ସୃଷ୍ଟି କରିଛି । 

ରିପୋର୍ଟ ଅନୁସାରେ, ସୋମବାର ସକାଳେ ଏହି ଘଟଣା ଘଟିଛି । ସିମରତାଲାର ତେଲଓ୍ୱା ବଜାର ଅଞ୍ଚଳରେ ଶିକ୍ଷକ ସଞ୍ଜୀବ କୁମାର ଦୀର୍ଘ ଦିନ ହେବ ରହି ଆସୁଛନ୍ତି । ତେବେ ସୋମବାର ସକାଳ ୬ଟା ୩୫ରେ ତାଙ୍କ ଘରକୁ ୬ଜଣ ବ୍ୟକ୍ତି ଆସିଥିଲେ । ସେମାନେ ଖାକି ପୋଷାକ ପିନ୍ଧିଥିବା ବେଳେ ନିଜକୁ ପୋଲିସ ବୋଲି ପରିଚୟ ଦେଇଥିଲେ । ସେମାନଙ୍କ ପାଖରେ ପୋଲିସ ଲାଠି ଏବଂ ପିସ୍ତଲ ମଧ୍ୟ ରହିଥିଲା ।

ସଞ୍ଜୀବ ଘରେ ଏକା ଥିବା ବେଳେ ସେମାନେ ଆସି ତୁମ ବିରୋଧରେ ଓ୍ୱାରେଣ୍ଟ୍ ଜାରି ହୋଇଛିବୋଲି କହିଥିଲେ । ଏହାସହ ଘରର ଆଲମାରୀ ଏବଂ ବାକ୍ସ ଖୋଲି ଖୋଜାଖୋଜି କରିଥିଲେ । ଆଲମାରୀରେଝିଅରବିବାହ ପାଇଁ ରଖାଯାଇଥିବା ସୁନା ଅଳଙ୍କାର ସେମାନେନେଇଯାଇଥିଲେ । ଏସମସ୍ତ ଅଳଙ୍କାର ତାଙ୍କ ପତ୍ନୀ ଏବଂ ଝିଅଙ୍କର ଥିଲା ।ଏସବୁର ମୂଲ୍ୟ ପ୍ରାୟ ୧୫ ଲକ୍ଷ ଟଙ୍କା ବୋଲି ଜଣାପଡିଛି ।

ଘଟଣା ଜାଣିବା ପରେ ସିମରତାଲା ପୋଲିସ ସଞ୍ଜୀବଙ୍କ ଘରେ ପହଁଚିଥିଲା । ଆଖପାଖରେ ଥିବା ସିସିଟିବି ଫୁଟେଜ ଆଧାରରେ ତଦନ୍ତ ଜାରି ରହିଛି । ଲୁଟେରାମାନେ ବ୍ୟବହାର କରୁଥିବା ଗାଡିକୁ ଟ୍ରାକ୍ ମଧ୍ୟ କରାଯାଉଥିବା ସ୍ଥାନୀୟ ପୋଲିସ ଅଧିକାରୀ କହିଛନ୍ତି ।

ସ୍ଥାନୀୟ ଲୋକେ କହିଛନ୍ତି ଯେ, ସକାଳେ ଏବଂ ଦିନରେ ଅଧିକ ଅପରାଧ ଘଟୁଛି । ଲୁଟେରାମାନେ ପୋଲିସକୁ ଖାତିର କରୁନାହାଁନ୍ତି । ଏସବୁ ରୋକିବା ପାଇଁ ପୋଲିସ ପାଟ୍ରୋଲିଂ ଜୋରଦାର କରିବା ନେଇ ସେମାନେ ମତ ଦେଇଛନ୍ତି ।