ବ୍ରାଜିଲର ପୂର୍ବତନ ରାଷ୍ଟ୍ରପତି ବୋଲସୋନାରୋ ଗିରଫ; ଜେଲ୍‌ର କାଳ କୋଠରୀରେ ରହିବେ ୨୭ ବର୍ଷ

ବ୍ରାସିଲିଆ: ବ୍ରାଜିଲର ଫେଡେରାଲ ପୁଲିସ ଶନିବାର ପୂର୍ବତନ ରାଷ୍ଟ୍ରପତି ଜାଇର ବୋଲସୋନାରୋଙ୍କୁ ଗିରଫ କରିଛି। ତାଙ୍କର ୨୭ ବର୍ଷର ଜେଲ ଦଣ୍ଡ ଆସନ୍ତା ସପ୍ତାହରୁ ଆରମ୍ଭ ହେବାକୁ ଯାଉଛି। ଗିରଫଦାରୀ ପରେ, ୭୦ ବର୍ଷୀୟ ବୋଲସୋନାରୋଙ୍କୁ ରାଜଧାନୀ ବ୍ରାସିଲିଆର ପୁଲିସ ମୁଖ୍ୟାଳୟକୁ ନିଆଯାଇଛି। ବୋଲସୋନାରୋ ୨୦୧୯ ରୁ ୨୦୨୨ ପର୍ଯ୍ୟନ୍ତ ବ୍ରାଜିଲର ରାଷ୍ଟ୍ରପତି ଥିଲେ।

ବୋଲସୋନାରୋଙ୍କ ନାମ ନନେଇ, ପୁଲିସ ବାହିନୀ ବିବୃତ୍ତିରେ କହିଛି ଯେ, ଏହା ବ୍ରାଜିଲର ସୁପ୍ରିମକୋର୍ଟଙ୍କ ନିର୍ଦ୍ଦେଶ ଅନୁସାରେ କାର୍ଯ୍ୟ କରିଛି। ବ୍ରାଜିଲର ଫେଡେରାଲ ପୁଲିସ ଏବଂ ସୁପ୍ରିମକୋର୍ଟ ଏହି ମାମଲାରେ ଆଉ କୌଣସି ସୂଚନା ଦେଇ ନାହାନ୍ତି। ବୋଲସୋନାରୋଙ୍କ ସହଯୋଗୀ ଆଣ୍ଡ୍ରେଲି ସିରିନୋ କହିଛନ୍ତି ଯେ, ଶନିବାର ସକାଳ ପ୍ରାୟ ୬ଟାରେ ବୋଲସୋନାରୋଙ୍କୁ ଗିରଫ କରାଯାଇଛି ।

୨୦୨୨ ନିର୍ବାଚନରେ ହାରିବା ପରେ ବୋଲସୋନାରୋ ଏକ ବିଦ୍ରୋହ କରିବାକୁ ପ୍ରୟାସ କରିଥିଲେ । ଏଥି ପାଇଁ ସୁପ୍ରିମକୋର୍ଟ ତାଙ୍କୁ ଦୋଷୀ ସାବ୍ୟସ୍ତ କରିଥିଲେ। ସେପ୍ଟେମ୍ବରରେ ବୋଲସୋନାରୋଙ୍କୁ ୨୭ ବର୍ଷ ଜେଲଦଣ୍ଡ ଦିଆଯାଇଥିଲା। ସ୍ଥାନୀୟ ଗଣମାଧ୍ୟମ ପୂର୍ବରୁ ରିପୋର୍ଟ କରିଥିଲା ଯେ, ୭୦ ବର୍ଷୀୟ ନେତା ସମସ୍ତ ଆବେଦନ ସମାପ୍ତ କରି ଆସନ୍ତା ସପ୍ତାହରେ ତାଙ୍କ ଦଣ୍ଡାଦେଶ ପାଳନ କରିବାକୁ ସ୍ଥିର କରିଥିଲେ।

ଗତ ଅଗଷ୍ଟରେ ତାଙ୍କୁ ଗୃହବନ୍ଦୀ କରାଯାଇଥିଲା । ଏହା ପରେ ତାଙ୍କୁ ଗିରଫ କରାଯାଇଥିବା କୁହାଯାଉଛି । ସେପଟେ ବୋଲସୋନାରୋଙ୍କୁ ତାଙ୍କ ଘରେ ବନ୍ଦୀ ଜୀବନ କାଟିବାକୁ ଅନୁମତି ଦିଆଯିବା ଉଚିତ ବୋଲି ତାଙ୍କର ଓକିଲ ଦାବି କରିଛନ୍ତି । ଦୀର୍ଘ ଦିନ ଜେଲ୍ରେ ରହିଲେ ବୋଲସୋନାରୋଙ୍କ ସ୍ବାସ୍ଥ୍ୟବସ୍ଥା ଖରାପ ହୋଇପାରେ ବୋଲି ତାଙ୍କ ଦଳ ଆଶଙ୍କା ପ୍ରକାଶ କରିଛି ।