ଅଷ୍ଟ୍ରେଲିଆକୁ ହରାଇ ବିଶ୍ୱ ରେକର୍ଡ କଲା ଭାରତ: ବିଶ୍ୱର ପ୍ରଥମ ଟିମ୍ ଭାବେ ହାସଲ କଲା ଏହି ସଫଳତା

ନୂଆଦିଲ୍ଲୀ: ଅଷ୍ଟ୍ରେଲିଆକୁ ୫ ୱିକେଟରେ ହରାଇ ଦିନିକିଆ ବିଶ୍ୱକପ୍ ଫାଇନାଲରେ ପହଞ୍ଚିଲା ଭାରତୀୟ ମହିଳା କ୍ରିକେଟ ଦଳ। ଏହାକୁ ମିଶାଇ ଭାରତ ୩ ଥର ଫାଇନାଲ୍‌କୁ ପ୍ରବେଶ କରିଛି। ତେବେ ଏଥର କିନ୍ତୁ ଅଷ୍ଟ୍ରେଲିଆ ବିରୋଧରେ ହୋଇଥିବା ଏହି ବିଜୟ ଖୁବ୍ ଖାସ୍‌। କାରଣ ଭାରତ ବିଶ୍ୱକପ୍‌ରେ ପ୍ରଥମ ଟିମ୍ ଭାବେ ଏତେବଡ଼ ସ୍କୋର ଚେଜ୍ କରି  ଜିତିଛି। ଭାରତୀୟ ଦଳ ଏବେ ନଭେମ୍ବର ୨ ତାରିଖରେ ଫାଇନାଲରେ ଦକ୍ଷିଣ ଆଫ୍ରିକା ସହିତ ମୁକାବିଲା କରିବ।

ଆଜିର ମ୍ୟାଚ୍‌ ମହିଳା ବିଶ୍ୱକପ୍ ଇତିହାସରେ ସର୍ବାଧିକ ରନ ଚେଜ୍। ସେମିଫାଇନାଲରେ ପ୍ରଥମେ ବ୍ୟାଟିଂ କରି ଅଷ୍ଟ୍ରେଲିଆ ୩୩୮ ରନର ବିଶାଳ ସ୍କୋର କରିଥିଲା। ଜେମିମା ରୋଡ୍ରିଗ୍ଜଙ୍କ ଅପରାଜିତ ୧୨୭ ରନ ଏବଂ ହରମନପ୍ରୀତ କୌରଙ୍କ ୮୯ ରନ ଯୋଗୁ ଭାରତ ୯ ବଲ ବାକି ଥାଇ ଲକ୍ଷ୍ୟ ହାସଲ କରି ନେଇଛି। ମହିଳା ବିଶ୍ୱକପ୍ ଇତିହାସରେ ଦ୍ୱିତୀୟ ଥର ପାଇଁ ଭାରତ ସେମିଫାଇନାଲରେ ଅଷ୍ଟ୍ରେଲିଆକୁ ପରାସ୍ତ କରିଛି। ଏହା ପୂର୍ବରୁ ୨୦୧୭ ବିଶ୍ୱକପରେ ଭାରତ ଅଷ୍ଟ୍ରେଲିଆକୁ ୩୬ ରନରେ ହରାଇଥିଲା।

ଆଜିର ମ୍ୟାଚ୍‌ରେ ଭାରତ କରିଥିବା ବିଶ୍ୱ ରେକର୍ଡ

ଏହା ମହିଳା ବିଶ୍ୱକପ୍ ଇତିହାସରେ କୌଣସି ଟିମ୍ ଦ୍ୱାରା ଚେଜ୍ କରାଯାଇଥିବା ସବୁଠାରୁ ବଡ଼ ସ୍କୋର। ଏହା ପୂର୍ବରୁ ସବୁଠାରୁ ବଡ଼ ସ୍କୋର ଚେଜ୍ କରିବାର ରେକର୍ଡ ଅଷ୍ଟ୍ରେଲିଆ ନାଁରେ ରହିଥିଲା। ଚଳିତ ବିଶ୍ୱକପରେ ଭାରତ ଛିଡ଼ା କରିଥିବା ବିଶାଳ ୩୩୧ ରନର ଟାର୍ଗେଟକୁ ଅଷ୍ଟ୍ରେଲିଆ ସଫଳ  ଭାବେ ପିଛା କରି ପାରିଥିଲା। ବିଶ୍ୱକପରେ ଦ୍ୱିତୀୟ ଥର ପାଇଁ କୌଣସି ଟିମ୍ ୩୦୦ରୁ ଅଧିକ ରନ ଚେଜ୍ କରିବାରେ ସଫଳ ହୋଇଛି। ଆଉ ଦୁଇଟିଯାକ ରେକର୍ଡ ଚଳିତ ବିଶ୍ୱକପ୍‌ରେ ହୋଇଛି।
ସର୍ବାଧିକ ରନ ଚେଜ୍ କରିଥିବା ଦଳ
୩୩୯ ରନ - ଭାରତ (ବନାମ ଅଷ୍ଟ୍ରେଲିଆ)
୩୩୧ ରନ - ଅଷ୍ଟ୍ରେଲିଆ (ବନାମ ଭାରତ)
୨୭୮ ରନ - ଅଷ୍ଟ୍ରେଲିଆ (ବନାମ ଭାରତ)
୨୭୫ ରନ - ଦକ୍ଷିଣ ଆଫ୍ରିକା (ବନାମ ଭାରତ)​​​​​​​

୩୩୯ ରନର ଟାର୍ଗେଟ ପିଛା କରି ଭାରତ ଦଳୀୟ ସ୍କୋର ୫୯ ବେଳେ ସ୍ମୃତି ମନ୍ଧାନା (୨୪ ରନ) ଏବଂ ସେଫାଳୀ ବର୍ମା (୧୦ ରନ)ଙ୍କ ୱିକେଟ ହରାଇଥିଲା। ଏହାପରେ ଜେମିମାହ ରଡ୍ରିଗ୍ସ ଏବଂ ହରମନପ୍ରୀତ କୌର ଏକ ଐତିହାସିକ ୧୬୭ ରନର ପାର୍ଟନର୍ସିପ୍‌ କରି ଭାରତକୁ ବିଜୟର ନିକଟତର କରାଇଥିଲେ। ଏହି ସମୟରେ ହରମନପ୍ରୀତ ଏବଂ ରଡ୍ରିଗ୍ସଙ୍କୁ ମଧ୍ୟ ଅନେକ ଜୀବନଦାନ ମିଳିଥିଲା।

ହରମନପ୍ରୀତ ୩୬ତମ ଓଭରରେ ଏକ ବଡ଼ ଶଟ୍ ଖେଳିବାକୁ ଚେଷ୍ଟା କରୁଥିବା ବେଳେ ୮୯ ରନ କରି ଆଉଟ ହୋଇଥିଲେ। ଏହାପରେ ବିଜୟର ଭାର ଆସିଥିଲା ରୋଡ୍ରିଗ୍ଜଙ୍କ ପାଖକୁ। ପ୍ରଥମେ, ସେ ଦୀପ୍ତି ଶର୍ମାଙ୍କ ସହ ୩୮ ରନ ଯୋଡିଥିଲେ, ଏବଂ ପରେ ରିଚା ଘୋଷଙ୍କ ସହିତ ଏକ ଛୋଟ କିନ୍ତୁ ଗୁରୁତ୍ୱପୂର୍ଣ୍ଣ ୪୬ ରନର ପାର୍ଟନର୍ସିପ୍ କରିଥିଲେ। ୧୬୨ ଷ୍ଟ୍ରାଇକ୍ ରେଟରେ ରିଚା ଘୋଷଙ୍କ ୨୬ ରନର ଯୋଗଦାନ ଭାରତକୁ ବିଜୟର ନିକଟତର କରିବାରେ ଗୁରୁତ୍ୱପୂର୍ଣ୍ଣ ଭୂମିକା ଗ୍ରହଣ କରିଥିଲା।

ଅଷ୍ଟ୍ରେଲିଆର ଅଭିଜ୍ଞ ବୋଲିଂ ଦଳ ଶେଷ ଓଭରଗୁଡ଼ିକରେ ଚାପଗ୍ରସ୍ତ ହୋଇଥିବା ପରି ମନେ ହେଲା। ଫିଲ୍ଡର କ୍ୟାଚ୍ ଛାଡ଼ିବା ବି ଦଳ ପାଇଁ କାଳ ହେଲା। ରୋଡ୍ରିଗେଜ ୧୨୭ ରନ୍ କରି ଅପରାଜିତ ନଟ ଆଉଟ୍ ରହିଥିଲେ ବି ବିଜୟୀ ସଟ୍ ଅମନଜୋତ କୌର ମାରିଥିଲେ। ଅମନଜୋତ ୮ ବଲ୍‌ରୁ ୧୫ ରନ୍ କରି ଅପରାଜିତ ରହିଥିଲେ।