ବିକ୍ରି ହୋଇଯିବ ଟ୍ରମ୍ପଙ୍କ ପିଲାଦିନର ଘର, ୧୯୪୦ରେ ତିଆରି କରିଥିଲେ ୟୁଏସ ପ୍ରେସିଡେଣ୍ଟଙ୍କ ବାପା

ନ୍ୟୁୟର୍କ, ୩୦/୧୧:ବିକ୍ରି ହେବ ଟ୍ରମ୍ପଙ୍କ ଘର । ନ୍ୟୁୟର୍କର କୁଇନ୍ସରେ ଡୋନାଲ୍ଡ ଟ୍ରମ୍ପଙ୍କ ପିଲାଦିନ କଟିଥିବା ଘର ଏବେ ବିକ୍ରି ହେବାକୁ ଯାଉଛି । ଯାହାର ବିକ୍ରି ମୂଲ୍ୟ ରହିଛି ୩.୩ ମିଲିୟନ ଆମେରିକୀୟ ଡଲାର ।

ନ୍ୟୁୟର୍କ ଟାଇମ୍ସର ରିପୋର୍ଚ ଅନୁସାରେ, ଘରକୁ ୧୯୪୦ ମସିହାରେ ଟ୍ରମ୍ପଙ୍କ ବାପା ତିଆରି କରିଥିଲେ । ଯାହାର ଛାତ ଗଡାଣିଆ ଥିବା ବେଳେ ଏଥିରେ ଅନେକ କାଠ ଏବଂ ବାଉଁଶ ବ୍ୟବହାର ହୋଇଛି । ଏହାକୁ ଇଂରାଜୀରେ ଟ୍ୟୁଡୋର୍ ଷ୍ଟାଇଲ୍ କୁହାଯାଏ । ସେତେବେଳେ ଟ୍ରମ୍ପଙ୍କ ପିତା ରିଅଲ ଇଷ୍ଟେଟ୍ ବ୍ୟବସାୟରେ ସାମିଲ ଥିଲେ । ୪ ବର୍ଷର ହେବା ଯାଏଁ ଏହି ଘରେ ଡୋନାଲ୍ଡ ଟ୍ରମ୍ପ ରହୁଥିଲେ । ପରେ ତାଙ୍କ ପରିବାର ଲୋକେ ନିକଟରେ ଥିବା ଅନ୍ୟ ଏକ ଘରକୁ ଚାଲିଯାଇଥିଲେ ।

ତେବେ ଏହି ଘରର ଇତିହାସକୁ ଦେଖିଲେ, ଗତ ମାର୍ଚ୍ଚ ମାସରେ ଏହାକୁ ଜଣେ ବ୍ୟବସାୟୀ ଟମି ଲିନ୍ ୮ ଲକ୍ଷ ୩୫ ହଜାର ଡଲାରରେ କ୍ରୟ କରିଥିଲେ । କିଣିବା ପରେ ଘରକୁ ଆମୂଳଚୂଳ ପରିବର୍ତ୍ତନ କରାଯାଇଥିଲା । ଘରଟି ନବୀକରଣ ହୋଇଥିଲା । କାରଣ ଘରେ ରହିବା ଭଳି ଅବସ୍ଥା ନଥିଲା । କାନ୍ଥରୁ ପାଣି ଗଳୁଥିଲା । ପାଇପ୍ ଫାଟି ଯାଇଥିଲା ଏବଂ ବିଦ୍ୟୁତ ସମସ୍ୟା ଦେଖାଦେଉଥିଲା ।

ଲିନଙ୍କ ପୂର୍ବରୁ ଘରଟି ମାଇକେଲ୍ ଡେଭିସଙ୍କ ନାଁରେ ଥିଲା । ସେ ଏହାକୁ ୧.୩୯ ମିଲିୟନ ଡଲାରରେ କ୍ରୟ କରିଥିଲେ । କିନ୍ତୁ କିଣିବା ପରେ ବି ଘରେ କେହି ରହୁନଥିଲା । ଦିନକୁ ଦିନ ଏହା ଅପରିତ୍ୟକ୍ତ ପାଲଟିଥିଲା । ବିଲେଇମାନଙ୍କ ଘର ଭାବେ ସ୍ଥାନୀୟ ଅଞ୍ଚଳରେ ଏହାକୁ ଲୋକେ ଚିହ୍ନିଥିଲେ । କାରଣ ଅନେକ ବିଲେଇ ଏହି ଘରେ ରହୁଥିଲେ ।

ଘରେ ପାଞ୍ଚୋଟି ଶୟନ କକ୍ଷ, ତିନୋଟି ଗାଧୁଆ ଘର, ଦୁଇଟି ମେକଅପ୍ ରୁମ ରହିଛି । ଏହାର ଗ୍ୟାରେଜରେ ଆରାମରେ ଦୁଇଟି କାର୍ ରହିପାରିବ । ନବୀକରଣ ପରେ ରୋଷେଇ ଘର ନୂଆ ରୂପ ପାଇଥିଲା । ମୋଟ୍ ଭାବେ ଘରଟି ୨୫୦୦ ବର୍ଗଫୁଟରେ ତିଆରି ହୋଇଛି । କିଛି ବର୍ଷ ପୂର୍ବରୁ ଟ୍ରମ୍ପଙ୍କ ସମର୍ଥକମାନେ ଘରକୁ କିଛି ଦିନ ଯିବା ଆସିବା କରୁଥିଲେ । ସେମାନଙ୍କ ପାଇଁ ଏଠାରେ ବଡ ବିଶ୍ରାମ ଗୃହ ରହିଛି । ତେବେ ୨୦୧୬ରେ ଏକ ଟିଭି ସାକ୍ଷାତକାରରେ ଟ୍ରମ୍ପ ନିଜର ପିଲାଦିନର ଘରକୁ ମନେ ପକାଇଥିଲେ ।