ମହାରାଷ୍ଟ୍ର ନଗରନିଗମ ନିର୍ବାଚନରେ ମହାୟୁତୀର ବିପୁଳ ବିଜୟ, ବିଜେପି ସବୁଠୁ ବଡ଼ ଦଳ

ମୁମ୍ବାଇ ୯।୨: ମହାରାଷ୍ଟ୍ର ନଗର ପାଳିକା, ମହାନଗର ପାଳିକା ଓଏହା ପରେ ଫେବୃଆରୀ ୭ ତାରିଖରେ ଅନୁଷ୍ଠିତ ପଞ୍ଚାୟତ ସମିତି ନିର୍ବାଚନରେ ମହାୟୁତୀ ବାଜିମାତ କରିଛି। ଏହି ସବୁ ନିର୍ବାଚନରେ ବିଜେପି ରାଜ୍ୟରେ ସବୁଠୁ ବଡ଼ ପାର୍ଟି ଭାବେ ଉଭା ହୋଇଛି। ଏ ପର୍ଯ୍ୟନ୍ତ ମିଳୁଥିବା ରିପୋର୍ଟ ଅନୁସାରେ ୧୨ ଜିଲ୍ଲା ପରିଷଦ ନିର୍ବାଚନରେ ବିଜେପି ୧୨ଟି ଜାକ ଆସନ ପୋଛି ନେଇଛି। ଏଥିରେ ମହାବିକାଶ ଅଘାଡି (ଏମଭିଏ)ର କୌଣସି ଦଳ ଖାତା ଖୋଲି ପାରିନାହାନ୍ତି। ସେହିପରି ଜିଲ୍ଲା ପରିଷଦ ସ୍ତରରେ କଂଗ୍ରେସ, ଶିବସେନା(ୟୁବିଟି), ଏନସିପି(ଶରଦ) ଗୋଷ୍ଠୀ ଗୋଟିଏ ବି ଆସନ ପାଇ ନାହାନ୍ତି।

ଏଥିରେ ପଞ୍ଚାୟତ ସମିତି ନିର୍ବାଚନ କଥା କହିଲେ ପାଖାପାଖି ୧୨୫ଟି ପଞ୍ଚାୟତ ସମିତିରେ ହୋଇଥିବା ନିର୍ବାଚନରେ ମହାୟୁତୀ ଉଲ୍ଲେଖନୀୟ ପ୍ରଦର୍ଶନ କରିଛି। ୧୦୫ଟି ପଞ୍ଚାୟତ ସମିତିରେ ମହାୟୁତୀ ପ୍ରାର୍ଥୀମାନେ ବିଜୟୀ ହୋଇଛନ୍ତି। ସେହିପରି କଂଗ୍ରେସ ଏନସିପି (ଶରଦ) ଓ ଶିବସେନା (ୟୁବିଟି) ମିଳିତ ୨୦ଟି ପଞ୍ଚାୟତ ସମିତି ହାସଲ କରିଛନ୍ତି। ଏଣୁ ରାଜ୍ୟରେ ଏମଭିଏ ପ୍ରତି ଜନସମର୍ଥନ ହ୍ରାସ ହେଉଥିବା ପାଳିକା ନିର୍ବାଚନ ଫଳାଫଳରୁ ସ୍ପଷ୍ଟ ହୋଇଯାଇଛି।

ମହାରାଷ୍ଟ୍ର ଜିଲ୍ଲା ପରିଷଦ ଓ ପଞ୍ଚାୟତ ସମିତି ନିର୍ବାଚନର ଏ ପର୍ଯ୍ୟନ୍ତ ମିଳୁଥିବା ଫଳାଫଳରେ ବିଜେପି ସବୁଠୁ ଶକ୍ତିଶାଳୀ ପାର୍ଟି ରୂପେ ଉଭା ହୋଇଛି। ଏପର୍ଯ୍ୟନ୍ତ ଭୋଟ ଗଣନାରୁ ବିଜେପି ଓ ମେଣ୍ଟ ଦଳ ମହାୟୁତୀ ପ୍ରାର୍ଥୀମାନେ ପ୍ରତିଯୋଗୀଙ୍କ ଠାରୁ ଆଗରେ ଅଛନ୍ତି।ବିଜେପିର ଏପରି ବିଜୟ ମହାରାଷ୍ଟ୍ର ମୁଖ୍ୟମନ୍ତ୍ରୀ ଦେବେନ୍ଦ୍ର ଫଡନବୀଶଙ୍କୁ ଉତ୍ସାହିତ କରିଛି। ନିର୍ବାଚନ ଫଳାଫଳ ନେଇ ଗଣମାଧ୍ୟମ ସହ ଆଲୋଚନାରେ ଫଡନବୀଶ କହିଛନ୍ତି ଯେ ନଗରପାଳିକା, ମହାନଗର ପାଳିକା, ଜିଲ୍ଲା ପରିଷଦ ଓ ପଞ୍ଚାୟତ ସମିତି ନିର୍ବାଚନରେ ବିଜେପି ସବୁଠୁ ବଡ ପାର୍ଟିରେ ପରିଣତ ହୋଇଛି।