୨୦୨୦ରୁ ୨୦୨୪ ମଧ୍ୟରେ ୩୫ ପୁସ୍ତକକୁ ମଞ୍ଜୁରି, ସରକାରଙ୍କ ପାଖରେ ଅଟକିଛି କେବଳ ଜେନେରାଲ୍ ନରୱଣେଙ୍କ ପୁସ୍ତକ

ନୂଆଦିଲ୍ଲୀ: ୨୦୨୦ରୁ ୨୦୨୪ ମଧ୍ୟରେ ପୂର୍ବତନ ସ୍ଥଳ ସେନା ମୁଖ୍ୟ ମନୋଜ ମୁକୁନ୍ଦ ନରୱଣେଙ୍କ ଏକମାତ୍ର ପୁସ୍ତକକୁ ଏବେ ସୁଦ୍ଧା ପ୍ରତିରକ୍ଷା ମନ୍ତ୍ରଣାଳୟରୁ ମଞ୍ଜୁରି ମିଳିନାହିଁ । ଇଣ୍ଡିଆନ ଏକ୍ସପ୍ରେସ ରିପୋର୍ଟରେ ଏହି ଦାବି କରାଯାଇଛି । ଦାବି ଅନୁସାରେ, ୧୭ ସେପ୍ଟେମ୍ବର ୨୦୨୪ରେ, ଦ ଇଣ୍ଡିଆନ ଏକ୍ସପ୍ରେସ ସୂଚନା ଅଧିକାର (RTI) ଅଧୀନରେ ଏହି ବିଷୟ ସହିତ ଜଡିତ ଗୁରୁତ୍ୱପୂର୍ଣ୍ଣ ସୂଚନା ପାଇଥିଲା । ଏହା ଅନୁଯାୟୀ, ୨୦୨୦ରୁ ୨୦୨୪ ମଧ୍ୟରେ ମୋଟ ୩୫ଟି ପୁସ୍ତକ ପ୍ରତିରକ୍ଷା ମନ୍ତ୍ରଣାଳୟକୁ ଅନୁମୋଦନ ପାଇଁ ପଠାଯାଇଥିଲା । ଏଥିମଧ୍ୟରୁ ତିନୋଟି ପୁସ୍ତକକୁ ଏପର୍ଯ୍ୟନ୍ତ ମଞ୍ଜୁରି ଦିଆଯାଇ ନାହିଁ, ଯେଉଁଥିରେ ଜେନେରାଲ ନରୱଣେଙ୍କ ପୁସ୍ତକ ରହିଛି ।

ରିପୋର୍ଟରେ ଦାବି କରାଯାଇଛି, ଇଣ୍ଡିଆନ୍ ଏକ୍ସପ୍ରେସ୍ ପୂର୍ବରୁ ଜାନୁଆରୀ ୫, ୨୦୨୪ରେ ଏହି ପ୍ରସଙ୍ଗ ଉଠାଇଥିଲା, କିନ୍ତୁ ପ୍ରତିରକ୍ଷା ମନ୍ତ୍ରଣାଳୟ କିମ୍ବା ପେଙ୍ଗୁଇନ୍ ରାଣ୍ଡମ୍ ହାଉସ୍ ସେତେବେଳେ କୌଣସି ପ୍ରତିକ୍ରିୟା ଦେଇ ନଥିଲେ । ଆରଟିଆଇ ଉତ୍ତରରେ କୁହାଯାଇଛି ଯେ ବ୍ରିଗେଡିୟର ଜୀବନ ରାଜପୁରୋହିତଙ୍କ ପୁସ୍ତକ, "ଲିଡରସିପ୍ ବିୟଣ୍ଡ୍ ବାରାକ୍ସ" ପ୍ରକ୍ରିୟାରେ ଥିଲା, ଅନ୍ୟ ଦୁଇଟି ପୁସ୍ତକ - ଜେନେରାଲ ନରୱଣେଙ୍କ ଫୋର୍ ଷ୍ଟାର୍ସ ଅଫ୍ ଡେଷ୍ଟିନି ଏବଂ କାର୍ଗିଲ୍ ଯୁଦ୍ଧ ସମୟରେ ସେନା ମୁଖ୍ୟ ଏବଂ ଡିଜିଏମଓ ଥିବା ଜେନେରାଲ ଏନ.ସି. ଭିଜଙ୍କ ପୁସ୍ତକ, "ଆଲୋନ୍ ଇନ୍ ଦି ରିଙ୍ଗ"ର ଡ୍ରାଫ୍ଟ ପ୍ରତିରକ୍ଷା ମନ୍ତ୍ରଣାଳୟକୁ ପଠାଯାଇଥିଲା ।

ଜେନେରାଲ ଏନ.ସି. ଭିଜଙ୍କ ପୁସ୍ତକ, "ଅଲୋନ ଇନ ଦି ରିଙ୍ଗ୍", ମେ ୨୦୨୫ରେ ପ୍ରକାଶିତ ହୋଇଥିଲା । ବ୍ରିଗେଡିୟର ରାଜପୁରୋହିତଙ୍କ ପୁସ୍ତକ ମଧ୍ୟ ଅନୁମୋଦିତ ହୋଇଛି ଏବଂ ପ୍ରକାଶନ ପାଇଁ ଅପେକ୍ଷାରେ ଅଛି । ଏବେ କେବଳ ଜେନେରାଲ ନରୱଣେଙ୍କ ପୁସ୍ତକ ଅନୁମୋଦନ ନପାଇ ରହିଛି ।

ଆରଟିଆଇରୁ ଏହା ମଧ୍ୟ ଜଣାପଡିଛି ଯେ ଅବସରପ୍ରାପ୍ତ ସାମରିକ ଅଧିକାରୀଙ୍କ ଦ୍ୱାରା ଲିଖିତ ଅନେକ ପୁସ୍ତକ ସରକାରଙ୍କ ନିକଟରେ ମଞ୍ଜୁରି ପାଇଁ ଦାଖଲ କରାଯାଇଛି । ତଥ୍ୟ ଅନୁଯାୟୀ, ୨୦୨୦ ମସିହାରେ ଗୋଟିଏ ଡ୍ରାଫ୍ଟ ଦାଖଲ କରାଯାଇଥିଲା । ୨୦୨୧ ମସିହାରେ କୌଣସି ପାଣ୍ଡୁଲିପି ଦାଖଲ କରାଯାଇ ନଥିଲା । ୨୦୨୨ ମସିହାରେ ଚାରୋଟି ପୁସ୍ତକ ଅନୁମୋଦନ ପାଇଁ ଦାଖଲ କରାଯାଇଥିଲା, ୨୦୨୩ ମସିହାରେ ୧୬ଟି ଡ୍ରାଫ୍ଟ ସରକାରଙ୍କ ନିକଟରେ ପହଞ୍ଚିଥିଲା ।