ଦେଶରେ କଂଗ୍ରେସ ଆରମ୍ଭ କରିବ ‘ମନରେଗା’ ବଞ୍ଚାଅ ଆନ୍ଦୋଳନ, ଭିବି-ଜି ରାମ ଜି କୁ କୋର୍ଟରେ କରିବ ଚ୍ୟାଲେଞ୍ଜ

ନୂଆଦିଲ୍ଲୀ ୩।୧: ଆଗାମୀ ସପ୍ତାହରୁ ଦେଶରେ ୪୫ ଦିବସୀୟ ‘ମନରେଗା ବଞ୍ଚାଅ’ ଆନ୍ଦୋଳନ ଆରମ୍ଭ କରିବ କଂଗ୍ରେସ। ସେହିପରି ବିକଶିତ ଭାରତ ଜି-ରାମ ଜି ଅଧିନିୟମକୁ କୋର୍ଟରେ ଚ୍ୟାଲେଞ୍ଜ କରିବ ବୋଲି କଂଗ୍ରେସ ଶନିବାର କହିଛି। ଏହି ଅଭିଯାନ କାଳରେ ଗ୍ରାମସ୍ତରରୁ ଆରମ୍ଭ କରି ରାଜ୍ୟସ୍ତର ପର୍ଯ୍ୟନ୍ତ ଅନେକ କାର୍ଯ୍ୟକ୍ରମ ହାତକୁ ନିଆଯିବା ସହିତ ଦେଶର ଅଲଗା ଅଲଗା ଭାଗରେ ୪ଟି ବଡ଼ ସଭା ଆୟୋଜନ ମଧ୍ୟ କରାଯିବ।

କଂଗ୍ରେସର କହିବା କଥା ହେଉଛି ଏହି ସଂଗ୍ରାମର ଉଦ୍ଦେଶ୍ୟ ଦେଶରେ ପୁଣି ଥରେ ମହାତ୍ମାଗାନ୍ଧି ଜାତୀୟ ଗ୍ରାମୀଣ ରୋଜଗାର ଗ୍ୟାରେଣ୍ଟି ଅଧିନିୟମ (ମନରେଗା) ଲାଗୁ କରିବା ଓ ନୂଆ ଆଇନକୁ ପ୍ରତ୍ୟାହାର କରିବା। ପାର୍ଟିର ସଙ୍ଗଠନ ସାଧାରଣ ସମ୍ପାଦକ କେ.ସି.ବେଣୁଗୋପାଲ କହିଛନ୍ତି ଯେ ପାର୍ଟିର ଏହି ଅଭିଯାନ ଜାନୁୟାରୀ ୧୦ରୁ ଆରମ୍ଭ ହୋଇ ଫେବୃଆରୀ ୨୫ ତାରିଖ ପର୍ଯ୍ୟନ୍ତ ଜାରି ରହିବ। କଂଗ୍ରେସ ସାଧାରଣ ସମ୍ପାଦକ ଜୟରାମ ରମେଶ କହିଛନ୍ତି ଯେ ମନରେଗା ସ୍ଥାନରେ ସରକାର ଆଣିଥିବା ନୂଆ ଯୋଜନାରେ କେବଳ ‘ବିନାଶ ଭାରତ’ ଓ ଯୋଜନା କେନ୍ଦ୍ରୀୟ କରଣର ଗ୍ୟାରେଣ୍ଟି ଦିଆଯାଇଛି।

ସେ କହିଛନ୍ତି ଯେ ମନରେଗା ବଚାଓ ଆନ୍ଦୋଳନ କେବଳ ଦିଲ୍ଲୀରେ କେନ୍ଦ୍ରିତ ନାହିଁ ଏହା ପଞ୍ଚାୟତ, ବ୍ଲକ୍ ଓ ଜିଲ୍ଲାରେ ବି ଜାରି ରହିଛି। ସେ ଏହା ବି କହିଛନ୍ତି ଯେ ନୂଆ ଆଇନକୁ ନ୍ୟାୟାଳୟରେ ଚ୍ୟାଲେଞ୍ଜ କରାଯିବ। କଂଗ୍ରେସ ଜାତୀୟ ସଭାପତି ମଲ୍ଲିକାର୍ଜୁନ ଖଡଗେ ଏ ନେଇ ଏକ୍ସ ରେ ଏକ ପୋଷ୍ଟ କରିଛନ୍ତି। ସେ ଲେଖିଛନ୍ତି ଯେ କଂଗ୍ରେସ ଦାବି ସ୍ପଷ୍ଟ, ଏଥିରେ ଆମର ୩ଟି ଦାବି ରହିଛି। ପ୍ରଥମ ଦାବି ହେଲା ଜି ରାମ ଜି ଆଇନକୁ ପ୍ରତ୍ୟାହାର କରାଯାଉ, ମନରେଗାକୁ ଅଧିକାର ଆଧାରିତ ଆଇନରେ ଦେଶରେ ଲାଗୁ କରାଯାଉ ଓ କାମର ଅଧିକାର ଏବଂ ପଞ୍ଚାୟତର ଅଧିକାର ପୁଣି ଲାଗୁ ହେଉ। ଏଥି ପାଇଁ ଆମେ ଦେଶ ବ୍ୟାପୀ ମନରେଗା ବଞ୍ଚାଅ ଆନ୍ଦୋଳନ ଆରମ୍ଭ କରିଛୁ।

ଖଡଗେ କହିଛନ୍ତି ମନରେଗା କୌଣସି ଚ୍ୟାରିଟି ନୁହେଁ, ଏହା ଏକ ଆଇନତଃ ଗ୍ୟାରେଣ୍ଟି। ଏହି ଯୋଜନାରେ କୋଟିକୋଟି ଗରିବ ଲୋକଙ୍କୁ ସେମାନଙ୍କ ଗ୍ରାମରେ କାମ ମିଳିଲା, ଅନାହାର ଓ ପଳାୟନ କମ ହେଲା, ଗ୍ରାମୀଣ ପାରିଶ୍ରମିକ ବଢିଲା ଓ ମହିଳାଙ୍କ ଆର୍ଥିକ ମେରୁଦଣ୍ଡ ମଜଭୁତ ହେଲା। ଲୋକଙ୍କ ଏହି ଅଧିକାର ସମାପ୍ତ କରିବାକୁ ଦେଶରେ ଜି ରାମ ଜି ଯୋଜନା ଅଣା ଯାଇଛି। କୋଭିଡ ଓ ଅନ୍ୟ ଜାତୀୟ ସଂକଟ କାଳରେ ମନରେଗା ଏକ ବଡ଼ ସୁରକ୍ଷା କବଚ ଭାବେ ସାମ୍ନାକୁ ଆସିଥିଲା।

ତେବେ ବିକଶିତ ଭାରତ ଜି ରାମ ଜି ଯୋଜନାରେ ସବୁକିଛି କେନ୍ଦ୍ର ସରକାର ନିର୍ଦ୍ଧାରଣ କରିବେ ଓ ଗ୍ରାମରେ ରହୁଥିବା ଲୋକଙ୍କୁ ଏହାର ପରିଣାମ ଭୋଗିବାକୁ ପଡିବ ବୋଲି କେ.ସି ବେଣୁଗୋପାଲ କହିଛନ୍ତି। ବେଣୁଗୋପାଲ କହିଛନ୍ତି ଯେ ନୂଆ ଆଇନରେ କାର୍ଯ୍ୟ ଦିବସକୁ ୧୦୦ରୁ ବଢାଇ ୧୨୫ ଦିନ କରିବାର କଥା କୁହାଯାଇଛି। ତେବେ ଏହା କେବଳ ଏକ ପରିକଳ୍ପନା ମାତ୍ର, କାରଣ କେନ୍ଦ୍ର ନିଜ ଭାଗର ଧନ ଆବଣ୍ଟନ ଅନୁପାତ ୯୦%ରୁ ହ୍ରାସ କରି ୬୦% କରିଛି।