‘ଆଧ୍ୟାତ୍ମିକ ଗୁରୁଙ୍କୁ ମାନୁ ନଥିବା ଲୋକ ବଦମାସ’, ହାଇକୋର୍ଟ ବିଚାରପତିଙ୍କ ବୟାନକୁ ନେଇ ବିବାଦ

ନୂଆଦିଲ୍ଲୀ: ମାଦ୍ରାସ ହାଇକୋର୍ଟର ଜଷ୍ଟିସ୍ ଜିଆର ସ୍ୱାମୀନାଥନ ପୁଣି ଥରେ ବିବାଦ ଘେରକୁ ଆସିଛନ୍ତି । ଏକ ଆଧ୍ୟାତ୍ମିକ କାର୍ଯ୍ୟକ୍ରମରେ ତାଙ୍କର ଏକ ବୟାନ ରାଜନୀତି ଓ ଜୁଡିସିଆଲ୍ ଉଭୟରେ ଏକ ବିତର୍କ ଆରମ୍ଭ କରିଛି । କାର୍ଯ୍ୟକ୍ରମ ସମୟରେ ସେ କହିଥିଲେ ଯେ ଯେଉଁମାନେ ଆଧ୍ୟାତ୍ମିକ ଗୁରୁଙ୍କ କଥାକୁ ମାନନ୍ତି ନାହିଁ, ସେମାନେ ଦୁଷ୍ଟ, ମୁର୍ଖ ଓ ନିର୍ଦ୍ଦୟୀ ଅଟନ୍ତି । ତାଙ୍କର ଏହି ବୟାନ ପରେ ସୋସିଆଲ୍ ମିଡିଆ ଓ ରାଜନୀତିକ ଦଳଗୁଡ଼ିକ ମଧ୍ୟରେ ତୀବ୍ର ପ୍ରତିକ୍ରିୟା ଦେଖିବାକୁ ମିଳିଛି ।

ରିପୋର୍ଟ ଅନୁସାରେ, ଜଷ୍ଟିସ୍ ସ୍ୱାମୀନାଥନ କାର୍ଯ୍ୟକ୍ରମରେ କହିଥିଲେ ଯେ ତାମିଲନାଡ଼ୁର କିଛି ଲୋକ ନିଜକୁ ତାର୍କିକ ବୋଲି କୁହନ୍ତି । ଗୁରୁଙ୍କୁ ବିଶ୍ୱାସ କରୁଥିବା ଲୋକଙ୍କୁ ଅପମାନିତ କରନ୍ତି । ସେ କହିଛନ୍ତି ଯେ ଯେଉଁମାନେ ଏପରି କରନ୍ତି, ସେମାନେ ହିଁ ବାସ୍ତବରେ ଦୁଷ୍ଟ ଓ ନିର୍ଦ୍ଦୟୀ । ସେ ଏହା ମଧ୍ୟ କହିଛନ୍ତି ଯେ ତାଙ୍କ ପାଖରେ ସେବା ପ୍ରଦାନ କରିବା ପାଇଁ ଚାରି ବର୍ଷ ଅଛି ଏବଂ ଏବେ ସେ ନିଜ କଥାକୁ ମୁକ୍ତ ଭାବରେ ଉପସ୍ଥାପନ କରିବାକୁ ଚାହାନ୍ତି । କଠିନ ସମୟରେ ଗୁରୁଙ୍କଠାରୁ ମିଳିଥିବା ମାର୍ଗଦର୍ଶନ ଓ ସାହସ କଥା ମଧ୍ୟ ସେ ଉଲ୍ଲେଖ କରିଥିଲେ ।

ଏହା ପ୍ରଥମ ଥର ନୁହେଁ ଯେତେବେଳେ ଜଷ୍ଟିସ୍ ସ୍ୱାମୀନାଥନଙ୍କ ବୟାନ ଚର୍ଚ୍ଚାକୁ ଆସିଛି । ଏହା ପୂର୍ବରୁ ବି ସେ କହିଥିଲେ ଯେ ଯଦି ଆମେ ବେଦକୁ ସୁରକ୍ଷା ଦେବା ତେବେ ବେଦ ଆମକୁ ସୁରକ୍ଷା ଦେବ । ଏହି ବୟାନ ପରେ କିଛି ଲୋକ ଅଭିଯୋଗ କରିଥିଲେ ଯେ ସେ ସାମ୍ୱିଧାନିକ ଦାୟିତ୍ୱରୁ ଅଧିକ ଧାର୍ମିକ ବିଚାରକୁ ପ୍ରାଥମିକତା ଦେଉଛନ୍ତି । ସେହି ସମୟରେ ବି ଏହି ଟିପ୍ପଣୀକୁ ନେଇ ଖୁବ ଆଲୋଚନା ହୋଇଥିଲା ।

ଡିସେମ୍ବର ୧, ୨୦୨୫ରେ ଜଷ୍ଟିସ୍ ସ୍ୱାମୀନାଥନ୍ ତିରୁପ୍ପରନକୁଣ୍ଡ୍ରମ ପାହାଡ଼ରେ କାର୍ତ୍ତିଗଇ ଦୀପମ୍ ଜଳାଇବା ପାଇଁ ଅନୁମତି ମାଗିଥିବା ଆବେଦନଗୁଡ଼ିକୁ ଗ୍ରହଣ କରିଥିଲେ । ଏହି ସ୍ଥାନଟି ଏକ ଦରଗା ନିକଟରେ ଅବସ୍ଥିତ ଏକ ଲ୍ୟାମ୍ପପୋଷ୍ଟ ସହିତ ଜଡ଼ିତ । ଯେତେବେଳେ ନିର୍ଦ୍ଦେଶ ପାଳନ କରାଯାଇ ନଥିଲା, ଡିସେମ୍ବର ୩ରେ ଭକ୍ତମାନଙ୍କୁ ନିଜେ ଦୀପ ଜଳାଇବାକୁ ଅନୁମତି ଦେଇଥିଲେ ଏବଂ ସୁରକ୍ଷା ସୁନିଶ୍ଚିତ କରିବାକୁ ସିଆଇଏସଏଫକୁ ନିର୍ଦ୍ଦେଶ ଦେଇଥିଲେ । ତାମିଲନାଡୁ ସରକାର ଏହି ନିର୍ଦ୍ଦେଶକୁ ଚ୍ୟାଲେଞ୍ଜ କରି ସୁପ୍ରିମକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ରାଜ୍ୟ ସରକାର ଯୁକ୍ତି ଦେଇଥିଲେ ଯେ ଆଇନ ଶୃଙ୍ଖଳା ଏବଂ ସମ୍ବେଦନଶୀଳତା ଦୃଷ୍ଟିରୁ ନିଷ୍ପତ୍ତିର ପୁନର୍ବିଚାର କରାଯିବା ଆବଶ୍ୟକ । ମାମଲାଟି ବର୍ତ୍ତମାନ ସୁପ୍ରିମକୋର୍ଟରେ ବିଚାରାଧୀନ ଅଛି ।