ଟି-୨୦ ବିଶ୍ୱକପ୍ ସେମିଫାଇନାଲରେ ପହଞ୍ଚିବେ ଏହି ଚାରି ଟିମ୍, ପୂର୍ବତନ ଭାରତୀୟ ବୋଲର୍‌ଙ୍କ ବଡ଼ ଭବିଷ୍ୟବାଣୀ

ନୂଆଦିଲ୍ଲୀ: ଭାରତ ଓ ଶ୍ରୀଲଙ୍କାରେ ଆଇସିସି ଟି-୨୦ ବିଶ୍ୱକପ ୨୦୨୬ ଆୟୋଜନ ହେବ । ଏହି ମେଗା ଟୁର୍ଣ୍ଣାମେଣ୍ଟ ଫେବ୍ରୁଆରୀ ୭ରୁ ଆରମ୍ଭ ହେବ । ସବୁ ଟିମ୍ ଆଇସିସି ଟୁର୍ଣ୍ଣାମେଣ୍ଟ ପାଇଁ ନିଜ ପ୍ରସ୍ତୁତି ଆରମ୍ଭ କରିସାରିଛନ୍ତି । ଭାରତ ୨୦୨୪ ବିଶ୍ୱକପ୍ ଟାଇଟଲ୍ ଜିତିଥିଲା ଏବଂ ଏହା ପରଠୁ ଟିମ୍ ଏହି ଫର୍ମାଟ୍‌ରେ କୌଣସି ସିରିଜ୍ ହାରି ନାହିଁ । ସୂର୍ଯ୍ୟକୁମାରଙ୍କ ନେତୃତ୍ୱାଧୀନ ଟିମ୍ ଟୁର୍ଣ୍ଣାମେଣ୍ଟ ଜିତିବା ପାଇଁ ପ୍ରବଳ ଦାବିଦାର ଅଛି । ଅନ୍ୟପଟେ ପୂର୍ବତନ ଭାରତୀୟ ଦ୍ରୁତ ବୋଲର ଲକ୍ଷ୍ମୀପତି ବାଲାଜୀ କହିଛନ୍ତି ଯେ ଭାରତ ଓ ଶ୍ରୀଲଙ୍କା ଉଭୟ ଘରୋଇ ପରିସ୍ଥିତିର ଲାଭ ଉଠାଇ ଟୁର୍ଣ୍ଣାମେଣ୍ଟର ନକ୍‌ଆଉଟ୍ ପର୍ଯ୍ୟାୟକୁ ଯାଇପାରନ୍ତି ।

ଲକ୍ଷ୍ମୀପତି ବାଲାଜୀ ଷ୍ଟାର ସ୍ପୋର୍ଟସରେ ଭବିଷ୍ୟବାଣୀ କରିଛନ୍ତି ଯେ ଭାରତ ଏବଂ ଶ୍ରୀଲଙ୍କା ନକ୍‌ଆଉଟ୍‌ରେ ପହଞ୍ଚିବା ପାଇଁ ଉପମହାଦେଶୀୟ ପରିସ୍ଥିତିର ସୁଯୋଗ ନେଇପାରିବେ । ବାଲାଜୀ ବିଶ୍ୱାସ କରନ୍ତି ଯେ ସ୍ଲୋ ଏବଂ ଟର୍ଣ୍ଣିଂ ଟ୍ରାକରେ ଅଭ୍ୟସ୍ତ ଆୟୋଜକ ଦେଶଗୁଡ଼ିକ ସେମିଫାଇନାଲରେ ପହଞ୍ଚିପାରିବେ ।

ସେ ଭବିଷ୍ୟବାଣୀ କରିଛନ୍ତି ଯେ ଭାରତ, ଅଷ୍ଟ୍ରେଲିଆ, ଦକ୍ଷିଣ ଆଫ୍ରିକା ଓ ଶ୍ରୀଲଙ୍କା ଏବଂ ଆଫଗାନିସ୍ତାନ ମଧ୍ୟରୁ ଗୋଟିଏ ସେମିଫାଇନାଲରେ ପହଞ୍ଚିବ । ବାଲାଜୀଙ୍କ ମତରେ ଆଫଗାନିସ୍ତାନ ଚଳିତ ଟୁର୍ଣ୍ଣାମେଣ୍ଟରେ ବଡ଼ ଓଲଟପାଲଟ କରିପାରେ । ସେ ଗୁରୁତ୍ୱାରୋପ କରିଛନ୍ତି ଯେ ଗତ କିଛି ବର୍ଷ ଧରି ଦକ୍ଷିଣ ଆଫ୍ରିକାର ଖେଳିବା ଶୈଳୀ ଅନ୍ୟ ଦଳଗୁଡ଼ିକ ପାଇଁ ବିପଦ ସୃଷ୍ଟି କରିପାରେ ।

ଲକ୍ଷ୍ମୀପତି ବାଲାଜୀ କହିଛନ୍ତି, "ନିଶ୍ଚିତ ଭାବରେ, ଯଦି ଆପଣ ଶୀର୍ଷ ୪କୁ ଦେଖନ୍ତି, ତେବେ ମୁଁ ଭାବୁଛି ଯେ ଦକ୍ଷିଣ ଆଫ୍ରିକା ଗତ କିଛି ବର୍ଷ ମଧ୍ୟରେ ବହୁତ ଭଲ କାମ କରିଛି । ଶ୍ରୀଲଙ୍କା ମଧ୍ୟ ଭଲ ଖେଳୁଛି । ଶ୍ରୀଲଙ୍କା ଏବଂ ଆଫଗାନିସ୍ତାନ ପାଖରେ ଯୋଗ୍ୟତା ଅର୍ଜନ କରିବାର ସୁଯୋଗ ଅଛି ।"