ଦୁଇ ଦିନିଆ ଇସ୍ରାଏଲ୍ ଗସ୍ତରେ ଯିବେ ପ୍ରଧାନମନ୍ତ୍ରୀ ମୋଦୀ, ପ୍ରତିରକ୍ଷା ସହଭାଗୀତାର ଆରମ୍ଭ ହେବ ନୂଆ ଅଧ୍ୟାୟ

ନୂଆଦିଲ୍ଲୀ: ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ବୁଧବାରଠାରୁ ଦୁଇ ଦିନିଆ ଇସ୍ରାଏଲ ଗସ୍ତ କରିବେ । ଇସ୍ରାଏଲ୍ ପ୍ରଧାନମନ୍ତ୍ରୀ ବେଞ୍ଜାମିନ୍ ନେତାନ୍ୟାହୁଙ୍କ ଆମନ୍ତ୍ରଣରେ ଏହି ଯାତ୍ରା ହେବାକୁ ଯାଉଛି । ପ୍ରଧାନମନ୍ତ୍ରୀ ମୋଦୀଙ୍କ ଏହି ଗସ୍ତ ଦୁଇ ଦେଶ ମଧ୍ୟରେ ଗଭୀର ଓ ଦୀର୍ଘ ସମୟରୁ ଚାଲିଥିବା ରଣନୀତିକ ସହଭାଗୀତାକୁ ଅଧିକ ମଜଭୁତ କରିବ ।

ସରକାରୀ ବୟାନ ଅନୁସାରେ, ଦୁଇ ନେତା ଭାରତ-ଇସ୍ରାଏଲ୍ ରଣନୀତିକ ସହଭାଗୀତାରେ ହୋଇଥିବା ଗୁରୁତ୍ୱପୂର୍ଣ୍ଣ ପ୍ରଗତିର ସମୀକ୍ଷା କରିବେ । ବିଜ୍ଞାନ ଓ ପ୍ରଯୁକ୍ତି ବିଦ୍ୟା, ନବସୃଜନ, ପ୍ରତିରକ୍ଷା ଓ ସୁରକ୍ଷା, କୃଷି, ଜଳ ସେଚନ, ବାଣିଜ୍ୟ ଓ ଅର୍ଥବ୍ୟବସ୍ଥା ତଥା ଲୋକଙ୍କ ମଧ୍ୟରେ ଆଦାନପ୍ରଦାନ ସମେତ ବିଭିନ୍ନ କ୍ଷେତ୍ରରେ ସହଯୋଗ ଉପରେ ଆଲୋଚନା ହେବ । ଦୁଇ ନେତାଙ୍କ ମଧ୍ୟରେ ପାରସ୍ପାରିକ ହିତର କ୍ଷେତ୍ରୀୟ ଓ ବୈଶ୍ୱିକ ପ୍ରସଙ୍ଗ ଉପରେ ବି ବିଚାର-ବିମର୍ଶ ହୋଇପାରେ । ଏହି ଗସ୍ତ ସମୟରେ ପିଏମ୍ ମୋଦୀ ଇସ୍ରାଏଲ୍ ରାଷ୍ଟ୍ରପତି ଇସହାକ ହର୍ଜୋଗଙ୍କୁ ମଧ୍ୟ ସାକ୍ଷାତ କରିବେ ।

ଏହା ପ୍ରଧାନମନ୍ତ୍ରୀ ମୋଦୀଙ୍କର ଦ୍ୱିତୀୟ ଇସ୍ରାଏଲ୍ ଗସ୍ତ ହେବ । ପୂର୍ବରୁ ସେ ୨୦୧୭ରେ ଇସ୍ରାଏଲ ଗସ୍ତ କରିଥିଲେ । ସେହି ମସୟରେ ୟହୂଦୀ ବହୁଳ ଦେଶକୁ ଗସ୍ତ କରିବାରେ ପ୍ରଥମ ଭାରତୀୟ ପ୍ରଧାନମନ୍ତ୍ରୀ ହୋଇଥିଲେ । ଏହି ଗସ୍ତ ଭାରତର ସାମରିକ ଆଧୁନିକୀକରଣରେ ଏକ ମାଇଲଖୁଣ୍ଟ ପ୍ରମାଣିତ ହୋଇପାରେ ।

ପ୍ରଧାନମନ୍ତ୍ରୀଙ୍କ ଗସ୍ତ ପୂର୍ବରୁ ମଙ୍ଗଳବାର ଇସ୍ରାଏଲର କନସଲ୍ ଜେନେରାଲ୍ ୟାନିଭ୍ ରେଭାଚ୍ କହିଥିଲେ, "ଆମେ ଭାରତକୁ ଆମର ବିଶ୍ୱ ପ୍ରସିଦ୍ଧ ଆଇରନ ଡୋମ୍ ବାୟୁ ପ୍ରତିରକ୍ଷା ପ୍ରଣାଳୀ, ପ୍ରଯୁକ୍ତିବିଦ୍ୟା ସହିତ, ପ୍ରଦାନ କରିବାକୁ ପ୍ରସ୍ତୁତ । ଏହା କେବଳ ଏକ କିଣାବିକା ଚୁକ୍ତି ହେବ ନାହିଁ; ଏହି ପ୍ରଣାଳୀଗୁଡ଼ିକ ମେକ୍ ଇନ୍ ଇଣ୍ଡିଆ ଅଧୀନରେ ଭାରତରେ ନିର୍ମାଣ ହେବ।"

ଏହା ସ୍ପଷ୍ଟ ଯେ ପ୍ରଧାନମନ୍ତ୍ରୀ ମୋଦୀଙ୍କ ଗସ୍ତ କେବଳ ରାଜନୈତିକ ଏବଂ କୂଟନୈତିକ ନୁହେଁ ବରଂ ଗଭୀର ପ୍ରତିରକ୍ଷା ସହଭାଗୀତାର ଏକ ନୂଆ ଅଧ୍ୟାୟ ଲେଖିବାକୁ ଯାଉଛି । କେବଳ ଏତିକି ନୁହେଁ, ଭାରତରେ ଇସ୍ରାଏଲର ରାଷ୍ଟ୍ରଦୂତ ରୁଭେନ ଆଜାର ମଧ୍ୟ କହିଛନ୍ତି ଯେ ଇସ୍ରାଏଲ, ଭାରତକୁ ଏପରି ଗୁପ୍ତ ପ୍ରଯୁକ୍ତିବିଦ୍ୟା ଦେବାକୁ ପ୍ରସ୍ତୁତ ଯାହା ଏପର୍ଯ୍ୟନ୍ତ କାହାରିକୁ ଦିଆଯାଇ ନାହିଁ। ଆଜାର କହିଛନ୍ତି ଯେ ଭାରତ ଏବଂ ଇସ୍ରାଏଲ ଆତଙ୍କବାଦର ଚ୍ୟାଲେଞ୍ଜର ମୁକାବିଲା ପାଇଁ ମିଳିତ ଭାବରେ ନୂତନ ପଦ୍ଧତି ବିକଶିତ କରିବେ । ଉଭୟ ଦେଶ କ୍ଷେପଣାସ୍ତ୍ର ପ୍ରତିରକ୍ଷା ପ୍ରଣାଳୀ ଉପରେ ମଧ୍ୟ ଏକାଠି କାମ କରିବେ ।

ଭାରତ ସରକାରଙ୍କ ସୂତ୍ରରୁ ମିଳିଥିବା ସୂଚନା ଅନୁଯାୟୀ, ପ୍ରଧାନମନ୍ତ୍ରୀଙ୍କ ଗସ୍ତ ସମୟରେ ପ୍ରାୟ ୭୧,୦୦୦ କୋଟି ମୂଲ୍ୟର ପ୍ରତିରକ୍ଷା ଚୁକ୍ତିନାମା ସ୍ୱାକ୍ଷରିତ ହେବାର ଆଶା କରାଯାଉଛି । ଏଥିରେ ସ୍ପାଇସ୍ ୧୦୦୦ ପ୍ରିସିସନ୍ ବୋମା, ରାମ୍ପେଜ୍ ଏୟାର-ଟୁ-ଗ୍ରାଉଣ୍ଡ ମିସାଇଲ୍ ଏବଂ ଏୟାର ଲୋରା ବାଲିଷ୍ଟିକ୍ ମିସାଇଲ୍ ଅନ୍ତର୍ଭୁକ୍ତ ରହିଛି । ଏହା ବ୍ୟତୀତ, ଉନ୍ନତ ଲେଜର ଅସ୍ତ୍ରଶସ୍ତ୍ର ଉପରେ ବୈଷୟିକ ସହଯୋଗର ମଧ୍ୟ ସମ୍ଭାବନା ରହିଛି ।

ଇସ୍ରାଏଲ ପ୍ରଧାନମନ୍ତ୍ରୀ ନେତାନ୍ୟାହୁ ରବିବାର ଏହି ଗସ୍ତକୁ ଐତିହାସିକ ବୋଲି କହିଥିଲେ । ସେ କହିଥିଲେ ଯେ ଦୁଇ ଦେଶ ମଧ୍ୟରେ ସହଭାଗୀତା ନୂତନ ଶିଖରରେ ପହଞ୍ଚିଛି । ସୋସିଆଲ ମିଡିଆରେ ଏକ ପୋଷ୍ଟରେ ନେତାନ୍ୟାହୁ ପ୍ରଧାନମନ୍ତ୍ରୀ ମୋଦୀଙ୍କୁ ତାଙ୍କର ପ୍ରିୟ ବନ୍ଧୁ କହିବା ସହ ଦୁଇ ଦେଶ ମଧ୍ୟରେ ବଢ଼ୁଥିବା ରଣନୈତିକ ସମନ୍ୱୟ ଉପରେ ଆଲୋକପାତ କରିଥିଲେ । ଇସ୍ରାଏଲ ପ୍ରଧାନମନ୍ତ୍ରୀ କହିଥିଲେ ଯେ ତାଙ୍କ ଗସ୍ତ ସମୟରେ ପ୍ରଧାନମନ୍ତ୍ରୀ ମୋଦୀ ଇସ୍ରାଏଲ ସଂସଦ ନେସେଟକୁ ସମ୍ବୋଧିତ କରିବେ ଏବଂ ଜେରୁସାଲେମରେ ଏକ ନବସୃଜନ କାର୍ଯ୍ୟକ୍ରମରେ ଅଂଶଗ୍ରହଣ କରିବେ । ପିଏମ୍ ମୋଦୀ ହୋଲୋକାଷ୍ଟ ପୀଡିତଙ୍କ ପାଇଁ ଇସ୍ରାଏଲର ସରକାରୀ ସ୍ମାରକୀ ୟାଦ୍ ଭାସେମ୍ ମଧ୍ୟ ପରିଦର୍ଶନ କରିବେ ।