ଡେରାଡୁନରେ ତ୍ରିପୁରା ଛାତ୍ରଙ୍କୁ ହତ୍ୟା : ଜାତିଗତ ଆକ୍ଷେପକୁ ବିରୋଧ କରିବାରୁ ମାରିଦେଲେ...

ନୂଆଦିଲ୍ଲୀ, ୨୮/୧୨: ଉତ୍ତରାଖଣ୍ଡର ରାଜଧାନୀ ଡେରାଡୁନରେ ତ୍ରିପୁରା ଯୁବକଙ୍କୁ ହତ୍ୟା । ଜାତିଗତ ଆକ୍ଷେପକୁ ବିରୋଧ କରିବାରୁ ଜଣେ ଛାତ୍ରଙ୍କୁ ହତ୍ୟା କରାଯାଇଛି । ୧୪ ଦିନ ଧରି ସେ ମୃତ୍ୟୁ ସହ ସଂଗ୍ରାମ କରି ଶେଷରେ ପ୍ରାଣ ହରାଇଛନ୍ତି ।

ରିପୋର୍ଟ ଅନୁସାରେ, ତ୍ରିପୁରାର ଏଞ୍ଜେଲ୍ ଚକମା ନାମକ ଜଣେ ଜଣେ ବ୍ୟକ୍ତି ଡେରାଡୁନରେ ରହି ଏମବିଏ ପଢୁଥିଲେ । ଡିସେମ୍ବର ୯ ତାରିଖ ସନ୍ଧ୍ୟାରେ ସେ ସେଲାକୁଇ ଅଞ୍ଚଳରେ ଥିବା ବେଳେ ତାଙ୍କୁ ଜାତିଗତ ଆକ୍ଷେପ କରାଯାଇଥିଲା ।ଏହାକୁ ସେ ବିରୋଧ କରିଥିଲେ । ବିରୋଧ କରିବାକୁ ତାଙ୍କୁ କିଛି ଦୁର୍ବୃତ୍ତ ଆକ୍ରମଣ କରିଥିଲେ । ଏଥିରେ ସେ ଗୁରୁତର ହୋଇ ପଡିଥିଲେ । ତେବେ ଘଟଣାକୁ ନେଇ ଉତ୍ତର ପୂର୍ବର ରାଜ୍ୟରେ ଆକ୍ରୋଶ ଦେଖିବାକୁ ମିଳିଛି ।

ଘଟଣା ଦିନ ଏଞ୍ଜେଲ ନିଜ ସାନ ଭାଇ ମାଇକେଲ୍ ଚକମା ସହ ସ୍ଥାନୀୟ ବଜାରରେ କିଛି କିଣାକିଣି କରୁଥିଲେ । ଏହି ସମୟରେ ଦୁଇ ଭାଇଙ୍କୁ ଜାତିଗତ ଆକ୍ଷେପ କରାଯାଇଥିଲା । ଏଞ୍ଜେଲ ଅତି ଶାନ୍ତ ଭାବେ ସେମାନେ ଚୀନ୍ ନାଗରିକ ନୁହେଁ ବରଂ ଭାରତୀୟ ବୋଲି କହିଥିଲେ । ଏହି କଥା ଶୁଣିବା ପରେ ଦୁର୍ବୃତ୍ତମାନେ ଆହୁରି ରାଗିଯାଇଥିଲେ ଏବଂ ପ୍ରବଳ ମାଡ ମାରିଥିଲେ । ଏପରିକି ଛୁରାମାଡ ମଧ୍ୟ କରିଥିବା ଅଭିଯୋଗ ହୋଇଛି ।

ଆକ୍ରମଣରେ ଏଞ୍ଜେଲଙ୍କ ବେକରେ ଆଘାତ ଲାଗିଥିଲା । ମାଇକେଲ ମଧ୍ୟ ଗୁରୁତର ହୋଇ ପଡିଥିଲେ । ତୁରନ୍ତ ଉଭୟଙ୍କୁ ହସ୍ପିଟାଲରେ ଭର୍ତ୍ତି କରାଯାଇଥିଲା । ହେଲେ ୧୪ ଦିନର ସଙ୍ଘର୍ଷ ପରେ ଏଞ୍ଜେଲ ପ୍ରାଣ ହରାଇଛନ୍ତି । ଶନିବାର ତାଙ୍କ ପାର୍ଥିବ ଶରୀର ଅଗରତାଲାରେ ପହଁଚିଥିଲା । ଯେଉଁଠାରେ ଶୋକର ମାହୋଲ ଖେଳିଯାଇଛି ।

ମୁଖ୍ୟ ଅଭିଯୁକ୍ତ ଫେରାର

ପୋଲିସ ଏହି ମାମଲାରେ ୬ ଜଣଙ୍କୁ ଚିହ୍ନଟ କରିଥିଲା । ଏମାନଙ୍କ ମଧ୍ୟରୁ ୫ ଜଣଙ୍କୁ ଗିରଫ କରାଯାଇଛି । ତେବେ ମୁଖ୍ୟ ଅଭିଯୁକ୍ତ ଯଜ୍ଞ ଅଓ୍ୱସ୍ତୀ ଏବେବି ଫେରାର ରହିଛି । ସେ ନେପାଳ ପଳାଇଥିବା ଅନୁମାନ କରାଯାଉଛି । ତା ବାବଦରେ କିଏ ତଥ୍ୟ ଦେଲେ ୨୫ ହଜାର ଟଙ୍କାର ପୁରସ୍କାର ରାଶି ମଧ୍ୟ ଘୋଷଣା କରାଯାଇଛି ।